شىعىس قازاقستان وبلىسىندا قازاق كۇرەسىنەن الەمدىك گران-پري تۋرنيرى باستالدى

وسكەمەن. قازاقپارات - شىعىس قازاقستان وبلىسىندا قازاق كۇرەسىنەن ىرعىزباي دوسحان ۇلى اتىنداعى 6-حالىقارالىق تۋرنير باستالدى، دەپ حابارلايدى قازاقپارات vksport.kz سايتىنا سىلتەمە جاساپ.

تارباعاتاي اۋدانىنىڭ اقسۋات اۋىلىندا باستالعان دودا الەمدىك گران-پري دەڭگەيىندە وتۋدە. وعان 22 ەلدىڭ بالۋاندارى جينالدى. ولاردىڭ اراسىندا قازاقستان، گەرمانيا، بەلگيا، چەحيا، پولشا، قىتاي، موڭعوليا جانە وزگە دە مەملەكەتتەردىڭ سپورتشىلارى بار. قاتىسۋشىلار 80 كەلىگە دەيىنگى سالماقتا جانە «تۇيە بالۋان» اتالاتىن ابسوليۋتتى سالماق ساناتىندا سىنعا تۇسۋدە.

قازاقشا كۇرەس بىلتىر ازيا ويىندارىنىڭ تىزىمىنە ەنگىزىلگەننەن كەيىن الەمنىڭ ءتۇرلى ەلدەرىندە بۇل سپورت تۇرىنە دەگەن قىزىعۋشىلىق ارتتى. سوندىقتان اتالمىش تۋرنيرگە قاتىسۋعا نيەت بىلدىرگەندەر سانى دا كوبەيگەن. جارىس ەكىنشى جىل قاتارىنان الەمدىك گران- پري دەڭگەيىندە وتۋدە. قازاق كۇرەسىنەن بولەك مۇندا، سونداي-اق ات سپورتىنان تۋرنيرلەر وتۋدە - كوكپار، بايگە جانە الامان بايگەدەن.