ايگۇل ۇلكەنبايەۆا: دومبىرانىڭ ۇنىندە ادام جۇرەگىنىڭ ءبىر قىلىنا ءدوپ تيەتىن ەرەكشە قاسيەت بار

استانا. قازاقپارات - ۇلتتىق دومبىرا كۇنىنىڭ بەلگىلەنۋى قازاق حالقىن ەرەكشە قۋانتىپ وتىر. دومبىرا كۇنىنىڭ مەرەكەگە اينالۋى - كونەدەن جەتكەن اسىل قازىنامىزعا، ۇلتتىق مۇرامىزعا بەرىلگەن لايىقتى باعا دەپ بىلەمىز.

 مەرەكە قارساڭىندا قارا دومبىرانىڭ قاسيەتىن كۇي ونەرىمەن 21 - عاسىرعا الىپ كىرگەن كۇيشى، قازاقستاننىڭ ەڭبەك سىڭىرگەن ءارتىسى ايگۇل ۇلكەنبايەۆانى اڭگىمەگە تارتتىق. ايگۇل ناريمان قىزى جاقىندا عانا امىرەلەردىڭ ىزىمەن پاريج تورىندە ونەر كورسەتىپ كەلگەن ەكەن.

- ايگۇل ناريمان قىزى، سۇحباتىمىزدى باستاماس بۇرىن ءوزىڭىزدى ۇلتتىق دومبىرا كۇنىنىڭ بەلگىلەنۋىمەن قۇتتىقتاپ قويۋعا رۇقسات ەتىڭىز.

- راحمەت.

- العاشقى سۇراقتى الماتى قالاسىنداعى «ايگۇل ۇلكەنبايەۆانىڭ مەكتەپ- ستۋدياسىنان» باستاساق. ستۋديادان وسىعان دەيىن قانشا شاكىرت تۇلەپ ۇشتى؟ جالپى، شاكىرتتەرىڭىزدىڭ كوبى ونەر جولىندا جۇرگەن بولار؟

- 2006 -جىلى جالپى مەكتەپ- ستۋديا دەگەندى ەڭ العاشقىلاردىڭ ءبىرى بولىپ اشقان ەدىم. قازىر مەكتەپ- ستۋديا كوپ. ستۋدەنتتەرگە دەيىن اشادى. كوبىسى بۇرىنعى ۇيىرمەلەردىڭ ەسەبىندە. بۇرىن ۇيىرمەلەر كوپ ەدى، قازىر ستۋديالار قاپتاپ كەتتى. مەنىڭ ستۋديامدا وقيتىن بالالاردىڭ باعىتى - ارى قاراي مۋزىكاعا بارادى دەيتىندەي ەمەس، كوبىنەسە ءوزى ءۇشىن ۇيرەنەتىن بالالار. مەكتەپ- ستۋديامنىڭ ماقساتى - ءاربىر دومبىرا ۇيرەنگىسى كەلەتىن قازاقتى باۋلۋ. ودان باسقا البەتتە، شەبەرلىك سىنىپتارىن وتكىزەمىن. وقۋ ورىندارىنا تۇسكىسى كەلەتىن نەمەسە دەمالىستا جۇرگەن بالالار كەلىپ ساباق الادى. بولماسا بايقاۋلارعا قاتىسقىسى كەلەتىن بالالار دا كەلىپ ءتالىم الىپ جاتادى. ول - ستۋديانىڭ بولەك تارماعى.

ءوزىمنىڭ تاربيەلەگەن شاكىرتتەردىڭ ىشىندە تەك قازاقتىڭ ەمەس، باسقا دا ۇلتتىڭ دا بالالارى بار. ماسەلەن، جاڭا عانا «استانا» تەلەارناسىنان كەلىپ مەنەن «دومبىرا كۇنىنە» بايلانىستى سۇحبات الىپ كەتتى. شاكىرتتەرىمنىڭ ءبىرى اندرەي دە سۇحبات بەردى. بولاشاقتا ءبىزدىڭ دومبىرامىز تەك ۇلتتىڭ اسپابى ەمەس، حالىقتىق مارتەبەگە يە بولاتىن شىعار. حالىقتىق اسپاپ رەتىندە ءبىز قازىر سكريپكا، ۆيولونچەلدى، پيانينونى ايتىپ ءجۇرمىز. ءبىزدىڭ دە ۇلتتتىق اسپابىمىز سونداي بيىك دەڭگەيگە جەتەتىن شىعار دەپ ويلايمىن. سەبەبى، قازىرگى كەزدە دومبىراعا دەگەن قىزىعۋشىلىق جالعىز ءبىزدىڭ قازاقتىڭ بالالارىندا عانا ەمەس، باسقا ۇلتتاردا دا بار.

