يلياس جۇماي قوشقار كوتەرۋدەن رەكورد ورناتتى

الماتى. قازاقپارات - الماتىدا بۇقارالىق سپورتتى دامىتۋعا باعىتتالعان «اسىل مۇرا» باعدارلاماسىنىڭ جاڭا ماۋسىمى باستالدى، دەپ حابارلايدى قازاقپارات ءتىلشىسى.

باعدارلاما قاتىسۋشىلارى قوشقار كوتەرۋ، اسىق اتۋ، باعاناعا ورمەلەۋ، ارقان تارتۋ، گىر كوتەرۋ سپورت تۇرلەرىنەن ءوز كۇشتەرىن سىناپ، باعالى سىيلىقتارعا يە بولدى.

ورازا ايت مەرەكەسىنىڭ ءبىرىنشى كۇنى جينالعان 3 مىڭنان استام ادام ەرەكشە شاراعا كۋا بولدى. جارىسقا قاتىسۋشىلار قوشقار كوتەرۋ سايىسىنا قىزىعۋشىلىق تانىتتى. بارلىعى 3 قوشقار ويناتىلىپ، سونىڭ ءبىرىن ەركىن كۇرەس پالۋانى، ۇلتتىق قۇرامانىڭ مۇشەسى يلياس جۇماي بولدى. ول 40 ك گ سالماقتى قوشقاردى 205 رەت كوتەرىپ وسى جەردە رەكورد ورناتتى.

«وسىنداي جارىسقا ءبىرىنشى رەت قاتىسىپ وتىرمىن. ودان دا كوپ كوتەرۋگە كۇشىم جەتەر ەدى، ءبىراق بارلىعى ءبىراۋىزدان جەڭىستى ماعان بەرگەندىكتەن جالعاستىرۋدىڭ ءمانى بولمادى. ءوزىم ەركىن كۇرەسپەن 8 جاستان بەرى اينالىسىپ كەلەمىن. سوندىقتان بولار، قويدىڭ سالماعى جەڭىل كورىندى»، - دەدى يلياس جۇماي.

 باعدارلاما اياسىندا 16 - ماۋسىم كۇنى مەشىتكە كەلۋشى جاماعات اراسىندا فۋتبول ليگاسى باستالادى. Almaty Arena ستاديونىندا وتەتىن ويىنعا بارشا الاتاۋ اۋدانىنداعى مەشىتتەر جاماعاتى قاتىسا الادى. بۇل جولى ليگانىڭ جالپى جۇلدە قورى 1 ميلليون تەڭگە.

ارايلىم جولداسباي