اتادان بالاعا: الماتىدا اۋلەتىمەن دارىگەرلىكتى سەرىك ەتكەن وتباسى تۇرادى

None
None
 استانا. قازاقپارات - الماتىدا اۋلەتىمەن دارىگەرلىكتى سەرىك ەتكەن وتباسى تۇرادى قازاقستانننىڭ «التىن سكالپەلى» اتاعىنىڭ يەگەرى ابايدۋللا جاپاروۆتىڭ جولىن ۇلى سۋحراب جالعاستىرۋدا. ەكەۋىنىڭ جۇمىس ءوتىلىن قوسسا، الپىس جىلدان اسادى، دەپ حابارلايدى KTK.

ابايدۋللا جاپاروۆتىڭ دەمالىستى ۇمىتقانىنا قىرىق جىلدان اسقان. دارىگەر-ورديناتور كۇنىنە بىرنەشە وتا جاسايدى. ءوزى ءنومىرى 5- قالالىق كلينيكالىق اۋرۋحانانىڭ جاق-بەت حيرۋرگياسى ءبولىمىنىڭ مەڭگەرۋشىسى. ونىڭ جۇمىس كۇنى ناۋقاستاردى قاراۋدان باستالادى.

سانالى ءومىرىن ادام ەمدەۋگە ارناعان ماماننىڭ بۇگىندە جەتكەن جەتىستىگى از ەمەس. قازاقستاننىڭ «التىن سكالپەلى» 50 گە تارتا عىلىمي جۇمىستار جازعان. ەڭبەگى ءۇشىن كوپتەگەن مەدالدار دا توسىنە تاعىلدى.

«وسى ماماندىقتى تاڭداعانىما وكىنبەيمىن. بالا كۇنىمدە ساۋلەتشى بولعىم كەلگەن. ءبىراق تاعدىردىڭ ءوزى مەنى وسى جولعا اكەلدى. ادامدا بەيىم، ىقىلىس بولماسا، دارىگەرلىكتى سۇيمەسە ودان جاقسى مامان شىقپايدى»، - دەيدى الماتى قالالىق 5№ كلينيكالىق اۋرۋحاناسى جاق-بەت حيرۋرگيا ءبولىمىنىڭ مەڭگەرۋشىسى ابايدۋللا جاپاروۆ.

ابايدۋللا جاپاروۆتىڭ جۇبايى دا ستاموتولوگ. ولاردىڭ وسى ماماندىققا دەگەن ماحابباتى تۇڭعىشتارىنا بەرىلىپتى. ۇلدارى سۋحراب تا اكە جولىن قۋىپ مەديتسينالىق ۋنيۆەرسيتەتكە تۇسكەن.

«اكەم دە دارىگەر، انام دا دارىگەر. اينالامداعىلاردىڭ باسىم بولىگى - دارىگەرلەر. ۇنەمى ەستيتىن اڭگىمەم مەديتسينا، ناۋقاستار جونىندە. سوندىقتان باسقا ماماندىق تۋرالى ويلاماپپىن دا»، - دەيدى حيرۋرگ سۋحراب جاپاروۆ.

اكەسى مەن ۇلىنا كۇنىنە كوپتەگەن ادامدار بەتتەگى ىسىك، جاق سۇيەك ماسەلەسى، تۋا بىتكەن اقاۋلىقپەن كەلەدى. بەت الپەتىن وزگەرتۋ ءۇشىن دە وسى ماماندىق يەلەرىنە جۇگىنەدى. ادامدارعا جاقسىلىق جاساۋدى جانىمىز سۇيەدى دەگەن جاپاروۆتاردىڭ اۋلەتىندە تاعى ءبىر بولاشاق دارىگەر ءوسىپ كەلەدى.

«ماعان اتام مەن اجەمنىڭ، اكەمنىڭ جۇمىسى ۇنايدى. ولار ادامداردى ەمدەيدى. تيىسىنشە ولارعا كوپ العىس ايتىپ جاتادى. ءوزىم دە جاقسى دارىگەر بولعىم كەلەدى»، - دەيدى ا. جاپاروۆتىڭ نەمەرەسى يسيدا جاپاروۆا.

ءار جىل سايىن بۇل اۋلەت وزدەرىنىڭ كاسىبي مەرەكەسىن وتباسىمەن بىرگە وتكىزەدى. بيىل دا سولاي. ابايدۋللا جاپاروۆتىڭ ۇرپاعى مەن كاسىبىن جالعاۋشىلارعا ءالى ايتارى كوپ.

سوڭعى جاڭالىقتار