شىنىمدى ايتسام، وسى جىلدىڭ ىشىندە مەكتەپ- ستۋديامداعى ءبىر بالا عانا مۋزىكالىق كوللەدجگە بارىپ، كۇيشى بولماققا قادام جاسادى. ال قالعاندارى ءارتۇرلى ۋنيۆەرسيتەتتەردە جۇرگەنىمەن، دومبىرالارىن قولىنان تاستامايدى. قازىر ەكىنشى شاكىرتىمنىڭ ديسكىسىن شىعارعالى جاتىرمىز. ءبىر شاكىرتىم ءوزىنىڭ ديسكىسىن شىعاردى. ولار وقۋىن تاستاپ كەتپەي، ستۋدەنت بولعانشا مەنىڭ ستۋدياما كەلىپ تۇرادى. 2-3 جىل وقىتىپ، جىبەرە سالاتىنداي ستۋديا ەمەس دەگەنىم عوي.

مەندە وقيتىن مەكتەپ وقۋشىلارىنىڭ بارلىعى ءۇشىن جەكە باعدارلاما جاساپ، مەكتەپتەرىنە بارىپ، جەكە كونسەرتتەرىن ۇيىمداستىرىپ تۇرامىن. ونىڭ ءوزى ماڭىزدى. سەبەبى، ول دا بالا ءۇشىن زور جەتىستىك. ەكىنشىدەن، بۇل بالانى جاۋاپكەرشىلىككە، تياناقتىلىققا باۋلىپ، ساحنا مادەنيەتىنە ۇيرەتەدى.

- وسى رەتتە ءبىر سۇراق تۋىندايدى. بۇعان دەيىنگى ءسىزدىڭ بىرنەشە سۇحباتىڭىزدا تىلشىلەردىڭ «ەستارادامەن ارالاسقان دومبىرا ءوزىنىڭ قوڭىر ءۇنىن جوعالتىپ الماي ما؟» دەگەن سۇراقتى ءجيى قويعانىن بايقاپ قالدىم. ودان دومبىرانىڭ ۇتىلمايتىنى تۋرالى جاۋابىڭىزدى تىڭدادىم. ورىندى جاۋاپ دەپ ايتار ەدىم. ەندىگى كەزەكتە بالكىم، قازاقتىڭ دومبىراسىن شەتەلدەگى ناسيحاتىن كۇشەيتۋ ءۇشىن ءالى دە بولسا ءبىر تىڭ ەكسپەريمەنتتەردى جاساپ كورۋگە بولار دەپ ويلايسىز با؟

