فۋتبولدان ءا چ: مەكسيكا ازۋلى گەرمانيا قۇراماسىن ءسۇرىندىردى
ويىن سەنساتسيالىق ناتيجەمەن اياقتالىپ، مەكسيكا گەرمانيانى 1:0 ەسەبىمەن جەڭدى، دەپ حابارلايدى قازاقپارات ءتىلشىسى.
گەرمانيا 1930 جانە 1950 -جىلدارداعى الەم بىرىنشىلىكتەرىنە عانا قاتىسپاعان بولاتىن. قالعانىنىڭ بارلىعىندا سىنعا ءتۇسىپ كەلەدى. 1954 -جىلى چەمپيون اتاعىنا قول جەتكىزگەن ولار، ودان كەيىن 1974, 1990 جانە 2014 -جىلداردا كۋبوكتى توبەسىنە كوتەردى. كەيىنگى 12 -جىلدان بەرى يواحيم لەۆ باس باپكەرلىك قىزمەتتى اتقارىپ كەلەدى. وعان قوسا ۇلتتىق قۇراما ويىنشىلارى دا ۇزاق جىلدان بەرى بىرگە دوپ تەۋىپ، ءبىر- ءبىرىنىڭ سىرىنا ابدەن قانىققان.
مەكسيكا مۇنداي جەتىستىگىمەن ماقتانا المايدى. بۇعان دەيىن 15 مارتە الەم بىرىنشىلىگىنىڭ فينالدىق كەزەڭىندە سىنعا تۇسكەن مەكسيكالىقتار 1934, 1974 جانە 1982 -جىلى ىرىكتەۋ كەزەڭىندە سۇرىنسە، 1990 -جىلى شەتتەتىلدى.
1938 -جىلى بۇل جارىسقا قاتىسۋدان باس تارتتى. ولار 1994-2014 -جىلدار ارالىعىندا توپتىق كەزەڭنەن ىركىلمەي ءوتىپ، جارىستىڭ 1/8 فينالىندا قارسىلاستارىنا ەسە جىبەرىپ كەلدى. بيىل قالاي بولادى؟ ونى الداعى ۋاقىتتا باعامدايتىن بولامىز. 2018 -جىلعى الەم بىرىنشىلىگىنە ىرىكتەۋ كەزەڭىندە مەكسيكا ءساتتى ويىن كورسەتتى. ءوز توبىندا 21 ۇپايمەن ءبىرىنشى ورىنعا قول جەتكىزدى. ف ي ف ا رەيتينگىندە ولار 15-ورىندا كەلەدى.
2014 -جىلعى الەم بىرىنشىلىگىنەن كەيىن گەرمانيا قۇراماسى ساپىندا ءبىرشاما وزگەرىستەر بولدى. شەبەرلىگى جوعارى فيليپپ لام، باستيان شۆاينشتايگەر، پەر مەرتەزاكەر، لۋكاس پودولسكي جانە ميروسلاۆ كلوزە سىندى مىقتىلار قۇرامامەن قوش ايتىستى. ولاردىڭ ورنىن قورعاۋشى يوزۋا كيمميح، لەروي سانە سىندى دارىندى فۋتبولشىلار باستى. ال مەكسيكا قۇراماسىنىڭ شابۋىلشىسى حاۆەر ەرناندەس وزدەرىنىڭ بيىلعى دوپ دوداسىنداعى باستى ماقساتىن ء«بىز شيرەك فينالعا دەيىن جەتۋدى الدىمىزعا ماقسات ەتىپ قويمايمىز. ودان دا جوعارى تابىستارعا قول جەتكىزۋدى قالايمىز»، - دەدى.
سول حاۆەر ەرناندەس سوزىندە تۇردى. بۇگىن ماتچتىڭ ءبىرىنشى كەزەڭىندە ءوز كومانداسىن ورگە سۇيرەۋگە بار كۇشىن سالدى. ويىننىڭ 35-مينۋتىندا نەمىس قاقپاشىسى مانۋەل نويەرمەن بەتپە- بەت شىعىپ، قاقپادان ساڭىلاۋ تاپتى. ەسەپ 1:0.
مەكسيكالىقتار العا شىقتى. ويىننىڭ كەلەسى كەزەڭىندە نەمىستەر تارازى باسىن تەڭەستىرۋگە بار كۇشىن سالدى. قارسىلاستار قاقپاسى الدىندا قاۋىپتى شابۋىلدار ۇيىمداستىردى. دەگەنمەن ولاردىڭ ەشقايسىسى دىتتەگەن نىساناسىنا جەتكەن جوق. ويىن 1:0 ەسەبىمەن مەكسيكانىڭ پايداسىنا جازىلدى.
فۋتبولدان 2018 -جىلعى الەم چەمپيوناتى اياسىنداعى ويىنداردىڭ تولىق كەستەسىن مىنا جەردەن كورۋگە بولادى.
ءادىلجان ۇمبەت