باتىر جۇكەمبايەۆ نوكاۋتقا جەتۋدىڭ قۇپياسىن ايتتى
بوكسشى كاسىپقوي رينگتە وسىعان دەيىن وتكىزگەن 13 جەكپە-جەگىنىڭ بارلىعىندا جەڭىسكە جەتكەن، 11 قارسىلاسىن نوكاۋتقا جىبەرگەن. تاعى ءبىر ايتا كەتەرلىگى، باتىر كەزدەسۋلەرىنىڭ بارلىعىن كانادادا وتكىزگەن.
«ەت پەن قىمىزدى ساعىندىم. مۇمكىندىك بولدى دەگەننەن-اق وتانعا ورالىپ، ۋاقىتىمدى وتباسىممەن بىرگە وتكىزگىم كەلەدى... ەكى جىلدا كاناداداعى ومىرگە دە بەيىمدەلدىم، مونرەالدا تۇرامىن. كانادالىقتار دا قازاقتار سياقتى قوناقجاي حالىق. ول جاقتاعى قازاقتارمەن دوستاسىپ الدىم، بايلانىستى ۇزبەيمىز»، - دەيدى باتىر جۇكەمبايەۆ.
بوكسشى IBO International جانە WBC Continental Americas تيتۋلدارىنا قول جەتكىزۋ ءۇشىن كوپ ەڭبەكتەنۋ قاجەتتىگىنە توقتالدى.
«ءاربىر بوكسشى العاشقى جەڭىستەرىن، بەلدىكتەرىن ەستە ساقتايدى. ولاردى جەڭۋ ماعان وڭاي بولعان جوق. IBO International بەلدىگىن الۋ دا ۇلكەن جەتىستىك. ءبىراق مۇنىمەن توقتاپ قالمايمىن. ءوز سالماعىمنىڭ ابسوليۋتتىك چەمپيونى بولعىم كەلەدى. ءبىراق ءبارى دە ماعان بايلانىستى ەمەس. كىممەن ايقاساتىنىمدى پروموۋتەرلەر مەن مەنەدجەرلەر شەشەدى. ەگەر «ەرتەڭ-اق رينگكە شىعۋعا دايىنسىڭ با؟» دەپ سۇراسا، سەنىمدى جاۋاپ بەرەمىن»، - دەيدى باتىر جۇكەمبايەۆ.
باتىردىڭ ايتۋىنشا، كانادالىق جانكۇيەرلەر ونى «وزىمىزدىكى» دەپ اتاي باستاعان.
«مەنىڭ سوڭعى جەكپە-جەكتەرىم ءزاۋلىم سپورت كەشەنىندە بولدى. جانكۇيەرلەر قولتاڭبا سۇراپ، بىرگە سۋرەتكە ءتۇسۋدى ۇسىنادى. ارينە، ا ق ش- تا كەزدەسۋ وتكىزۋدى جوسپارلاپ ءجۇرمىن. ءبىراق ول ءۇشىن HBO جانە ESPN تەلەارنالارىمەن كەلىسىمشارت جاساسۋ قاجەت»، - دەيدى ول.
جۇكەمبايەۆ سوڭعى جەتى قارسىلاسىن نوكاۋتپەن جەڭگەن.
«كاسىپقويلار اراسىندا ءارتۇرلى بوكسشىلار بار. كەيبىرەۋلەر شوۋ كورسەتكىسى كەلەدى، ەندى بىرەۋلەر قارسىلاسىن «ولتىرە سالادى». ماعان توپەلەتە شابۋىلداعان ۇنايدى. كۇشكە سالىپ ۇرۋ - مەنىڭ ستيلدىك ەرەكشەلىگىم. دەگەنمەن سوڭعى كەزدەسۋلەردە قارسىلاستارىمدى ەرتە نوكاۋتقا جىبەرۋدى ماقسات ەتپەگەن ەدىم. ءبىراق وسىلاي اياقتالدى»، - دەيدى باتىر جۇكەمبايەۆ.