جەتىسۋلىقتار مەشىتكە اقىسىز قىزمەت ەتىپ جۇرگەن جانعا كولىك مىنگىزدى

تالدىقورعان. قازاقپارات - قاسيەتتى ورازا ايت مەرەكەسىندە جەتىسۋ جۇرتشىلىعى تالدىقورعاندا مەشىتتى اقىسىز-پۇلسىز تازالاپ، 30 كۇن ورازادا اس دايىنداپ، مەشىتتە وقىپ جاتقان 50 دەن اسا قۇران جاتتاۋشى قاريلارعا 3 ۋاقىت اس ازىرلەيتىن اناعا كولىك مىنگىزدى.

تەمىر تۇلپار قادىر تۇنىندە ساداقا رەتىندە جينالعان قارجىعا ساتىپ الىنعان، دەپ حابارلايدى قازاقپارات ءتىلشىسى.

قۇنى 700 مىڭ تەڭگە تۇراتىن كولىكتىڭ كىلتى زەمفيرا نۇرالبەكوۆاعا كوپشىلىك الدىندا تابىس ەتىلدى. اۋماعى 4 جارىم مىڭ شارشى مەترلىك مەشىت عيماراتىن ءبىراز ۋاقىتتان بەرى اقىسىز-پۇلسىز تازالاپ، وعان قوسا وسى رامازان ايىندا اسپازدىڭ قىزمەتىن اتقارىپ، تاراۋىق وقىعان قاريلار مەن مەشىتتە جاتىپ ءبىلىم الاتىن شاكىرتتەردىڭ اس-سۋىن قامداپ، ساۋابىن العان جانعا كولىك مىنگىزۋ تۋرالى يدەيانى جاس قاريلار كوتەرىپتى. قادىر تۇنىندە وزدەرىنىڭ قىزمەتىنە دەپ جۇرت جينايتىن ساداقانى تۇگەلىمەن بەرەمىز دەپ ۋاعدالاسقان. ولاردىڭ باستاماسىن يمامدار قولداعان. مەشىتتىڭ تۇراقتى جاماعاتى دا ساۋاپتى ىسكە ورتاقتاسىپ، قولدارىنان كەلگەنىنشە جاردەمدەسكەن.

حالىقتىڭ رازىلىعىنا بولەنگەن زەمفيرا نۇرالبەكوۆانىڭ وتباسى تالدىقورعاننىڭ شەتىندەگى اۋىلدا تۇرادى ەكەن. وتاعاسى ەكەۋى 3 بالا تاربيەلەپ وتىرعان انا ەندى قوعامدىق كولىكپەن ەمەس، ءوزىنىڭ جەكە كولىگىمەن مەشىتكە قاتىنايتىن بولادى.