قازاقستاندىقتار وزدەرىنىڭ بولاشاقتاعى زەينەتاقى مولشەرىن ەسەپتەي الادى

الماتى. قازاقپارات - الماتى قالاسىنداعى ب ج ز ق بولىمشەسى زەينەتاقى كالكۋلياتورىن قالاي پايدالانۋدى ءتۇسىندىردى، دەپ حابارلايدى قازاقپارات ءتىلشىسى.

1998-جىلدان باستاپ قازاقستاندا جيناقتاۋشى زەينەتاقى جۇيەسى جۇمىس ىستەپ كەلەدى. ياعني، بۇل دەگەنىمىز بولاشاقتاعى زەينەتاقى مولشەرى جەكە زەينەتاقى شوتىندا جينالعان سوماعا بايلانىستى: نەعۇرلىم جيناۋ كولەمى كوپ بولعان سايىن، زەينەتتىك دەمالىستاعى ءومىر سوعۇرلىم ىڭعايلى بولماق. ول ءۇشىن سالىمشىلارعا قوردىڭ سايتىندا زەينەتاقى كالكۋلياتورى ىسكە قوسىلعان. وسى ارقىلى كەز كەلگەن ادام وزدەرىنىڭ بولاشاقتاعى زەينەتاقى مولشەرىن ەسەپتەي الادى.

«كالكۋلياتوردى قولدانۋ وتە وڭاي - www.enpf.kz سايتىندا «زەينەتاقى كالكۋلياتورى» بولىمىنە كىرىپ، «بولجالدى زەينەتاقى كالكۋلياتورىن» (بولاشاق زەينەتكەرلەر ءۇشىن) جانە «اعىمداعى زەينەتاقى كالكۋلياتورىن» (قازىرگى زەينەتكەرلەر ءۇشىن) ەسەپتەۋگە بولادى. ونداعى سۇراتىلعان دەرەكتەردى: تۋعان كۇنى، جىنىسى، ەڭبەك ءوتىلى، جيناقتاۋشى زەينەتاقى جۇيەسىنە قاتىسقان ءوتىلى، قازىرگى تاڭداعى جيناقتالعان سوما جانە سوڭعى ۋاقىتتاعى ورتاشا جالاقى مولشەرىن تولتىرىپ، «ەسەپتەۋ جۇرگىزۋ» تەتىگىن باسۋ كەرەك. ەگەر ءسىز جەكە كابينەتىڭىز ارقىلى كىرسەڭىز، بۇل دەرەكتەر اۆتوماتتى تۇردە تولىتىرىلادى»، - دەدى ب ج ز ق الماتى بولىمشەسىنىڭ باسپا ءسوز قىزمەتىنەن.

كالكۋلياتور بولاشاقتاعى زەينەتاقىنى ءۇش جولمەن ەسەپتەيدى: پەسسيميستىك، رەاليستىك جانە وپتيميستىك. ونىڭ ناتيجەسىندە بىرنەشە سوما شىعادى: ورتاق زەينەتاقى، نەگىزگى زەينەتاقى، ب ج ز ق زەينەتاقىسى جانە ءوز بەتىمەن سالعان زەينەتاقى جارنالارى (ەگەر بولسا). سونداي-اق، كالكۋلياتور بۇل جيناقتاردىڭ قانشا جىلعا جەتەتىنىن، ءسىز زەينەتكە شىققانداعى بولجالدى جالاقى مولشەرىن جانە الماستىرۋ كوەففيتسيەنتىن ەسەپتەيدى.