تاليبان قوزعالىسىنىڭ وكىلدەرىمەن وزبەكستان جۇمىس كەزدەسۋىن وتكىزدى

تاشكەنت. قازاقپارات - وزبەكستان وكىلدەرى تاليبان قوزعالىسىنىڭ جوعارى دەڭگەيدەگى باسشىلارىمەن جۇمىس كەزدەسۋىن وتكىزدى، دەپ حابارلايدى قازاقپارات.

وزبەكستان رەسپۋبليكاسى سىرتقى ىستەر مينيسترلىگىنىڭ رەسمي مالىمدەمەسىندە تاشكەنت كونفەرەنسياسىنا قاتىسۋشىلاردىڭ بىرلەسكەن كوزقاراستارىن جۇزەگە اسىرۋ ماقساتىندا وزبەك تاراپى ءتيىستى بايلانىستاردى ورناتا وتىرىپ، تاليبان قوزعالىسىنىڭ جوعارى دەڭگەيدەگى وكىلدەرىمەن جۇمىس كەزدەسۋىن وتكىزگەندىگى ايتىلادى.

كەزدەسۋ بارىسىندا اۋعانستاندا تۇراقتى بەيبىت ءومىر ورناتۋ مەن وسى ەلدىڭ ەكونوميكالىق دامۋىن قامتاماسىز ەتۋ ماقساتىنداعى بىرلەسكەن قيمىلدار مەن ديالوگتىڭ بولاشاعى تالقىلاندى.

وسى تۇرعىدان العاندا وزبەكستان وكىلدەرى اۋعانستان ۇكىمەتى مەن تاليبان قوزعالىسى اراسىندا يد ال- فيتر مەرەكەسىن اتاپ وتۋگە بايلانىستى اتىستى توقتاتۋ جونىندەگى ءوزارا كەلىسىمدى قۇپتايدى. وزبەك تاراپى اۋعانستان پرەزيدەنتى عاني اشرافتىڭ اتىستى توقتاتۋ رەجيمىنىڭ مەرزىمىن ۇزارتۋ جونىندەگى مالىمدەمەسىنە بايلانىستى ءوزارا بەيبىت كەلىسىم ۇزاققا سوزىلاتىنىنان ءۇمىتتى.

وزبەكستاننىڭ سىرتقى ساياسات ۆەدومستۆوسىنىڭ حابارلاماسىندا 2018 -جىلدىڭ 28 -ناۋرىزىندا تاشكەنتتە اۋعانستان بويىنشا وتكەن حالىقارالىق كونفەرەنسيا كەزىندە قول جەتكىزىلگەن كەلىسىمدەرگە بايلانىستى وزبەكستاننىڭ وسى ەلدەگى تۇراقتىلىقتىڭ ورنىعۋى مەن ەلدىڭ الەۋمەتتىك- ەكونوميكالىق دامۋىنا باعىتتالعان ءىس-قيمىلداردى جالعاستىرا بەرەتىنى ايتىلعان.

وسى باعىتتا وزبەكستان اۋعانستان ۇكىمەتىمەن جانە ا ق ش، ق ح ر، رەسەي، حالىقارالىق بايلانىس توبىنا قاتىسۋشى ەلدەرمەن، ەۋرازيا ءوڭىرى، وڭتۇستىك ازيا، ورتا جانە تاياۋ شىعىستاعى مەملەكەتتەرمەن بىرنەشە كونسۋلتاتيۆتى كەزدەسۋلەر مەن كەلىسسوزدەر وتكىزگەن.