قىرعىز ۇكىمەتىنىڭ باسشىسى ماسكەۋدەگى تاكسي قاعىپ كەتكەندەردى قىرعىزستانعا دەمالۋعا شاقىردى

بىشكەك. قازاقپارات - قىرعىزستاننىڭ پرەمەر-ءمينيسترى مۇحاممەدكالىي ابىلعازيەۆ ماسكەۋدە قىرعىزستاندىق جۇرگىزۋشى قاعىپ كەتىپ زارداپ شەككەندەردى قىرعىزستانعا دەمالۋعا شاقىردى، دەپ حابارلايدى كابار اگەنتتىگى.

مۇحاممەدكالىي ابىلعازيەۆ قىرعىزستان رەسپۋبليكاسىنىڭ ىشكى ىستەر ءمينيسترى قاشقار دجۋنۋشاليەۆپەن كەزدەستى. ولار ماسكەۋدە قىرعىزستاندىق جۇرگىزۋشى كولىگىمەن جول شەتىندەگى ءبىر توپ ادامدى قاعىپ كەتكەنى جونىندە وقيعانى تالقىلادى.

«16 -ماۋسىم كۇنى ماسكەۋدىڭ ورتالىعىندا وتانداسىمىز چىنگىز اناربەك ۋۋلۋ جاياۋ جۇرگىنشىلەردى كولىگىمەن قاعىپ كەتتى. جول-كولىك وقيعاسىنان بىرنەشە ادام زارداپ شەككەن، ولاردىڭ قاتارىندا فۋتبول جانكۇيەرلەرى دە بار. بۇل - وتە قايعىلى وقيعا، دەگەنمەن ول قاساقانا جاسالماعان»، - دەدى ابىلعازيەۆ.

ابىلعازيەۆ جاقىندا رەسەيگە سول ەلدىڭ ىشكى ىستەر ءمينيسترى ۆلاديمير كولوكولسەۆپەن كەزدەسۋگە اتتانعالى جاتقان قاشقار دجۋشۋناليەۆكە زارداپ شەككەن ناۋقاستاردىڭ جاعدايىن ءبىلىپ قايتۋدى تاپسىردى.

«بولعان جايت رەسەي فەدەراتسياسىندا جۇمىس جاساپ جۇرگەن جەرلەستەرىمىزگە ەشقانداي كەسىرىن تيگىزبەۋى كەرەك. بۇل - جازاتايىم وقيعا. قىرعىز رەسپۋبليكاسى ۇكىمەتىنىڭ اتىنان كولىك قاعىپ كەتكەن ادامداردان كەشىرىم سۇرايمىن جانە قىرعىزستانعا كەلىپ دەمالىپ، ەم قابىلداۋعا شاقىرامىن. بىزدە دەنساۋلىقتى قالىپقا كەلتىرىپ، كەرەمەت دەمالۋ ءۇشىن بارلىق جاعداي جاسالعان. زارداپ شەككەندەردىڭ ۇشىپ كەلۋى مەن دەمالىسىن ۇيىمداستىرۋعا قاجەت بارلىق شىعىندى ءوز موينىمىزعا الۋعا دايىنبىز»، - دەدى قىرعىز ۇكىمەتىنىڭ باسشىسى.

سونداي-اق، ابىلعازيەۆ ىشكى ىستەر مينيسترىنە چىنگىز اناربەك ۋۋلۋمەن كەزدەسىپ، بىلىكتى زاڭگەردىڭ قىزمەتىن ۇسىنۋ ماسەلەسىن شەشۋدى تاپسىردى.