باس پروكۋراتۋرا: شۋ ماڭىنداعى پويىز اپاتى بويىنشا ەشكىم ۇستالعان جوق

استانا. قازاقپارات - ق ر باس پروكۋراتۋراسى شۋ ماڭىنداعى پويىز اپاتى بويىنشا ماشينيستىڭ ۇستالعانى تۋرالى اقپاراتتىڭ جالعان ەكەنىن رەسمي تۇردە مالىمدەدى.

سونداي-اق، قۇزىرلى ۆەدومستۆو اتالعان اقپاراتتى تاراتقان ب ا ق كوزدەرىنە جالعان اقپاراتتى تەرىسكە شىعارۋدى سۇرايدى، دەپ حابارلايدى قازاقپارات ءتىلشىسى باس پروكۋراتۋرانىڭ باسپا ءسوز قىزمەتىنە سىلتەمە جاساپ.

«بۇگىن ءارتۇرلى اقپاراتتىق اگەنتتىكتەردە «استانا- الماتى» باعىتىنداعى جولاۋشىلار پويىزىنىڭ لوكوموتيۆىن باسقارۋشى ماشينيستى پوليتسيانىڭ ۇستاعانى تۋرالى جالعان اقپارات تاراپ كەتتى. رەسمي تۇردە حابارلايمىز: قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر، ونىڭ بارىسىندا ەشقانداي ۇستاپ الىپ كەتۋ جاعدايى جۇرگىزىلگەن جوق»، - دەلىنگەن حابارلامادا.

قۇزىرلى ۆەدومستۆونىڭ باسپا ءسوز قىزمەتىنىڭ حابارلاۋىنشا، ق ر ينۆەستيتسيالار جانە دامۋ مينيسترلىگىنىڭ جانىنان اتالعان تەمىرجولداعى وقيعانى تەرگەۋ بويىنشا ارنايى كوميسسيا قۇرىلعان. ولاردا قاجەتتى اقپارات بار.

«تەرگەۋ بارىسى باس كولىك پروكۋراتۋراسىنىڭ باقىلاۋىندا. قازاقستان رەسپۋبليكاسىنىڭ زاڭىنىڭ 25-بابىنا سايكەس (بۇقارالىق اقپارات قۇرالدارى تۋرالى) شىندىققا سايكەس كەلمەيتىن اقپاراتتىق تاراتۋ بويىنشا جاۋاپكەرشىلىك قاراستىرىلعانىن ايتا كەتكىمىز كەلەدى. اقپاراتتىق اگەنتتىكتەرگە ماتەريالداردى شىعارۋ كەزىندە جاۋاپتى ورگاندار تاراتقان رەسمي كوزدەرگە سۇيەنۋدى جانە زاڭنىڭ 19-، 21-باپتارى بويىنشا بۇقارالىق اقپارات قۇرالدارىندا اتالعان وقيعا بويىنشا تاراعان جالعان اقپاراتتى تەرىسكە شىعارۋدى سۇرايمىز»، - دەلىنگەن حابارلامادا.