ايگىلى «قازاق حاندىعى» سەريالىنىڭ ءتۇسىرىلىمى تۇركىستاندا جالعاسۋدا

استانا. قازاقپارات - وسى كۇندەرى تۇركىستان قالاسىنداعى «ازىرەت سۇلتان»(ياسساۋي) مەملەكەتتىك تاريحي-مادەني قورىق-مۋزەيىندە «قازاق حاندىعى. التىن تاق» اتتى اۋقىمدى كينوجوباسىنىڭ ەكىنشى ماۋسىمى ءتۇسىرىلىپ جاتىر.

ءتۇسىرىلىم توبى «قازاق حاندىعى» سەريالىنىڭ ءتۇسىرىلىم الاڭىنان ەكسكليۋزيۆتى فوتوسۋرەتتەرىمەن ءبولىستى، دەپ حابارلايدى قازاقپارات ءتىلشىسى.

«قۋانىشىمىزعا وراي، تۇركىستانداعى تۇسىرىلىمدەر قاسيەتتى ورازا ايت مەيرامىنا سايكەس كەلدى. ءتۇسىرىلىم الاڭى رەتىندە تۇركىستاندى ادەيى تاڭداپ وتىرمىز. ويتكەنى تۇركىستان قازاقستاننىڭ ەڭ كونە قالالارىنىڭ ءبىرى جانە دەرەكناماسىندا حالقىمىزدىڭ باي تاريحى جاتىر. سول سەبەپتەن دە بۇل قالانىڭ بەينەسى ءبىزدىڭ كارتينامىزدا قالۋى كەرەك» - دەپ كەلتىرەدى فيلمنىڭ رەجيسسەرى رۇستەم ابدىراشەۆتىڭ سوزدەرىن «قازاق فيلم» كينوستۋدياسى.

 

ەكىنشى ماۋسىمنىڭ وقيعا جەلىسى جانىبەك پەن كەرەي حانداردىڭ ءابىلقايىر شايباني ۇرپاقتارىمەن قازاق حاندىعىنىڭ سىعاناقتاعى تاعى ءۇشىن تالاسى اينالاسىندا ءوربيدى. بۇل قازاق حاندىعىنداعى ەڭ ءبىر كۇردەلى كەزەڭدەرىنىڭ ءبىرى.

 

«جانىبەكتى حان كوتەرۋ سالتاناتىن تۇركىستاننىڭ ماڭىندا تۇسىرەمىز. ءدال وسى تۇركىستان ءبىز ءتۇسىرىپ جاتقان تاريحي كەزەڭدەردىڭ شىنايى كۋاگەرى. وكىنىشكە قاراي، قازاق كينەماتوگرافىندا شاكەن ايمانوۆ تۇسىرگەن «الدار كوسەدەن» باسقا ەشقانداي فيلمدە تۇركىستان قالاسى كورسەتىلمەگەن ەكەن. تۇركىستاننان سوڭ تارازداعى قاراحان مەن ايشا ءبيبى كەسەنەسىن دە تۇسىرەمىز» - دەدى باس پروديۋسەر ارمان اسەنوۆ.

 

ەستەرىڭىزگە سالا كەتەيىك، تاريحي كينونىڭ تۇسىرىلىمدەرى الماتى وبلىسىندا مامىردىڭ باسىندا باستالعان. كەيىنىرەك ءتۇسىرىلىم توبى وڭتۇستىك قازاقستان وبلىسى، تۇلكىباس اۋدانىنداعى «ءيىر سۋ» جايلاۋىندا كولەمدى ۇرىس ساحنالارىن ءتۇسىردى.

كوپسەريالى فيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا «Centaurus Rustem Abdrashev production»  ج ش س-نىڭ قاتىسۋىمەن ش. ايمانوۆ اتىنداعى «قازاق فيلم» كينوستۋدياسى تۇسىرۋدە.

فيلمنىڭ قويۋشى- رەجيسسەرى: رۇستەم ابدىراشەۆ

سەناري اۆتورلارى: سماعۇل ەلۋباي، تيمۋر جاقسىلىقوۆ، رۇستەم ابدىراشەۆ

قويۋشى سۋرەتشى: مۇرات ءقارىپوۆ

قويۋشى وپەراتورلارى: ساپار قويشىمانوۆ، الەكساندر پلوتنيكوۆ

كوستيۋم جونىندەگى سۋرەتشى: اجار اۋباكىروۆا

گريم بويىنشا سۋرەتشى: سەرگەي ماۋرين

باس پروديۋسەرى: ارمان اسەنوۆ

كومپوزيتورى: ءابىلقايىر ءابدىراش

رەداكتورى: ەرلان تولەۋتاي

باستى رولدە: قايرات كەمالوۆ، ەركەبۇلان دايىروۆ، دوسحان جولجاقسىنوۆ، يىسبەك ءابىلماجينوۆ، ايان وتەپبەرگەن، مەيىرعات امانگەلدين، نيازبەك شايسۇلتانوۆ، بەكبولات تىلەۋحان، ارمان قوجا، شۇعىلا ساپارعالي، مادينا ەسمانوۆا، عازيزا تىلەۋباي، قارلىعاش مۇحامەدجانوۆا، ىڭكار ءابدىراش، فاريزا ەسكەرمەسوۆا، الىشەر سۇلەيمەنوۆ جانە باسقالار.

فوتوسۋرەتتەر اۆتورى - نيكولاي پوستنيكوۆ