- ونەر جولىندا جۇرگەلى بەرى كۇي ونەرىن قالايشا جاڭاشالاپ، كورەرمەندى وزىمە كوپتەپ تارتا الام دەگەن سۇراق مەنى ۇنەمى تولعاندىرادى. مەن قارابايىر كۇيدى ورىنداپ كونسەرت بەرگەن ەمەسپىن. ۇنەمى جاڭا قادام جاساپ، تىڭ يدەيا تابۋعا تىرىسامىن. 2013 -جىلى «ايگۇل- كۇيگە بار الەم تامسانادى» اتتى تاقىرىپتا وتكەن اۋقىمدى كونسەرتتىك باعدارلامام استانادا دا، الماتىدا دا ءوتتى. ول جەردە ۇلكەن ريتم- توپتىڭ سۇيەمەلدەۋىمەن، جاندى داۋىستا اكۋستيكالىق اسپاپتارمەن كونسەرت بەردىم. ونىڭ ىشىندە ءبىز تەك قازاقتىڭ كۇيىن ورىنداعان جوقپىز. قازاقتىڭ كۇيى سان الۋان. ونىڭ قۇرىلىمى مەن ريتمدىك باعىتى، ولشەمى ءارتۇرلى بولىپ كەلەدى. سونىسىمەن قازاقتىڭ كۇيى - وتە باي مۇرامىز، قازىنامىز. مەندە وقىعان تۇرىك، ارميان، ورىس بار - تورتەۋىمىز ءتورت ۇلتتىق كيىممەن ەرەكشە ءنومىر جاسادىق. ءار ۇلت ءوزىنىڭ اسپابىندا ءوز ۇلتىنىڭ مۋزىكاسىن ورىندايدى. مەن ءارقايسىسىن ەكىنشى دىبىسپەن قوستاپ وتىرامىن. سوڭىندا قازاقتىڭ ءانى بويىنشا ولار مەنى قوستاپ، سوڭىندا ءبىز ءنومىردى كۇيمەن بىرگە اياقتايمىز. سونداي قىزىقتى يدەيالاردى جۇزەگە اسىرۋعا تىرىسامىز. سونىمەن قاتار، مەن «سينك- سينك»، «تيكو- تيكو» سياقتى بۇرىن سوڭدى قازاقتىڭ دومبىراسىندا ورىندالماعان شىعارمالاردى وينادىم. ونىڭ ءبارى توپتىڭ قوستاۋىمەن ورىندالدى. جاندى داۋىسپەن ونداي كونسەرتتى كوماندامەن حالىققا ۇسىنعان اسپاپشىلار ساۋساقپەن سانارلىق.

وتكەندە اتىراۋ وبلىسىنىڭ اكىمدىگى «كونسەرت بەرسەڭىز» دەپ ۇسىنىس جاساعاننان كەيىن تاعى دا جاڭا باعدارلاما جاسادىق. مەن ۇنەمى شاكىرتتەرىمدى كونسەرتتەرىمە قاتىستىرامىن. ۇلكەن بۋىن ستۋدەنتتەر مەن كىشى بالالار بار، شاكىرتتەرىمنىڭ بارلىعى كونسەرتتەرىمدە شىعىپ ءجۇر. اتىراۋداعى كونسەرتتە رويال، پەركۋسسيا، ۇرمالى اسپاپ جانە مەنەن باسقا تاعى ەكى دومبىرامەن جاڭا باعدارلاما ازىرلەدىك. ول دا وتە تارتىمدى ءوتتى. سەبەبى، باعدارلاماڭدى ۇنەمىن جاقسارتىپ وتىرساڭ، ول تىڭداعان حالىققا دا جايلى. پايدا كوزدەپ گاسترولدىك ساپارعا بارعان ەمەسپىن. وندايلار كوپ كەزدەسەتىنى جاسىرىن ەمەس. ۇلكەن كونسەرتتەردىڭ وزىندە ورىنداۋشىلار اقشانى ۇنەمدەۋ ءۇشىن ساحنانىڭ دەكوراتسياسىنا باسا ماڭىز بەرمەۋى مۇمكىن. تازا داۋىستىڭ ءوزى ۇلكەن قاراجاتقا تىرەلەدى. ونداي ۇنەمنەن اۋلاقپىن. ەڭ الدىمەن مەن ءۇشىن حالىقتىڭ ويى مەن كوزقاراسى، قۇرمەتى قىمبات. ءبىر جاعىنان ول سەنىڭ كاسىبي دەڭگەيىڭدى كورسەتەدى. دالەلدەۋىڭ كەرەك كىم ەكەنىڭدى. سوندىقتان، ول وتە ۇلكەن جاۋاپكەرشىلىك، ۇلكەن سىن.

