باس ەكونوميست قاي ماماندىقتاردىڭ جويىلاتىنىن ايتتى
بۇگىن حالىققا ەسەپ بەرۋ كەزدەسۋى كەزىندە وعان وسى ماسەلەگە قاتىستى ءبىر سۇراق ءتۇستى، دەپ حابارلايدى قازاقپارات ءتىلشىسى.
«بۇل - وتە ماڭىزدى سۇراق. وعان ناقتى جاۋاپ بەرۋ قيىن. دەگەنمەن، ءبىر ماسەلەنى ەسكەرۋ كەرەك. الەمدە ءاربىر مەملەكەتتىڭ دامۋ دەڭگەيى ءارتۇرلى. ماسەلەن، ا ق ش، گەرمانيا، جاپونيا سياقتى ەلدەردە كوپتەگەن وندىرىستىك پروتسەستەردى اۆتوماتتاندىرسا، بىزگە ونداي وزگەرىستەر ءالى جەتكەن جوق. دەمەك، قازاقستان، رەسەي، ورتالىق ازيا ەلدەرىندە جۇمىس ورىندارىنىڭ جاپپاي قىسقارۋ قاۋپى تومەن. سوندىقتان قانداي دا ءبىر فۋتۋريستىك ماتەريالداردى وقىعاندا ونىڭ ءبارىن ەلدەگى ناقتى جاعدايمەن سالىستىرۋ قاجەت-اق»، - دەدى ت. سۇلەيمەنوۆ.
ءمينيستردىڭ ايتۋىنشا، روبوتتار ادام كۇشىن الماستىرسا دا، ادامنىڭ جەكە قاسيەتتەرىن ەشبىر روبوت الماستىرا المايدى. «سوندىقتان كرەاتيۆتى ويلاۋ، شابلونسىز يدەيا تابۋ، مەنەدجەرلىك شەشىم قابىلداۋ سياقتى قارىم-قابىلەتتەردى قاجەت ەتەتىن ماماندىقتار ەشقاشان جويىلمايدى. ەندى، كەيبىر ينجەنەرلەر، قاعازباستى جۇمىسپەن وتىراتىن ەسەپشىلەر مەن زاڭگەرلەرگە سۇرانىس بولمايدى دەيدى. مىسالى، دەبيت پەن كرەديتتى كەلتىرەتىن ەسەپشىلەردى ماشينا الماستىرا الادى دەپ ويلايمىن. ال قارجىلىق ەسەپتى ازىرلەيتىن بۋحالتەرلەر قالاتىن شىعار. سەبەبى وندايدا كاسىبي دايىندىق قاجەت. كومپيۋتەر ونى ىستەي المايدى»، - دەپ اتاپ كورسەتتى ت. سۇلەيمەنوۆ.
ايتا كەتەيىك، بۇگىنگى كەزدەسۋ كەزىندە مينيستر بايلىققا سالىق سالۋ ماسەلەسىنە قاتىستى ءوز ويىن ايتتى. ونىڭ ايتۋىنشا، جاقىندا كريپتوۆاليۋتا ماسەلەسى ارنايى كەڭەستىڭ تالقىلاۋىنا شىعارىلادى.