قازاقستان پرەزيدەنتىنىڭ تاتارستانعا ساپارى جاڭا جوبالارعا باستاما بولدى

قازان. قازاقپارات - قازاقستان پرەزيدەنتىنىڭ تاتارستانعا ساپارى تىعىز بايلانىستاردى نىعايتا ءتۇسىپ، جاڭا جوبالاردىڭ ىسكە اسىرىلۋىنا مۇرىندىق بولادى، دەيدى قازان فەدەرالدىق ۋنيۆەرسيتەتى وپتيكا جانە نانوفوتونيكا كافەدراسىنىڭ دوتسەنتى سەرگەي حارينسەۆ «قازاقپارات» ح ا ا تىلشىسىنە بەرگەن سۇحباتىندا.

ونىڭ ايتۋىنشا، ۋنيۆەرسيتەت ورگانيكالىق تەرموفوتوۆولتايكانى زەرتتەۋ سالاسىندا نازاربايەۆ ۋنيۆەرسيتەتىمەن ىنتىماقتاستىق جاساپ كەلەدى.

«نازاربايەۆ ۋنيۆەرسيتەتىمەن ىنتىماقتاستىق ورناتقانىمىزعا 4 جىلدان استى. وندا ورگانيكالىق كۇن ەلەمەنتتەرىن سينتەزدەۋمەن اينالىساتىن زەرتتەۋشىلەر توبى بار. بۇگىنگى تاڭدا كۇن ەنەرگياسىن ەلەكتر توگىنا اينالدىراتىن پوليمەرلەر بار. جاقىن بولاشاقتا ادامدار ورگانيكالىق كۇن باتارەيالارىمەن ۇيلەردى، كيىمدەردى بوياپ، ورگانيكالىق تەرموفوتوۆولتايكا تەحنولوگيالارىنىڭ كومەگىمەن ەلەكتر توگىن ال باستايدى»، - دەيدى ول.

 

س. حارينسەۆ كۇن باتارەيالارى وتە ارزان تۇراتىنىن ايتادى.

«الەم جىلدام وزگەرىپ جاتىر. ماسەلەن، 15 جىل بۇرىن ورگانيكالىق كۇن ەلەمەنتتەرىنىڭ تيىمدىلىگى نەبارى %2 بولسا، قازىر بۇل كورسەتكىش %15 عا جەتىپ وتىر.

تيىمدىلىك %17-18 بولعان جاعدايدا كوممەرتسيالىق بەتبۇرىس بولادى. سوندىقتان بارلىق ەلدەر وسى تەحنولوگيالارعا كۇش سالىپ جاتىر»، - دەيدى عالىم.

«ءبىز دە وسى سالادا قازاقستانمەن ىنتىماقتاستىق جاساپ كەلەمىز. نازاربايەۆ ۋنيۆەرسيتەتىنىڭ عالىمدارىمەن بىرگە ەكولوگيالىق ەنەرگەتيكا سالاسىنداعى جاھاندىق ماسەلەنى شەشىم ۇستىندەمىز»، - دەيدى س. حارينسەۆ.

 

ول قازاقستان پرەزيدەنتىنىڭ تاتارستانعا ساپارى تۋرالى ايتتى.

«مەنىڭشە، قازاقستان پرەزيدەنتىنىڭ تاتارستانعا ساپارى رەسپۋبليكالارىمىز جانە ەكى ەل جوعارى وقۋ ورىندارى اراسىنداعى تىعىز بايلانىستاردى دامىتادى دەپ ويلايمىن. تەك تەرمو فوتوۆولتايكا سالاسىندا عانا ەمەس، سونىمەن قاتار فيزيكا مەن ينجينيرينگ سالالارىنىڭ باسقا باعىتتارى بويىنشا دا ءىرى جوبالاردى ىسكە اسىرۋعا مۇرىندىق بولادى»، - دەيدى ق ف ۋ دوتسەنتى.