- وتكەن جىلى «مەن قازاقپىن» جوباسىندا نەگىزگى تورەشىلەردىڭ ءبىرى ءوزىڭىز بولدىڭىز. الدىڭىزدان قازاقتىڭ كۇي ونەرى مەكتەبىنىڭ تۇگەل دەرلىك وكىلى ونەر كورسەتتى. كۇي ونەرىن ۇستانىپ جۇرگەن قازىرگى جاس بۋىننىڭ ونەرىنە قالاي باعا بەرەر ەدىڭىز؟ بالكىم، قانداي دا ءبىر كەمشىلىكتەرىن نەمەسە ارتىقشىلىقتارىن بايقاعان بولارسىز؟

- قازىرگى جاستاردىڭ كەمشىلىگى جونىندە... ول ەندى تاپ قازىر پايدا بولعان دۇنيە ەمەس. وسىدان 15-20 جىل بۇرىنعى تەندەنسيا قالماي كەلە جاتىر - قازىرگى بالالار كۇيدى تەز وينايدى. ول ءبىزدىڭ كەزىمىزدە دە بولعان. دەگەنمەن، ءاربىر بۋىن اۋىسقان سايىن ول دا ۇدەپ بارا جاتىر. تۇسىنەسىز بە؟ قازىرگى بالالاردىڭ كوبىسى داستۇرگە كوپ بويلاماي، قازىرگى زاماننىڭ كۇيلەرى سەكىلدى جەڭىل- جەلپى ورىندايدى. نەگە قازىرگى كەزدە داستۇردەن اۋلاق كەتىپ قالدىق؟ ءداستۇرلى كۇيشىلەر نەگە شىقپايدى دەپ مەنەن دە سۇراپ، «سىزدەر سوڭعى شىعارسىزدار» دەيتىندەر دە بار. سەبەبى، كونسەرۆاتوريادا، كوللەدجدەر دە داستۇرگە، مانەرگە، مەكتەپتىڭ ەرەكشەلىگىنە كوڭىل ءبولىپ، ساباق بەرەتىن مۇمكىندىك ءبىزدىڭ قازىرگى وقۋ باعدارلاماسىندا قاراستىرىلماعان.

 ءبىزدىڭ ونەردى ءداستۇر دەپ ەسەپتەمەيتىن كەيبىر وقىمىستىلار دا بار بىزدە. مەنىڭ ءوزىم 8 - سىنىپتى ءبىتىرىپ كەلگەنگە دەيىن نوتا دەگەندى بىلگەن ەمەسپىن. تەك قۇيماقۇلاقتىق - كۇيدى كوزبەن كورىپ، قۇلاعىممەن تىڭداۋ ارقىلى عانا ۇيرەنگەن اداممىن. مەن نەگە ءداستۇرلى كۇيشىگە جاتپايمىن!؟ ول حالىقتىڭ پىكىرى ەمەس، ارينە. ءبىز وقۋ ارقىلى ءداستۇردى باسقا دەڭگەيگە جەتكىزگەن ورىنداۋشىلارمىز دەپ ايتسام بولادى. ءبىزدىڭ ەرەكشەلىگىمىز - ءبىزدىڭ بىلىمىمىزدە. ءبىز تەك كۇيمەن عانا شەكتەلمەي، شەتەل شىعارمالارىن مىندەتتى تۇردە كونسەرتتەردە قوسۋعا تىرىسامىز. ءالى كۇنگە دەيىن تەك ءداستۇرلى كۇيمەن شەكتەلىپ قالماي، جان- جاقتى بولۋدى ويلايتىن اداممىن. مۋزىكانت بولعاننان كەيىن كوكجيەگىڭ كەڭ بولۋى كەرەك دەپ ويلايمىن. مەنىڭ وزىمە قوياتىن تالابىم وسىنداي.

