قازاقستان مەن قىتاي بىرلەسىپ تۇسىرگەن « سازگەر» فيلمى ەكى ەلدە ءبىر ۋاقىتتا تاراتىلادى - شەتەلدەگى قازاق ءتىلدى ب ا ق- قا شولۋ
***
شىڭعىس ايتماتوۆ ەسكە الىندى- TRT
الەمگە ايگىلى قىرعىز جازۋشى شىڭعىس ايتماتوۆ قايتىس بولۋىنا 10 جىل تولۋىنا وراي قىرعىزستاننىڭ استاناسى بىشكەكتە ەسكە الىندى. بۇل تۋرالى تۇركيا تەلە-راديو پورتالى حابارلادى.
ەسكە الۋ راسىمىنە قىرعىزستان پرەمەر-ءمينيسترى مۇحاممەدقالي ابىلعازيەۆ، پرەمەر-ءمينيستردىڭ ورىنباسارلارى، جازۋشىنىڭ تۋعاندارى مەن وقىرماندارى قاتىستى. ولار اتا بەيىت مەموريالدىق كەشەنىندەگى جازۋشىنىڭ قابىرىنە گۇل شوقتارىن قويىپ، قۇران كارىم وقىدى.
«شىڭعىس ايتماتوۆ ءوزىنىڭ الەمدى تامساندىرعان ۇزدىك، باعا جەتپەس تۋىندىلارى ارقىلى تەك قىرعىز حالقىنىڭ عانا ەمەس، بۇكىل تۇركى حالىقتارىنىڭ ادەبيەتىن بيىك بەلەسكە كوتەرە ءبىلدى»، - دەيدى قىرعىزستان جازۋشىلار وداعى ءتوراعاسى اقبار رىسقۋلوۆ.
***
قىتايدا قوزعالاتىن جاساندى مويىن ومىرتقاسىن 3D ارقىلى باسىپ شىعاردى - «جەنمين جيباو» (People Daily)
قىتايلىق ماماندار 3D تەحنيكاسى ارقىلى قوزعالاتىن جاساندى مويىن ومىرتقاسىن باسىپ شىعاردى. بۇل تۋرالى «جەنمين جيباو» باسىلىمى جازادى.
شي-ان قاتىناس ۋنيۆەرسيتەتىندەگى حى شىجيڭ پروفەسسور باستاعان زەرتتەۋ ۇجىمى «بەل ومىرتقا مەن جۇلىن اق زاتىنىڭ فۋنكتسياسىن 3D تەحنيكاسى بويىنشا قايتا قالپىنا كەلتىرۋدى كلينيكادا قولدانۋ» اتتى جوبانى ءساتتى ورىندادى.
اتاپ ايتقاندا، مەتالل ارقىلى 3D تەحنيكاسى بويىنشا باسىپ شىعارۋمەن ۇشتاستىرا وتىرىپ، قوزعالا الاتىن جاساندى مويىن ومىرتقاسى شىعاردى. بۇل، مويىن ومىرتقاسىنا وتا جاسالعاننان كەيىن قوزعالىسقا ىڭعايلى.
دەرەككوزدىڭ مالىمەتىنشە، تيتاندى بۇعاۋ مەن تيتاندى تاقتانى ورنىقتىرۋ وتاسى بۇگىنگى تاڭدا دۇنيە جۇزىندە كلينيكادا كەڭىنەن پايدالانىلاتىن وپەراتسيالىق ءادىس. ال، بۇل جاڭا قولدانىسقا ەنگىزىلگەن تيتاندى دوعاشىق بۇعاۋدى 3D تەحنيكاسى بويىنشا باسىپ شىعارۋ ءادىسى ءداستۇرلى تيتاندى بۇعاۋعا قاراعاندا ىڭعايلى، مويىن بۇعاناسىنا ءدال ۇيلەسەتىن اناتوميالىق ەرەكشەلىگى دە بار. سونىمەن بىرگە، تيتاندى بۇعاۋ مەن ومىرتقانىڭ جاناسۋ اۋماعىن ارتتىرىپ، ۇزاق ۋاقىتقا ورنىقتى بولادى.
***
مەن قازاقستان تاجىريبەسىن ۇنەمى نازاردا ۇستاپ وتىرامىن - مونعوليا پرەزيدەنتى
مونعوليا پرەزيدەنتى حالتمااگين باتتۋلگا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆپەن كەزدەستى، دەپ حابارلايدى موڭعوليانىڭ KAZNEWS اقپاراتتىق پورتالى.
ەڭ اۋەلى موڭعوليا پرەزيدەنتى حالتمااگين باتتۋلگا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتى الداعى كەلە جاتقان تۋعان كۇنىمەن قۇتتىقتادى. سونىمەن قاتار ول، ەلباسىعا قازاقستان تاجىريبەسىن ۇنەمى نازاردا ۇستاپ وتىراتىنىن جەتكىزدى.
«مەن ءسىزدىڭ جۇمىسىڭىزدى مۇقيات باقىلاپ وتىرامىن جانە جاڭا ەلوردا - استانا قالاسىن سالعانىڭىزدى بىلەمىن. مەن مونعوليانىڭ قۇرىلىس ءمينيسترى بولعان كەزدە دە قازاقستان تاجىريبەسىن زەرتتەگەنمىن. بىزدە استانامىز ۋلاانبااتاردىڭ توڭىرەگىندە مايدار قالاسىن سالۋ مۇمكىندىگىن قاراستىرىپ جاتىرمىز»، - دەيدى مونعوليا پرەزيدەنتى.
