بۇگىن «ەگەمەن اكادەمياسىنىڭ» ءبىرىنشى ماۋسىمى ءساتتى اياقتالدى
جوباعا قاتىسۋعا 100 دەن استام ستۋدەنت نيەت ءبىلدىردى. دەگەنمەن، ولاردىڭ ىشىنەن 40 قا جۋىق ستۋدەنت ىرىكتەۋ كەزەڭىنەن ءوتتى.
اكادەمياعا ە ۇ ۋ جۋرناليستيكا جانە ساياساتتانۋ فاكۋلتەتىنىڭ ستۋدەنتتەرى مەن مەكتەپ وقۋشىلارى قاتىستى. سونداي-اق، الەۋمەتتىك جەلى قولدانۋشىلارى ساباقتى ونلاين تىڭداۋعا مۇمكىندىك الدى. قاتىسۋشىلاردىڭ قابىلەتىن شىڭداۋ ءۇشىن دارىستەردىڭ سوڭىندا باسپا ءسوز ومىرىنە ارنالعان كينو تۋىندىلاردى كورۋ، كاسىبي كىتاپتاردى وقۋ جانە بەكىتىلگەن تاقىرىپتار بويىنشا زەرتتەۋ ماقالالارىن جازۋ سەكىلدى تاپسىرمالار بەرىلىپ وتىردى.
العاشقى ءدارىستى «باسپاسوزگە كىرىسپە» دەگەن تاقىرىپپەن «ەگەمەن قازاقستان» گازەتىنىڭ باسقارما ءتوراعاسى دارحان قىدىرالى جۇرگىزدى. گازەتتىڭ تاريحى مەن بۇگىنگى قوعامداعى رولىنە توقتالعان گازەت باسشىسى باسپا ءسوزدىڭ ەرەكشەلىكتەرى تۋرالى ايتتى.
دارىسكەرلەر اراسىندا «Egemen Qazaqstan» - نىڭ قىزمەتكەرلەرى، باس رەداكتوردىڭ ورىنباسارى عابيت مۇسىرەپ تاقىرىپ تاڭداۋدىڭ جايىن بايانداسا، مادەنيەت جانە رۋحانيات ءبولىمىنىڭ مەڭگەرۋشىسى تالعات باتىرحان سۇحبات الۋدىڭ سىرىنا توقتالدى. سپورت ءبولىمىنىڭ مەڭگەرۋشىسى ەرمۇحامەد ماۋلەن سپورت تاقىرىبىن جازۋ ەرەكشەلىگىن تۇسىندىرسە، SEO مامانى ەربول سەرىكباي ونلاين باسپا ءسوزدىڭ ينتەرنەتتەگى تانىمالدىعىن ارتتىرۋ قۇپيالارىمەن ءبولىستى.
ماۋسىمدى قورىتىندىلاعان گازەت باسشىسى، «ەگەمەن اكادەمياسى» جوباسىنىڭ اۆتورى دارحان ءقىدىرالى دارىسكە بەلسەنە قاتىسىپ، قىراعىلىعىمەن كوزگە تۇسكەن ستۋدەنتتەردى اكادەميانىڭ سەرتيفيكاتىمەن ماراپاتتادى. «ەگەمەن اكادەمياسىنىڭ» العاشقى ماۋسىمى ويداعىداي ءوتتى. قاتىسۋشىلار مەن مەدياقاۋىم تاراپىنان ۇلكەن قولداۋ تاپتىق. ءاربىر ءدارىس پەن تاقىرىپ تىڭعىلىقتى تالقىلاۋدان كەيىن انىقتالىپ، ستۋدەنتتەردىڭ تاجىريبەلىك ءبىلىمىن ارتتىرۋعا مەيلىنشە جاعداي جاساۋعا تىرىستىق. جوبا بۇدان ءارى دە جالعاسا بەرمەك»، - دەدى د. قىدىرالى.
اكادەميا قاتىسۋشىلارىنا اقپارات جانە كوممۋنيكاتسيالار ءمينيسترى داۋرەن ابايەۆ «سيفرلىق داۋىرگە قادام» تاقىرىبىندا ءدارىس وقىسا، «قازاقپارات» ح ا ا باس ديرەكتورى اسقار ۋماروۆ اقپارات اگەنتتىگىنىڭ جۇمىس ءتارتىبى تۋرالى ايتتى. ال فيلولوگيا عىلىمدارىنىڭ دوكتورى، پروفەسسور ءادىل احمەتوۆ جۋرناليستەردىڭ ءبىر سالاعا ماماندانۋىنا توقتالدى. جوبا اياسىندا بولاشاق جۋرناليستەر «Egemen Qazaqstan» گازەتى باسىلىپ شىعاتىن «ەرنۇر» مەديا حولدينگىنىڭ تيپوگرافياسىنا بارىپ، سەحتىڭ جۇمىسىمەن تانىستى.
جوباعا قاتىسۋشى ە ۇ ۋ- دىڭ 1-كۋرس ستۋدەنتى ابزال ورىنباساروۆ «ەگەمەن اكادەميادان» ۇيرەنگەنى كوپ ەكەنىن ايتتى. «ەڭ باستىسى بولاشاق جۋرناليستىڭ قانداي تالاپتارعا ساي بولۋى قاجەت ەكەنىن، جاڭالىقتاردىڭ رەتتىلىگى مەن بىرىزدىلىگىن، تاقىرىپ قويۋ ماسەلەسىن جان- جاقتى تالقىلادىق. ال ءدارىس وقىعان اعالارىمىزدىڭ اراسىندا اقپارات جانە كوممۋنيكاتسيالار ءمينيسترى داۋرەن ابايەۆتىڭ اڭگىمەسى قاتتى ۇنادى. سيفرلىق كەزەڭگە قادام باسقان قازاقستاننىڭ باعىت- باعدارىن جان- جاقتى ءتۇسىندىرىپ بەردى»، - دەدى ابزال. «اكادەميانىڭ ارقاسىندا ءوز سالاما قاتىستى تىڭ اقپاراتتارعا قانىق بولدىم.
«Egemen Qazaqstan» - نىڭ مۇنداي باستاماسى جاستاردىڭ تالانتىن شىڭداي تۇسۋىنە سەپتىگىن تيگىزەتىنىنە سەنىمدىمىن. ۋنيۆەرسيتەتتەگى ءبىلىمىمىزدى باس باسىلىم عيماراتىنا كەلىپ شىڭداي تۇستىك»، - دەدى ميراجان ماحان.