- كۇيشى بولعاننان كەيىن كوپتەگەن ورتادا ونەر كورسەتەسىز. كۇيدى قازاق بولىپ جان- جۇرەگىڭمەن تىڭداي ءبىلۋ دە قابىلەت. بەلگىلى ءبىر جيىندا دەلىك، تىڭدارماننىڭ كەيبىرىنە رەنجىگەن كەزىڭىز بولدى ما؟

- بىلەسىز بە، مەن بىرىنشىدەن، زالعا قۋىپ تىعىپ، زورلىقپەن كونسەرت وتكىزبەيمىن. كونسەرت وتكىزسەم - شىنايى بولعانىن قالايمىن. ماسەلەن، اقشا تاۋىپ كەتۋ ماقساتىندا مەكتەپ وقۋشىلارىنىڭ بارلىعىن جيناپ الىپ، كونسەرت بەرىپ جاتاتىن جاعدايلار كەزدەسەدى. قالاۋىم - ول ەمەس. جۇرەگىم قاشان قالايدى - سول كەزدە كونسەرتكە شىعامىن. زورلىقپەن بيلەت ساتقىزاتىن ونەر يەسى ەمەسپىن. كونسەرتىمە كەلگەن ۇلكەن كىسىلەر: «داڭعىر- دۇڭعىردان شارشاپ، مىناداي كونسەرتتى كورمەگەنىمىزگە كوپ بولدى» دەپ ايتىپ وتىرادى. كەيبىرى «قاشان كونسەرت بەرەسىز» دەپ سۇرايدى. ال مەن ءۇستى- ۇستىنە كونسەرت وتكىزىپ، حالىقتى جالىقتىرىپ العىم كەلمەيدى. ءوزىمنىڭ سونداي ءبىر ۇستانىمدارىم بار.

- قازاقتىڭ قارا دومبىراسىن كۇمبىرلەتىپ جۇرگەن تۇركيالىق سەدات سولاكوعلى دەگەن تۋىسىمىزدىڭ بارىن بىلەسىز. ول كىسىمەن سۇحباتتاسقان كەزىمدە «ايگۇل ۇلكەنبايەۆا مەنى ءوزىنىڭ شاكىرتى دەپ قابىلدادى. ماعان ودان ارتىق قۋانىش بار ما؟» دەپ قالدى. جالپى، قازاقتىڭ دومبىراسىنا، ۇلتتىق ونەرىمىزگە دەگەن ونەردى تۇسىنەتىن شەتەلدىكتەردىڭ پىكىرى قانداي؟

- ارينە. دومبىرانىڭ ءۇنى ادامداردىڭ تامىرىنا ما، جۇرەگىنىڭ ءبىر قىلىنا ما تيەتىن ءبىر قاسيەتى بار. شەتەلدەگى قازاقتارمەن كوپ ارالاسامىن. كەشە عانا ءبىز اتىراۋدىڭ وركەسترىمەن پاريجگە بارىپ كەلدىك. كونسەرتتى سونداي كەرەمەت قابىلدايتىن كورەرمەن كەلدى. جوعارىدا اتاپ وتكەنىمدەي، مەنىڭ كونسەرتىمە كەزدەيسوق ادامدار كەلمەيدى. كۇيدى تۇسىنەتىن ۇلكەن ادامدار كەلەدى. كونسەرت بىتسە دە، سەن وسى كۇيدى ورىنداپ بەرشى دەپ قولقا سالاتىندار بار. «كەرۋلەن» دەگەن ءوزىمىزدىڭ قۇرعان ەتنومادەني توبىمىز بار. مۋزىكانتتاردىڭ جان- جاققا كوشىپ كەتۋىنە بايلانىستى قازىر كونسەرت بەرىپ، جارناما جاساپ جۇرگەن جوقپىز. كونسەرت اياقتالعاسىن زالدان كورەرمەندەر كەتپەي: «ايگۇل، اينالايىن ەندى سەن ءوزىڭ مىنا، مىنا كۇيلەردى ورىنداپ بەر» دەپ كۇتىپ وتىراتىندار بارشىلىق. وركەستردەن تىس ورىنداپ بەرمەسەڭ، سەن كۇي شەرتپەدىڭ دەپ قابىلدامايتىن ادامدار كەزدەسەدى. قۇدايعا شۇكىر، ونداي كىسىلەر امان- ەسەن جۇرە تۇرسا ەكەن دەپ ويلايمىن. سول تىڭدارماندارىمىز كەتسە، كەيىنگى ءبىزدىڭ جاعدايىمىز نە بولار ەكەن دەگەن مەنىڭ ۋايىمىم دا جوق ەمەس.

