پاريج بيلىگى ەيفەل مۇناراسىن تەراكتىلەردەن قورعاۋدىڭ جولىن تاپتى

استانا. قازاقپارات - پاريج بيلىگى ەيفەل مۇناراسىن تەراكتىلەردەن قورعاۋ ءۇشىن اينەك قابىرعامەن قورشاپ شىعۋعا شەشىم قابىلدادى. بۇل تۋرالى BBC حابارلايدى.

پاريج مەرىنىڭ كومەكشىسى جان-فرانسۋا مارتەنستىڭ مالىمدەۋىنشە، اينەكتەن سوعىلاتىن قابىرعالاردىڭ بيىكتىگى ەكى جارىم مەتر بولادى. ولار جىلدىڭ سوڭىنا دەيىن مۇنارانىڭ وڭتۇستىك جانە سولتۇستىك جاعىنان بوي كوتەرەدى.

مونۋمەنتتىڭ باتىسى مەن شىعىسىنا بۇرىن ۋاقىتشا ورناتىلعان مەتال شارباق الىنىپ، ورنىنا بيىكتىگى 3,24 مەتر كەلەتىن تۇراقتى مەتالل شارباق سوعىلادى.

وسى جۇمىستارعا 35 ميلليون ەۋرو قاراجات ءبولۋ جوسپارلانىپ وتىر.

مارتەنستىڭ سوزىنە قاراعاندا، پاريجدە تەرروريستىك قاۋىپ ءالى دە جوعارى. ەيفەل مۇناراسى باستى نىسانالاردىڭ بىرىنە اينالۋى مۇمكىن. ال ءمولدىر قابىرعالار مۇنارانىڭ تۋريستەر اراسىندا تانىمال عيمارات بولىپ قالا بەرۋىنە سەپتىگىن تيگىزەدى.

بولجامدارعا سايكەس، 2018-جىلدىڭ وزىندە پاريج سيمۆولىن تاماشالاۋعا جەتى ميلليوننان استام تۋريست كەلەدى.