قازاقستان رەسپۋبليكاسىنىڭ پرەزيدەنتى قازاقستان حالقىنىڭ جانە جەكە ءوزىنىڭ اتىنان حالتمااگين باتتۋلگانى پرەزيدەنتتىك سايلاۋداعى جەڭىسىمەن قۇتتىقتاپ، قازاقستان تاراپىنىڭ بارلىق باعىت بويىنشا ىنتىماقتاستىقتى دامىتۋعا دايىن ەكەنىن ايتتى.
«بيىل قازاقستان رەسپۋبليكاسى مەن موڭعوليا اراسىنداعى دوستىق قارىم-قاتىناستار جانە ىنتىماقتاستىق جونىندەگى شارتقا قول قويىلعانىنا 25 جىل تولادى. بۇل قۇجات كوپ عاسىرلىق دوستىق جانە تاتۋ كورشىلىك ءداستۇرى بار ەلدەرىمىز اراسىنداعى ىنتىماقتاستىقتى دايەكتى دامىتۋ جولىندا ماڭىزدى ءرول اتقارادى»، - دەپ اتاپ ءوتتى قازاقستان پرەزيدەنتى.
قازاقستان مەن قىتاي بىرلەسىپ تۇسىرگەن « سازگەر» فيلمى ەكى ەلدە ءبىر ۋاقىتتا تاراتىلادى - «جەنمين جيباو» (People Daily)
قازاقستان مەن قىتاي تۇڭعىش رەت بىرلەسىپ تۇسىرگەن « سازگەر» فيلمى جىل سوڭىنا قاراي ەكى ەلدە ءبىر مەزگىلدە كورەرمەندەرگە جول تارتپاق. بۇل تۋرالى قازاقستاننىڭ مادەنيەت جانە سپورت ءمينيسترى ارىستانبەك مۇحامەدي ۇلى قىتايلىق ب ا ق- قا بەرگەن سۇحباتىندا مالىمدەگەن.
فيلمگە قوس كومپوزيتور باقىتجان بايقاداموۆ پەن سي سينحايدىڭ دوستىعى ارقاۋ ەتىپ الىنعانى بەلگىلى. ياعني، ومىردە بولعان وقيعانىڭ ىزىمەن تۇسىرىلگەن. سي سينحاي - قىتاي حالىق رەسپۋبليكاسىنىڭ حالىق كومپوزيتورى اتاعىنا يە بولعان، قىسقا عۇمىرىندا 300 دەن اسا شىعارما تۋدىرعان دارا تالانت يەسى. ەكىنشى دۇنيەجۇزىلىك سوعىس كەزىندە ساياسي قۋعىن-سۇرگىن كورگەن ول ءومىرىنىڭ سوڭعى جىلدارىن قازاقستاندا وتكىزگەن. قازاقتىڭ كورنەكتى كومپوزيتورى باقىتجان بايقاداموۆپەن دوس بولعان.
« سازگەر» فيلمىنىڭ كورەرمەندەرگە جول تارتۋى قازاقستان مەن قىتايدىڭ مادەني قارىم-قاتىناسىن جاڭا دەڭگەيگە كوتەرمەك. شىعارما دا جۇرتشىلىققا سوناۋ قيىن-قىستاۋ كەزدەردەگى، ادامدار ورتاسىنداعى دوستىق پەن سەنىمدىلىك مەملەكەت شەكاراسىمەن شەكتەلىپ قالماستان، ءبىر-بىرىنە كومەك قولىن سوزىپ قيىنشىلىقتان بىرگە وتكەنىن باياندالادى»، - دەيدى ارىستانبەك مۇحامەدي ۇلى.
سونىمەن بىرگە مينيستر اتالعان تۋىندىنىڭ تاعى ءبىر ەرەكشەلىگى باقىتجان بايقاداموۆ پەن سي سينحايدىڭ دوستىعى ارقىلى، سول زامانداعى قاراپايىم حالىقتىڭ ءبىر- بىرىنە دەگەن ىستىق ىقلاسىن، شىنايى بەت-بەينەسىن كورۋگە بولاتىندىعىن اتاپ وتكەن.
***
تۇلپارلار مەكەن موڭعۇلكۇرەدە ات سپورتى قارقىندى دامىپ كەلەدى- تيان-شان پورتالى
شىنجاڭنىڭ ىلە وبلىسىنا قاراستى موڭعۇلكۇرە اۋدانىندا ات سپورتى قارقىندى دامىپ كەلەدى، دەپ حابارلايدى تيان-شان اقپاراتتىق پورتالى.
ەجەلدەن تۇلپارلار مەكەنى اتالعان بۇل جەردە 100 مىڭنان استام جىلقى تۇلىگى بار.
«ات سپورتى - موڭعۇلكۇرە اۋدانىنىڭ وڭىرلىك تۋريزم سالاسىن دامىتۋدا ەرەكشە ءرول اتقارىپ كەلەدى. جىل باسىنان بەرى اۋداندا 80 نەن استام جوعارى دەڭگەيدەگى ات بايگەسى وتكىزىلىپ، ەل ءىشى-سىرتىنان كەلگەن تۋريستەردىڭ ىستىق ىقلاسىنا بولەندى»، دەپ جازادى دەرەككوز.
اۆتور: ريزابەك نۇسىپبەك ۇلى