كاسىپقوي بوكسقا كەلگەن ءانشى يبراگيم ەسكەندىر كەزەكتى ايقاسىن وتكىزەدى

ماسكەۋ. قازاقپارات - رەسەي استاناسى ماسكەۋ قالاسىندا وتەتىن بوكس كەشى قارساڭىندا قازاقستاندىق سپورتشىلار سالماق ولشەۋ راسىمىنەن ءوتتى، دەپ حابارلايدى قازاقپارات ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسى» پاراقشاسىنا سىلتەمە جاساپ.

اتاپ ايتقاندا، الماتىلىق ەدىل قوجامبەردييەۆ كامەرۋن وكىلى كريستيان سالمانكپەن ايقاسادى. بوكسشىلار ءبىرىنشى اۋىر سالماق ليميتىنىڭ (90,7 كەلى) شەگىنەن اسقان جوق.

بولاشاعىنان ءۇمىت كۇتتىرەتىن ماڭعىستاۋلىق ءۋاليحان «اداي» بيسەنقۇلوۆ (4-0، 4 ك و) 27 جاستاعى فرانسۋزدىق مەكونگو رودريگەسپەن كەزدەسەدى. قوس سپورتشىنىڭ دا سالماعى ءبىرىنشى اۋىر ساناتقا (90,7 كەلى) ساي بولدى.

بەلگىلى ءانشى يبراگيم ەسكەندىر (2-0، 2 ك و) مەن ونىڭ قارسىلاسى - رەسەيلىك دميتري انتيپوۆ تارازىدا ەكىنشى ورتا سالماق ساناتىنا قاجەتتى - 76,2 كەلىنى كورسەتتى.

ءۇش بوكسشىنىڭ بارلىعى جالعاس تۇكەشوۆ باسقاراتىن Tukeshov Boxing Promotions كومپانياسىنىڭ اتىنان شىعۋدا.

بۇعان دەيىن حابارلاعانىمىزداي، وتانداستارىمىز 17- ماۋسىمدا «لوكوموتيۆ» بوكس اكادەمياسىندا (ماسكەۋ، رەسەي) شارشى الاڭعا شىعادى.