استانادان باستاۋ العان سالت اتتىلاردىڭ ەكسپەديتسياسى قالاي وتۋدە

استانا. قازاقپارات - وتكەن اپتادا استانادان شىققان سالت اتتىلار ەكسپەديتسياسى اقمولا وبلىسىن باسىپ ءوتىپ، پاۆلودار وبلىسىنا قاراستى باياناۋىل اۋدانىنا جەتتى، دەپ حابارلايدى قازاقپارات.

استانا قالاسى اكىمدىگىنىڭ رەسمي سايتىندا حابارلانعانداي، 12 -ماۋسىم كۇنى استانادان شىققان جىگىتتەر سارىارقانىڭ سارى دالاسىمەن ءجۇرىپ وتىرىپ، اقمولا وبلىسىنا قاراستى ارشالى، ەرەيمەنتاۋ اۋداندارىنا ات باسىن تىرەگەن. 14 -ماۋسىم كۇنى وزدەرىنىڭ 600 شاقىرىمدىق جول ساپارىندا كورسەتىلگەن ءۇش ۇلتتىق پاركتىڭ ءبىرىنشىسى - بۇيراتاۋ ۇلتتىق پاركىنە جەتكەن.

ال 15 -ماۋسىم كۇنى پاۆلودار وبلىسىنىڭ اۋماعىنا اياق باسىپ، الكەي مارعۇلان اۋىلىنا تابان تىرەدى. وندا شەرۋشىلەردى اۋىل تۇرعىندارى سالتاناتپەن قارسى الىپ، اكادەميك الكەي حاقان ۇلىنىڭ مۇراجايىمەن تانىستىردى. شاعىن كونسەرت ۇيىمداستىرىلدى.

بەرىك اقىلبەكتىڭ ايتۋىنشا، توپ باياناۋىل ۇلتتىق پاركى جولىندا ورنالاسقان ءماشھۇر ءجۇسىپ كوپەي ۇلى كەسەنەسىنە دە ات باسىن بۇرعان. اۋليە باسىنا زيارات ەتىپ، مۋزەيمەن تانىسقان.

«قازىر ءبىز باعىتىمىزداعى ەكىنشى مەجەلى ۇلتتىق پارك - باياناۋىلدامىز. جول ساپارىمىز ويداعىداي وتۋدە. جولاي كەزدەسكەن اۋىلداردا ءبىزدى وتە جاقسى قارسى الۋدا. ساپار بارىسىندا دالادا تۇنەيمىز دەپ پالاتكالار الىپ ەدىك، ازىرگە ولارعا تۇنەپ ۇلگەرمەدىك. اتتارىمىز شالدىقپاسىن دەپ كۇنىنە 60-70 شاقىرىم جۇرەمىز»، - دەدى توپ جەتەكشىسى بەرىك اقىلبەك.

توپ جەتەكشىسىنىڭ ايتۋىنشا، شەرۋشىلەر قازىر باياناۋىل ۇلتتىق پاركىنىڭ اۋماعىنا جاتاتىن قاسيەتتى ورىندارمەن تانىسۋدا.

ەستەرىڭىزگە سالا كەتەيىك، «استانا - ۇلى دالا ەلورداسى» اتتى سالت اتتىلاردىڭ كوپكۇندىك حالىقارالىق ەكسپەديتسياسى 12 -ماۋسىم كۇنى استانادان جولعا شىققان بولاتىن. 10 ادامنان قۇرالعان توپ بۇيراتاۋ، باياناۋىل ۇلتتىق پاركتەرىن باسىپ ءوتىپ، قارقارالى اۋدانىنا جەتۋدى ماقسات ەتكەن. تۋردىڭ جالپى ۇزاقتىعى شامامەن - 600 شاقىرىم.