كەيكى باتىردىڭ ءرولىن سومدايتىن اكتەر بەلگىلى بولدى

 استانا. قازاقپارات - «كەيكى مەرگەن» تاريحي- درامالىق تەلەحيكاياسىندا باتىردىڭ ءرولىن اكتەر دارحان سۇلەيمەنوۆ سومدايدى.

 بۇل تۋرالى «قازاقستان» تەلەراديوكورپوراتسياسىنىڭ باسشىسى ەرلان قارين فەيسبۋكتەگى پاراقشاسىندا جازدى، دەپ حابارلايدى قازاقپارات ءتىلشىسى.

«ۇلتتىق ارنانىڭ بيىلعى ەڭ ۇلكەن جوبالارىنىڭ ءبىرى - «كەيكى مەرگەن» تاريحي- درامالىق تەلەحيكاياسىنىڭ ءتۇسىرىلىمى باستالىپ كەتتى. تەلەحيكايانىڭ باستى كەيىپكەرى - كەيكى مەرگەندى ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ اكتەرى دارحان سۇلەيمەنوۆ سومدايدى» ، - دەپ جازدى ەرلان قارين.

ونىڭ جازۋىنشا، تەلەحيكايانىڭ سەناريىن سەرجان زاكىر ۇلى جازعان، كەڭەسشىلەرى - تاريحشى بەرىك ءابدىعالي ۇلى مەن ولكەتانۋشى ءشوپتىباي ءبايدىلدين، رەجيسسەرى - مۇرات بيدوسوۆ. ستسەناريدىڭ سوڭعى نۇسقاسى جازۋشى، دراماتۋرگ، دۋلات يسابەكوۆتىڭ الدىنان ءوتىپ، ۇلتتىق ارنانىڭ ساراپشىلار كەڭەسىندە تالقىلانعان.

بۇعان دەيىن، ول «قازاقستان» تەلەراديوكورپوراتسياسى جانىنان قۇرىلعان كوركەم تەلەحيكايالاردى ىرىكتەۋ جونىندەگى ساراپشىلار كەڭەسى كەيكى باتىر تۋرالى تۋىندى يدەياسىن ماقۇلداعانىن ايتقان بولاتىن.

 كەيكى (نۇرماعانبەت) كوكەمباي ۇلى (1871-1923) - 1916 -جىلعى تورعايدا بولعان ۇلت- ازاتتىق كوتەرىلىسىنىڭ باتىرى، اتاقتى مەرگەن. ورتا ءجۇز قۇرامىنداعى قىپشاق تايپاسىنىڭ قۇلان قىپشاق رۋىنان شىققان. قوستاناي وبلىسى امانكەلدى اۋدانىنىڭ بايتۋما قوپاسىندا دۇنيەگە كەلگەن. جاستايىنان اڭشى، مەرگەندىگىمەن، وجەتتىگىمەن ايماققا تانىلعان. ونىڭ قۇرالايدى كوزگە اتقان مەرگەندىگىنە ساي ەل اۋىزىندا «امانگەلدىنىڭ كوزى مەرگەن، كەيكىنىڭ قولى مەرگەن» دەگەن سيپاتتاما ساقتالعان.

كەيكى باتىردىڭ ادەبيەتتەگى بەينەسى عابيت مۇسىرەپوۆتىڭ «امانگەلدى» پەساسىندا كەتە باتىر بولىپ بەينەلەنەدى. ماقان جۇماعۇلوۆتىڭ «قىران قازاسى قيادا» كىتابىندا جۇمباقتالىپ ايتىلادى. كەيكىنىڭ قاراسوزدە جاسالعان كوركەم بەينەسى اقان نۇرمانوۆتىڭ «قۇلاننىڭ اجالى» اتتى رومانى ەدى. الايدا كەڭەس زامانىندا شىققان وندا دا اتى انىق ايتىلماعان. كەيكى بەينەسى ءوز اتىمەن انىق ايتىلىپ، قانىق بوياۋ دەرەگىمەن تۇگەلدەنىپ شىققان شىعارما سەرىك تۇرعىنبەك ۇلىنىڭ «كەيكى باتىر» تاريحي داستانى (الماتى، ء«بىلىم» ، 2001) .

كەيكى باتىر كوكەمباي ۇلىنىڭ ۇرپاقتارى قوستاناي وبلىسىنىڭ امانگەلدى اۋدانىنداعى اقتاس، تاستى ەلدى مەكەندەرىندە تۇرادى. 1996 -جىلى كەيكى باتىردىڭ 125 -جىل تولۋىنا بايلانىستى اس بەرىلىپ، ەسكەرتكىش ورناتىلدى.