سايگۇلىكتەر شەرۋى، قىمىز ىشۋدەن سايىس: و ق و- دا قىمىزمۇرىندىق ءوتتى
ۇلتتىق سۋسىن شاراسىنا وبلىس اكىمى جانسەيىت تۇيمەبايەۆ پەن ماسليحات دەپۋتاتتارى، ءوڭىر ارداگەرلەرى مەن زيالى قاۋىم وكىلدەرى، ەتنومادەني ورتالىقتاردىڭ ءتوراعالارى مەن ب ا ق قىزمەتكەرلەرى قاتىستى، دەپ حابارلايدى قازاقپارات ءتىلشىسى.
ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ۇيىمداستىرىلعان شارادا جۇرتشىلىقتىڭ ۇلتتىق مادەنيەت پەن سالت- داستۇرگە قىزىعۋشىلىعى ارتىپ، قازاق حالقىنىڭ ۇلتتىق سۋسىنى - قىمىزدىڭ قۇندىلىعى ناسيحاتتالدى. فەستيۆالدە العاشقى بولىپ ءسوز العان ءوڭىر باسشىسى جانسەيىت تۇيمەبايەۆ ايتۋلى مەرەكەمەن قۇتتىقتاپ، ءداستۇردىڭ ءمان-ماڭىزىنا توقتالدى.
«سالت- ءداستۇرىمىزدى قايتا جاڭعىرتىپ، جاس ۇرپاققا ۇلگى رەتىندە ۇيىمداستىرىلىپ وتىرعان «قىمىزمۇرىندىق» فەستيۆالىنىڭ ورنى وراسان زور. بۇل دەگەنىمىز - ەرتە زامانعى تامىرىمىزعا قايتا ورالۋ. قىمىزمۇرىندىق - بيە بايلاپ، العاشقى قىمىز ءىشۋ تويى جانە ىنتىماقتىڭ، ەڭبەكتىڭ، بىرلىكتىڭ مەرەكەسى. بيە ساۋىلىپ، ونىڭ ءسۇتى قورلانىپ، اشىتىلعان سوڭ، ەكى- ءۇش كۇن بويى جينالعان قىمىزعا اقساقالدار مەن كورشى- قولاڭدار قىمىزمۇرىندىققا شاقىرىلعان. ياعني العاشقى قىمىز ادامدارعا سالتاناتپەن ۇسىنىلىپ، «كوپكە بۇيىرسىن» دەگەن تىلەكپەن بەرىلگەن. قازاقتا سۋسىننىڭ قۇنان قىمىز، دونەن قىمىز، ۋىز قىمىز، جازعى قىمىز، تۇنەمەل قىمىز سياقتى تۇرلەرى بار. بۇلاردىڭ ءارقايسىسىنىڭ دايىندالۋ ءتاسىلى دە ءارتۇرلى. ءداستۇر بويىنشا حالقىمىز بۇل مەرەكەدە «ساۋار كوپ بولسىن!»، «اق مول بولسىن!»، «اۋزىمىزدى اقتان ايىرماسىن» دەپ تىلەك ايتىسقان، ولاي بولسا بۇگىنگى «قىمىزمۇرىندىق» تويى قۇتتى بولسىن!»، - دەدى ايماق باسشىسى.
شارادا وڭىردەگى بارلىق اۋدان، قالالار كيىز ءۇي تىكتى. ونى بەزەندىرىپ، ەتنواۋىل ۇيىمداستىرىپ قوناقتارعا مەرەكەلىك كوڭىل- كۇي سىيلادى. ودان كەيىن قۇلىندى بيە جانە سايگۇلىكتەردىڭ شەرۋى ءوتتى. وندا وبلىستاعى ءاربىر اۋداننان كەلگەن قىمىز باپتاۋشىلار بيەلەرىن قۇلىندارىمەن الىپ شىقتى. ولاردىڭ اراسىندا ۇزدىك دەپ تانىلعان تۇلكىباستىق قىمىز باپتاۋشى جانۇياعا قۇلىندى بيە بەرىلسە، قالعان جۇلدەگەرلەرگە بيە مەن تاي تابىستالدى.
سونداي-اق، فەستيۆال اياسىندا قولونەر شەبەرلەرىنىڭ كورمەسى، ۇلتتىق ات سپورت تۇرلەرىنەن كورىنىستەر مەن قىمىز ىشۋدەن سايىس ۇيىمداستىرىلدى. «مەشكەيلەر سايىسى» دەپ اتالعان بايقاۋعا 14 اۋداننان كەلگەن قىمىز ىشۋشىلەر قاتىسىپ، ءوزارا مىقتىنى انىقتادى. اسا قىزىقتى وتكەن جارىستا 10.5 توستاعان قىمىزدى توقتاماي سىمىرگەن ارىس قالاسى، مونتايتاس اۋىلىنىڭ تۇرعىنى الماس جامانقۇلوۆ جەڭىسكە جەتتى. ەكىنشى ورىن قازىعۇرتتىق تۇرعىنعا بۇيىردى. ءۇشىنشى ورىندى جەرگىلىكتى «ايعاق» تەلەارناسىنىڭ وپەراتورى اعابەك قازانباي يەلەندى. بارلىق جەڭىمپازدار اقشالاي سىيلىقتار الدى.
قولونەرشىلەر بايقاۋىندا تۇركىستاندىق شەبەرلەردىڭ باعى جانسا، سايگۇلىكتەر سايىسىندا شىمكەنت قالاسىنىڭ اتبەگىلەرى جەڭىمپاز بولدى.