تۇركيادا قازاق- تۇرىك مادەني-ءبىلىم بەرۋ ورتالىعى اشىلدى

استانا. قازاقپارات - تۇركيانىڭ نييدە قالاسىنداعى نييدە ومەر حاليسدەمير ۋنيۆەرسيتەتىندە قازاق-تۇرىك مادەني-ءبىلىم بەرۋ ورتالىعى اشىلدى، دەپ حابارلايدى قازاقپارات ەۋرازيا ۇلتتىق ۋنيۆەرسيتەتىنىڭ سايتىنا سىلتەمە جاساپ.

سالتاناتتى تۇساۋكەسەر راسىمگە ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءبىرىنشى پرورەكتورى - وقۋ ءىسى جونىندەگى پرورەكتور اسەمگۇل مولداجانوۆا، ە ۇ ۋ- دىڭ ينتەرناتسيونالداندىرۋ جانە يميدج ورتالىعىنىڭ ديرەكتورى سەييت ءالي اۆدجۋ، حالىقارالىق قاتىناستار فاكۋلتەتىنىڭ دەكانى اقبوتا جولداسبەكوۆا جانە نييدە ومەر حاليسدەمير ۋنيۆەرسيتەتىنىڭ باسشىلارى قاتىستى.

 

ورتالىقتىڭ اشىلۋى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن نييدە ومەر حاليسدەمير ۋنيۆەرسيتەتى اراسىنداعى ىنتىماقتاستىقتى دامىتۋعا جاڭا باعدار بولىپ تابىلادى. تۇركياداعى قازاق- تۇرىك مادەني-ءبىلىم بەرۋ ورتالىعى نييدە ومەر حاليسدەمير ۋنيۆەرسيتەتىنىڭ رەكتورى، پروفەسسور مۋحسين كار جانە حالىقارالىق ىنتىماقتاستىق جونىندەگى دەپارتامەنتىنىڭ ديرەكتورى حۋلي ۋرۋندي حانىم، تۇركيا رەسپۋبليكاسىنىڭ توتەنشە جانە وكىلەتتى ەلشىسى نيەۆزات ۋيانىك، سونداي-اق ق ر-دىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلىنىڭ قولداۋىمەن قۇرىلىپ وتىر.

بولاشاقتا بۇل ورتالىق ەكى جوعارى وقۋ ورىندارى اراسىنداعى ىنتىماقتاستىقتى ۇيلەستىرە وتىرىپ، حالىقارالىق عىلىمي- زەرتتەۋ جونىندە عىلىمي كونفەرەنتسيالار وتكىزەدى، بىرلەسكەن باعدارلامالار دايىنداپ، قوس وقۋ ورنىنىڭ عالىمدارى عىلىمي ەڭبەكتەر جازادى جانە بىرلەسە زەرتتەۋلەر جۇرگىزەدى.

سونىمەن قاتار، قازاق-تۇرىك مادەني ءبىلىم بەرۋ ورتالىعى الداعى ۋاقىتتا جوعارى بىلىكتى ماماندار دايىندايدى: بۇل باكالاۆريات، ماگيستراتۋرا جانە دوكتورانتۋرا باعدارلامالارى بويىنشا، سونداي-اق وقىتۋشىلار مەن ستۋدەنتتەر ءۇشىن وتە پايدالى بولماق.

ايتا كەتەيىك، اشىلۋ سالتاناتىندا ينجەنەرلىك- تەحنيكالىق سالا بويىنشا تۇركى الەمى ۋنيۆەرسيتەتتەر كونگرەسىن ۇيىمداستىرۋ تۋرالى كەلىسىمگە قول قويىلدى. تۇركيادا وتەتىن ءبىرىنشى كونگرەسس 2019 -جىلدىڭ باسىندا نييدە ومەر حاليسدەمير ۋنيۆەرسيتەتىندە بولسا، ال ەكىنشىسى 2020 -جىلى قازاقستاندا، ياعني ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتەدى.

سونداي-اق، وسى كۇنى ەكى ۋنيۆەرسيتەت اراسىندا مەموراندۋمعا قول قويىلدى. ەندى اكادەميالىق ۇتقىرلىق باعدارلامالارىن جۇزەگە اسىرۋ اياسىندا قوس ۋنيۆەرسيتەتتىڭ عالىمدارى مەن وقىتۋشىلارى بىرلەسە جۇمىس ىستەپ، عىلىمي-زەرتتەۋ جوبالارىن جۇزەگە اسىرادى جانە تاجىريبە الماسۋعا زور مۇمكىندىك تۋىپ وتىر.