ستۋدەنتتەر جاتاقحاناسىنا مۇقتاج ءۇش ءوڭىر بەلگىلى بولدى
بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر ءبىلىم جانە عىلىم ۆيتسە-ءمينيسترى بيبىگۇل اسىلوۆا ايتتى، دەپ حابارلايدى قازاقپارات ءتىلشىسى.
«بىرىنشىدەن، ءبىز جوعارى وقۋ ورىندارىمەن، كوللەدجدەرمەن، جەرگىلىكتى اتقارۋشى ورگاندارمەن بىرلەسىپ، جاتاقحانالارداعى قاجەتتى ورىنداردى انىقتادىق. بۇگىنگى كۇنى وڭىرلىك شەكتە الىپ قارايتىن بولساق، الماتىعا 23 مىڭ، استاناعا 17 مىڭ جانە وڭتۇستىك قازاقستان وبلىسىنا 11 مىڭ ادامدىق جاتاقحانا ورنى قاجەت. ەكىنشىدەن، جەرگىلىكتى اتقارۋشى ورگاندارمەن جاتاقحانا سالۋعا ارنالعان جەر تەلىمدەرىن انىقتاۋ جۇمىستارى جۇرگىزىلدى. قازىرگى ۋاقىتتا اكىمدىكتەر وقۋ ورنىنىڭ جانىندا ورنالاسقان جانە ءبىلىم بەرۋ ۇيىمدارىنا تاقاۋ ايماقتان شامامەن 134 جەر ۋچاسكەسىن ءبولدى»، - دەدى ۆيتسە-مينيستر.
ونىڭ ايتۋىنشا، جاتاقحانا سالۋ تەتىكتەرى ازىرلەنگەن. الدىمەن جاتاقحانانىڭ جوباسى ازىرلەنىپ، قر ءبىلىم جانە عىلىم مينيسترلىگىنىڭ قارجى ورتالىعى مەن بانك اراسىندا كەلىسىمشارت جاسالادى. ودان كەيىن جوعارى وقۋ ورنى نەمەسە قۇرىلىسشى كومپانيا بانكتەن زايم الادى.
«جاتاقحانا پايدالانۋعا بەرىلگەننەن كەيىن ول مەملەكەت تاراپىنان وتەماقى تولەمىن الاتىن بولادى. وتەماقى تولەۋدىڭ مەرزىمى شامامەن 8 جىلدى قۇرايدى. 8 جىل بويى مەملەكەت وعان ءبىر توسەك ورىنعا كەتكەن بارلىق ينۆەستيتسيالىق شىعىندارىن وتەيدى. ءبىز بۇل تەتىكتى ەسەپتەپ شىعىپ، قارجى مينيسترلىگىمەن بىرگە بەكىتتىك. جوعارى وقۋ ورىندارىمەن دە تالقىلادىق»، - دەدى ول.
ايتا كەتەيىك، ەلباسى نۇرسۇلتان نازاربايەۆتىڭ 5 الەۋمەتتىك باستاماسى اياسىندا ەلىمىزدىڭ وڭىرلەرىندە ستۋدەنتەرگە ارنالعان 75 مىڭ ورىندىق جاتاقحانا سالىناتىن بولادى.