ەلوردا اكىمدىگى جاڭاشىل، تالانتتى جاستاردى ىزدەۋدە
جالپى TSE گالەرەياسىندا سۋرەتشىلەر عالىم مادانوۆ پەن زاۋرەش تەرەكبايدىڭ «CoolAge» اتتى كورمەسى العاش رەت اشىلىپ وتىر. كەزدەسۋ باستالماس بۇرىن ەرمەك امانشايەۆ سۋرەتشىلەردىڭ ەڭبەكتەرىمەن تانىسىپ شىقتى.
ەركىن پىكىر الماسۋ فورماتىنداعى كەشكە جاس سۋرەتشىلەر، كومپوزيتورلار، ارت-مەنەدجەرلەر، جازۋشىلار، سەناريشىلەر، پروديۋسەرلەر، ديزاينەرلەر مەن باسقا دا شىعارماشىل جاستار قاتىستى.
«مەن سىزدەرمەن ەركىن تۇردە پىكىر الماسۋعا كەلدىم. سىزدەردەن سۇراق، مەنەن جاۋاپ فورماتى كەرەك ەمەس. سوندىقتان سىزدەر يدەيالارىڭىزدى، ويلارىڭىزدى، ۇسىنىستارىڭىزدى ايتىڭىزدار، ەركىن اڭگىمەلەسۋ بولسىن. سىزدەردەي شىعارماشىل جاستارمەن كەزدەسكەندە جاقسى يدەيالار تۋىنداپ، ونى جۇزەگە اسىرۋعا بولادى. مىسالعا ايتايىن، «جاۋجۇرەك مىڭ بالا»، «سكاز و روزوۆوم زايتسە» فيلمدەرى وسىنداي وتىرىستان باستاۋ العان»، - دەدى ەرمەك امانشايەۆ.
جالپى كەزدەسۋدىڭ ماقساتى استانا قالاسىنىڭ ودان ءارى دامۋىنا، وركەندەۋىنە، قالانىڭ بەزەندىرىلۋىنە، عيماراتتارعا ەرەكشە ءار بەرۋگە، تۇرعىندار مەن قوناقتاردىڭ ءومىر سۇرۋىنە جايلى جانە بارىنشا جارقىن ەتۋگە جاڭاشىل، يدەياسى ەرەك جاستاردىڭ ويلارى مەن ۇسىنىستارىن تىڭداپ، بىرلەسىپ جۇمىس جاساۋ.
كەزدەسۋ بارىسىندا ءسوز العان جاستار يدەيالارى مەن ويلارىن ورتاعا سالدى. سونداي يدەيانىڭ ءبىرى، «استانا قانداي سۋىق بولسا، ادامدارى دا سونداي سۋىق» دەگەن ستەرەوتيپتى جويۋ ماقساتىندا قالا تەاترلارى مەن كينوتەاترلارىندا ت. ب سالالارىندا ادامداردىڭ ءبىر- بىرىمەن تانىسۋىنا، ارالاسۋىنا مۇمكىندىك بەرەتىن جوبا. وندا سەانسقا كەلگەن كورەرمەندەرگە مىسالى، «كينو اياقتالعانشا ەكى اداممەن تانىس، ءۇش ادامدى قۇشاقتا» دەگەن سياقتى جەڭىل تاپسىرمالار بەرۋ ارقىلى تانىسۋعا، ارالاسۋعا جەتەلەۋ.
تاعى ءبىر وي «قالا ارحيتەكتۋراسى» دەگەن ءموبيلدى قوسىمشا. ماقساتى - قالاداعى كەز كەلگەن عيماراتتىڭ، كوپىردىڭ، ەسكەرتكىشتىڭ تاعى باسقا نىسانداردىڭ قاي جىلى سالىنعانى، كىم سالعانى، قانداي ستيلدە، قانداي ماتەريالدان دەگەندەي سول نىسان تۋرالى تولىق اقپارات بەرەتىن موبيلدى قوسىمشا.
كەزدەسۋ سوڭىندا قالا اكىمىنىڭ ورىنباسارى جينالعاندارعا بىرنەشە جوبانى جۇزەگە اسىرۋ جولدارىن بىرگە قاراستىرايىق دەگەن ۇسىنىس ايتتى.