پرەمەر-مينيستر شۋداعى پويىز اپاتىن تەرگەۋدى جەكە باقىلاۋىنا الدى

استانا. قازاقپارات - ۇكىمەتتىڭ بۇگىنگى وتىرىسىندا شۋدا اپاتقا ۇشىراعان جولاۋشىلار پويىزىنا قاتىستى وقيعا قارالدى، دەپ حابارلايدى قازاقپارات ءتىلشىسى.

ق ر ىشكى ىستەر ءمينيسترى قالمۇحامبەت قاسىموۆتىڭ ايتۋىنشا، وقيعا ورنىنا استانادان ارنايى تەرگەۋ توبى جىبەرىلدى. «بۇل فاكتى بويىنشا ءبىز قىلمىستىق ءىس قوزعادىق. ارنايى تەرگەۋ توبى كۋاگەرلەرلەن جاۋاپ الىپ جاتىر. ءتيىستى ساراپتامالار تاعايىندالدى. بارلىق تەرگەۋ شارالارى ىشكى ىستەر مينيسترلىگى مەن باس پروكۋراتۋرانىڭ باقىلاۋىندا»، - دەيدى ق. قاسىموۆ.

ال ق ر دەنساۋلىق ساقتاۋ ءمينيسترى ەلجان ءبىرتانوۆتىڭ سوزىنە قاراعاندا، جولاۋشىلار پويىزىنىڭ اپاتى كەزىندە 25 ادام ءتۇرلى جاراقات العان. ءبىر جاس ءوسپىرىم كوز جۇمدى. «جەدەل جاردەم بريگاداسى بارعانعا دەيىن بالا وقيعا ورنىندا قايتىس بولدى. ساراپتامانىڭ الدىن الا قورىتىندىسى - جابىق باس سۇيەك مي جاراقاتى. ميعا قان قۇيىلىپ، ىسىك پايدا بولعان. مەديتسينالىق كومەككە جامبىل وبلىسىندا 17 جانە الماتى وبلىسىندا 8، جالپى 25 ادام جۇگىنگەن. 24 ناۋقاسقا مەديتسينالىق كومەك كورسەتىلگەننەن كەيىن ۇيلەرىنە جىبەرىلدى. ءبىر ازاماتقا وڭ اياعىنداعى توبىعى جابىق تۇردە سىندى دەگەن دياگنوزبەن وتا جاسالىپ، ول شۋ قالالىق اۋرۋحاناسىنا جاتقىزىلدى»، - دەپ اتاپ كورسەتتى ە. ءبىرتانوۆ.

ق ر پرەمەر-ءمينيسترى باقىتجان ساعىنتايەۆ جولاۋشىلار پويىزىنىڭ اپاتىنا قاتىستى كوڭىل ايتىپ، ءبىرقاتار تاپسىرمالار بەردى.

«قازاقستان تەمىرجولى» كومپانياسى قاراعاندى وبلىستىق اكىمدىگىمەن بىرلەسە وتىرىپ، قازا بولعان بالانىڭ وتباسىنا قاجەتتى كومەك پەن قولداۋ كورسەتسىن. دەنساۋلىق ساقتاۋ مينيسترلىگى زارداپ شەككەندەرگە ساپالى مەديتسينالىق كومەك بەرۋدى قامتاماسىز ەتسىن جانە باقىلاۋعا السىن. ىشكى ىستەر مينيسترلىگى، ينۆەستيسيالار جانە دامۋ مينيسترلىگى مەن «قازاقستان تەمىرجولى» كومپانياسى باسقا مۇددەلى ورگاندارمەن بىرلەسىپ، ۆاگونداردىڭ جولدان شىعىپ كەتۋ سەبەپتەرىن مۇقيات تەكسەرسىن. بۇل وقيعانى تەكسەرۋ بارىسىن مەن جەكە باقىلاۋىما الامىن»، - دەپ اتاپ كورسەتتى ب. ساعىنتايەۆ.

ايتا كەتەيىك، وتىرىس بارىسىندا «قازاقستان تەمىرجولى» ۇلتتىق كومپانياسىنىڭ باسشىسى قانات الپىسبايەۆ تەكسەرۋدىڭ الدىن الا ناتيجەسىن جاريالادى.