اراب ۋنيۆەرسيتەتى الداعى وقۋ جىلىنان باستاپ قازاق ءتىلىن وقىتادى

 استانا. قازاقپارات - كاير ۋنيۆەرسيتەتى ءبىلىم بەرۋ باعدارلاماسىنا قازاق ءتىلىن الداعى وقۋ جىلىندا ەنگىزەدى. بۇل ورايدا وقۋ ورنىنىڭ رەكتورى ادەبيەت فاكۋلتەتىنە 2018-2019- وقۋ جىلىنان باستاپ قازاق ءتىلىن ەنگىزۋ تۋرالى باستامانى كوتەرگەن قازاقستان ەلشىلىگىنە العىس ايتتى.

بۇل تۋرالى سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ Stan.kz اقپاراتتىق اگەنتتىگى حابارلايدى.

بۇدان وزگە، جاڭا وقۋ جىلىنان باستاپ قازاقستان ەگيپەت ازاماتتارى ءۇشىن 18 گرانت بولەدى. بۇعان دەيىن كاير ۋنيۆەريستەتى قازاقستاننىڭ بىرنەشە وقۋ ورنىمەن سەرىكتەس بولۋ تۋرالى كەلىسىمگە قول قويعان بولاتىن.

ايتا كەتەيىك، كاير ۋنيۆەرسيتەتى الەمدىك رەيتينگتە جوعارى ورىندا تۇرعان وقۋ ورىندارىنىڭ ءبىرى. ونىڭ نەگىزى 1908-جىلى قالانعان. ول تاياۋ شىعىستاعى ەڭ ءىرى ەكىنشى ۋنيۆەرسيتەت.

كاير ۋنيۆەرسيتەتى تۇلەكتەرىنىڭ اراسىندا نوبەل سىيلىعىنىڭ لاۋرەاتى، جازۋشى ناگيب ماحفۋز، ساياسي قايراتكەرلەر ياسير ارافات، موحاممەد ەل-بارادەي جانە تاعى دا باسقا الەمگە ايگىلى عالىمدار بار.