ءومىرزاق شوكەيەۆ: ەكسپورت نارىعىنداعى باسەكە كۇردەلەنىپ بارادى
بۇل تۋرالى حالىققا ەسەپ بەرۋ كەزدەسۋىندە ق ر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ءمالىم ەتتى، دەپ حابارلايدى قازاقپارات ءتىلشىسى.
«سوڭعى ۋاقىتتا نارىقتاعى جاعداي ەداۋىر وزگەرىپ كەتتى. باسەكە قىزا ءتۇستى. شارۋاشىلىقتار بۇرىن وندىرگەن ءونىمىن وتكىزە الار ەمەس. وسى تۇرعىدان ءبىز «ءونىمدى كوبەيتىڭدەر» دەپ قىسا تۇسەمىز دە، ال وتكىزۋ، سۇرانىس، ساپا، ەكسپورتتىق نارىققا شىعۋ تەتىگى بورتتان تىس قالىپ قالدى»، - دەيدى مينيستر.
شوكەيەۆتىڭ ايتۋىنشا، ءبىزدىڭ ەلىمىزدىڭ اينالاسىندا دا جاعداي تۇبەگەيلى وزگەرىسكە ۇشىراپ بارا جاتىر. رەسەيدە قازىر ءتۇسىم جاقسى. ونداعى نارىقتاعى باعا ايتارلىقتاي ءتۇسىپ كەتكەن.
«بۇل البەتتە قازاقستاندىق بيدايدىڭ باعاسىنا دا اسەر ەتتى. سوندىقتان، وتكەن جىلدىڭ جەلتوقسانىندا ءبىزدىڭ ارالاسۋىمىزعا تۋرا كەلدى. الەمدىك باعا بۇل رەتتە قارقىندى بولماسا دا ءوسىپ جاتقانىمەن، پارادوكس جاعداي - قازاقستانداعى ديقاندار بيدايدى 35-37 مىڭ تەڭگەگە (تونناسىن - اۆت. ) ساتا الماي قالعان ەدى. وسى سەبەپتى، بىزگە بيدايدى شۇعىل ساتىپ الاتىنىمىز تۋرالى جاريالاۋعا، باعانى 42 مىڭ تەڭگەگە بەلگىلەۋگە تۋرا كەلدى. وسىنىڭ ناتيجەسىندە شۋدى توقتاتىپ، نارىقتاعى جاعدايدى قالپىنا كەلتىرىپ، بيدايدىڭ بەلگىلى بولىگىن ساتىپ الدىق»، - دەيدى ول.
مينيستر اتاپ وتكەندەي، بۇگىنگى تاڭدا بيدايدىڭ باعاسى ءوسىپ كەلەدى.
«قازىر ءتىپتى تونناسىن 47 مىڭ تەڭگەگە ساتۋ تۋرالى كەلىسىمشارتتار بار. دەمەك، ءبىز ءبىر جاعىنان شارۋالارعا كومەك قولىن سوزدىق، ەكىنشى جاعىنان كورپوراتسيا ۇتتى. سوندىقتان، ءبىز ونىمدەرىمىزدى وتكىزۋ ماسەلەسىنە ەرەكشە نازار اۋدارا باستادىق. وتىزعا جۋىق ونىمىمىزگە تالداۋ جاسادىق. قازىرگى ىشكى نارىقتاعى جاعداي قانداي؟ وسى ونىمدەردى دامىتۋعا بولا ما؟ ءونىمنىڭ 30 ءتۇرى بويىنشا نارىق قاناعاتتانارلىق جاعدايدا. ىشكى نارىقتا بىزدە تەك ساناۋلى ونىمدەردىڭ تۇرلەرىنە ورىن بار: ولار الما، شۇجىق ونىمدەرى، ىرىمشىك، قانت. سوندىقتان، ءبىزدىڭ ونىمدەرىمىزدىڭ ەكسپورتى ءۇشىن كۇرەسۋىمىز كەرەكتىگى ايقىن. ەكسپورت نارىعىندا كۇرەسۋ ءتىپتى كۇردەلى بولىپ بارادى»، - دەيدى ءومىرزاق شوكەيەۆ.
