شۋدا بولعان پويىز اپاتى تۋرالى: تۇسىنىكسىز جايتتار كوپ

استانا. قازاقپارات - ۇكىمەتتىڭ بۇگىنگى وتىرىسىندا «قازاقستان تەمىرجولى» ۇلتتىق كومپانياسىنىڭ باسشىسى قانات الپىسبايەۆ تەكسەرۋدىڭ الدىن الا ناتيجەسىن جاريالادى، دەپ حابارلايدى قازاقپارات ءتىلشىسى.

«بۇعان دەيىن پويىزدىڭ ولاي جولدان شىعىپ كەتۋ وقيعالارى بولماعان. سەبەبى تەحنيكالىق جاعىنان تۇسىنىكسىز جايتتار كوپ. اتاپ ايتقاندا، جولاۋشىلار پويىزى ءتۇزۋ جولدا اۋدارىلىپ كەتكەن. سوسىن ول جەردەگى تەمىرجولدىڭ دياگنوستيكاسى اعىمداعى جىلى 6 -ماۋسىم كۇنى جۇرگىزىلدى. سول كەزدە ەشقانداي كەمشىلىكتەر انىقتالماعان. اتالعان ۋچاسكەدە ساعاتىنا 100 شاقىرىممەن جۇرۋگە بولادى. ال قۇلاعان پويىز 93 شاقىرىممەن جۇرگەن. نەگىزى، رەلستەر جانە باسقا دا قوسىمشا بولشەكتەر تەك 60 پروتسەنتكە پايدالانىلعان بولاتىن»، - دەدى ق. الپىسبايەۆ. بۇگىندە كومپانيا باسشىسى اپات بولعان جەردە ءجۇر. ءوز بايانداماسىن ول ونلاين بايلانىس ارقىلى جاسادى.

ونىڭ ايتۋىنشا، شۋداعى اپات بويىنشا تەكسەرۋ جۇمىستارى جالعاسۋدا. وعان وتاندىق جانە رەسەيلىك ماماندار تارتىلىپ وتىر. «كوميسسيا قاتار تۇرعان جولمەن جۇك پويىزىن جۇرگىزىپ كوردى. وسى سىناقتىڭ ناتيجەسىندە جولاۋشىلار پويىزىنىڭ جولدان شىعىپ كەتۋىنە باسقا پويىزدىڭ اسەر ەتپەگەنى انىقتالدى»، - دەپ اتاپ كورسەتتى ق. الپىسبايەۆ.

ايتا كەتەيىك، تەكسەرۋ كوميسسيانىڭ جۇمىسى وسى ايدىڭ اياعىنا دەيىن جالعاسادى.

«قازاقستان تەمىر جولى» ۇلتتىق كومپانياسى قايتىس بولعان جاس ءوسپىرىمنىڭ وتباسىنا 2405000 تەڭگە كولەمىندە وتەماقى تولەپ بەرەدى. بۇدان بولەك، جاراقات العان ازاماتتارعا 500000 - 1000000 تەڭگە كولەمىندە وتەماقى بەرىلەدى.