ۇكىمەت سىرتقى قارىزدى قالاي ازايتادى؟

استانا. قازاقپارات - ق ر ۇلتتىق ەكونوميكا ءمينيسترى تيمۋر سۇلەيمەنوۆ قازاقستاننىڭ سىرتقى قارىزى تۋرالى ايتىپ بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، بۇگىندە ەلىمىزدىڭ سىرتقى قارىزى 165 ميلليارد دوللاردى قۇراپ وتىر. اتالعان اقشانىڭ تورتتەن ءبىر بولىگى - مەملەكەتتىك قارىز، ءبىراق ۇلتتىق كومپانيالاردىڭ سىرتتان العان قارجىسى ودان دا كوپ بولىپ تۇر. سوندىقتان جىلدىڭ سوڭىنا دەيىن وسى بەرەشەكتىڭ سوماسىن ەكى پروتسەنتكە ازايتۋ جوسپارلانعان. «كۆازي مەملەكەتتىك سەكتوردىڭ، ياعني ۇلتتىق كومپانيالاردىڭ قارىزى تىم كوپ. ىشكى جالپى ءونىمنىڭ 27 پروتسەنتىن كۆازي مەملەكەتتىك سەكتوردىڭ قارىزى الىپ وتىر. جىلدىڭ اياعىنا دەيىن اتالعان كورسەتكىش 25,1 پروتسەنتكە تۇسەدى دەگەن جوسپار بار. سوسىن بۇگىندە ۇلتتىق كومپانيالار سىرتتان قارىز السا، ول اقشانى نە ءۇشىن الاتىنىن جانە قايدا جۇمسايتىنىن كورسەتۋى كەرەك. ول ءۇشىن ارنايى ۆەدومستۆوارالىق كوميسسياعا ءوتىنىم بەرىلەدى. بارلىق مەملەكەتتىك ورگاندار سىرتتان اقشا الۋ قاجەت پە، جوق پا، سونىڭ ءبارىن ساراپتاپ شىعادى. سونىڭ نەگىزىندە كوميسسيا ءوز شەشىمىن شىعارادى. بۇل - زاڭنىڭ تالابى. بۇدان بولەك، قارجى مينيسترلىگى تىكەلەي باقىلاۋ شارالارىن جۇرگىزىپ وتىرادى. وسىنىڭ ناتيجەسىندە كۆازي مەملەكەتتىك سەكتوردىڭ قارىزى جىلدىڭ سوڭىندا 2 پروتسەنتكە تومەندەيدى دەگەن جوسپارىمىز بار»، - دەدى ت. سۇلەيمەنوۆ حالىققا ەسەپ بەرۋ كەزدەسۋى كەزىندە.

ءمينيستردىڭ سوزىنە قاراعاندا، مەملەكەتتىك قارىزعا ۇكىمەت، ۇلتتىق بانك پەن جەرگىلىكتى اتقارۋشى ورگانداردىڭ بەرەشەگى كىرەدى. «قازىر مەملەكەتتىك قارىزدىڭ كولەمى شامامەن 40 ميلليارد دوللاردى قۇراپ وتىر. نەگىزى، فيسكالدى ساياسات بويىنشا اتالعان سومانى باقىلاۋ قيىن ەمەس. بارلىق ەسەپ-قيساپتار ۋاقىتىندا تاپسىرىلادى»، - دەپ اتاپ كورسەتتى ت. سۇلەيمەنوۆ.

ايتا كەتەيىك، بۇگىنگى كەزدەسۋ كەزىندە مينيستر بايلىققا سالىق سالۋ ماسەلەسىنە قاتىستى ءوز ويىن ايتتى. ونىڭ ايتۋىنشا، جاقىندا كريپتوۆاليۋتا ماسەلەسى ارنايى كەڭەستىڭ تالقىلاۋىنا شىعارىلادى.