ريم قالاسىندا قازاق فيلمدەرى كورسەتىلدى
كورسەتىلىم الدىندا كورەرمەنگە قازاقستان تۋرالى اڭگىمەلەگەن ەلشىلىك وكىلدەرى، سونداي- اق، يتاليانىڭ مادەنيەت جانە ونەر قايراتكەرلەرى قازاقستان مەن استانا قالاسىنىڭ دامۋى دەڭگەيىنە جانە وتاندىق كينەماتوگرافيا سالاسىنا جوعارى باعا بەردى. يتاليان تىلىندە سۋبتيترلەرى بار فيلمدى تاماشالاعان كورەرمەندەر قازاق حالقىنىڭ تاريحىنا قىزىعۋشىلىقتارىن ءبىلدىردى. ايتا كەتسەك، ءريمنىڭ تاريحي اۋداندارىنىڭ بىرىندە ورنالاسقان Casa del Cinema كينوتەاترىندا بۇل كۇنى بوس ورىن بولمادى. جينالعان ونەرسۇيەر قاۋىم وتاندىق كينوتۋىندىلاردى جىلى قابىلداپ، بۇدان كەيىن دە قازاق مادەنيەتى جانە ونەرىمەن ەتەنە تانىسقىسى كەلەتىن نيەتىن ءبىلدىردى. قازاق حاندىعىنىڭ 550 جىلدىعىنا وراي تۇسىرىلگەن «قازاق حاندىعى» سەريالىنىڭ كينونۇسقاسى - «الماس قىلىش» فيلمى قازاقستان تاۋەلسىزدىگىنىڭ 25 جىلدىعىنا وراي ەڭ العاش استانا قالاسىندا كورسەتىلگەن بولاتىن. اۋقىمدى جوبانىڭ يدەياسى ەل پرەزيدەنتى ن. نازاربايەۆقا تيەسىلى.
تاريحي فيلمدەر تۇسىرۋدەن تاجىريبەسى تولىسا باستاعان قازاقستاندىق رەجيسسەرلەردىڭ ۇلتتىق تانىم مەن قازاقى قايناردان قاشىقتاماعان تۋىندىسىمەن تانىسقان سوڭ يتالياندىقتار مەملەكەت قۇرعان ايبارلى حالىقتىڭ ەرلىگىنە قۋانا قول سوقتى. اعىلشىن جازۋشىسى دجەرەمي ۆيلسوننىڭ قازاقستان پرەزيدەنتى نۇرسۇلتان نازاربايەۆتىڭ ءومىربايانىن جازۋ ءۇشىن ونىمەن كەزدەسۋگە قول جەتكىزىپ قانا قويماي، بۇل سۇحباتتىڭ سوڭى بۇكىل ەلدى ارالاۋعا، تاريحقا كوز جۇگىرتكەن ۇزاق ۋاقىتقا سوزىلعان قىزىققا تولى ساياحاتپەن ۇشتاسقانىنا يتالياندىقتار «جۇلدىزدار توعىسقاندا» فيلمى ارقىلى كۋا بولىپ، تاۋەلسىز جاس مەملەكەتتىڭ قالىپتاسۋىنىڭ كوركەم شەجىرەسىن از ۋاقىتتا شولىپ شىقتى. ال رومانتيكالىق كومەديانى جوعارى باعالايتىن يتالياندىقتار ۇلتتىق داستۇرگە نەگىزدەلگەن، ىزگىلىككە تولى «ون التى قىز» فيلمىنەن وزدەرى ءۇشىن سونى جاڭالىق تاۋىپ، عاجاپ اسەرگە بولەنگەندەرىن جارىسا جەتكىزىپ جاتتى. كورسەتىلىمنەن كەيىن قوناقتار قازاقستان مەن استانا قالاسى تۋرالى دايىندالعان وتاندىق يميدج بەينەماتەريالداردى كورىپ تاماشالادى.
ايگۇل احانباي قىزى، «ەگەمەن قازاقستان» الماتى