شەتەلگە بارساق، سول ەلدەگى قازاقتاردى مىندەتتى تۇردە شاقىرامىز. ۆاحاب دەگەن پاريجدە تۇراتىن اعامىز: «سەنىڭ كۇيىڭدى تىڭداعاندا مەنىڭ مىنا قولدارىمنىڭ تۇگى كوتەرىلىپ كەتەدى» دەيدى. دەنەم تىتىركەنەدى دەگەنى عوي (كۇلدى).

- كۇيلەرىڭىزدى تىڭداپ وتىرىپ نازىك ليريكادان گورى كوز الدىڭا ءبىر ماحامبەتتىڭ ورلىگى مەن ەرلىگىن ەلەستەتەر، قۇرمانعازى مانەرىندە دەسە بولا ما - ەرەكشە ارىندى سەزىنگەندەي بولامىن. جالپى، ليريكالىق كۇيلەردەن گورى وسىنداي ادۋىندى كۇيلەردى كوبىرەك دەن قوياتىن سەكىلدىسىز بە؟

- جوق. كورەرمەندى مەن ءارتۇرلى مۋزىكانى تالاپ ەتەتىنىن بىلەمىن. بىرەۋ ادۋىندى كۇيدى ۇناتسا، بىرەۋ جاي كۇيدى قولاي كورەدى. سوندىقتان، مەن ۇنەمى ونى ارالاستىرامىن. ءبىر باعىتتا بەرمەيمىن. ەرمۇرات ۇسەنوۆتىڭ ماعان جازعان «كەربەز سۇلۋ» كومپوزيتسياسى بار. سونى مەن سكريپكاشىلاردىڭ قوستاۋىمەن ويناعانمىن. ۇنەمى ءارتۇرلى كۇيلەردى كونسەرتتەرىمدە ارالاستىرامىن. ءبىر كەزدە مەن ماسەلەن داستارحاننىڭ باسىندا وتىرىپ، ليريكالىق اۋەن ورىنداۋىم مۇمكىن. ول مەنىڭ كوڭىل- كۇيىمە بايلانىستى. تۇسىنەسىز بە؟ ۇنەمى سەن جۇلىپ تۇرعان كۇيدى ورىنداي بەرمەيسىڭ عوي. جايباراقات ادامنىڭ كوڭىلىن تىنىشتاندىراتىن ءبىر كۇي ورىنداۋىڭ مۇمكىن. كۇي دەگەننىڭ ءوزى - ادامنىڭ كوڭىل- كۇيى.

ۇلكەن كونسەرتىمدە رويالمەن بىرگە «سالتانات» اتتى شەرتپە كۇيدى ورىندادىم. سول «سالتاناتقا» پىكىرلەر وتە جاقسى بولدى. بۇعان دەيىن شەرتپە كۇيدى ەستاراداعا قوسىپ ويناپ ءجۇرمىز. رويالمەن ورىندالعانى - تىڭ باعىت.

- 1 - شىلدە كۇنى «ۇلتتىق دومبىرا كۇنى» كەلە جاتىر. استانالىق ونەرسۇيەر قاۋىمعا ايگۇل ناريمان قىزى قانداي سىي دايىنداپ وتىر؟

- دومبىرا كۇنى جانە مەرەكەسى بويىنشا باستامانى كوتەرگەن مادەنيەت جانە سپورت مينيسترلىگى دەپ ءتۇسىندىم. سەبەبى، «دومبىرامەن فلەشموب دايىنداپ جاتىرمىز - سوعان ءسىزدى روليككە تۇسىرەيىك دەپ ەدىك» دەپ ءبىرىنشى ماعان حابارلاستى. ونىڭ ارتى مەرەكەگە اينالعانى - سول كىسىلەردىڭ ءبىر قادامى، تۇرتكىسىنىڭ ارقاسى دەپ مەن ايتار ەدىم. سول كىسىلەر دەر كەزىندە ماسەلە كوتەرىپ، پرەزيدەنتتىڭ الدىنا دەيىن اپارىپ، «رۋحاني جاڭعىرۋ» باعدارلاماسىنىڭ اياسىندا كەرەمەت ءىستىڭ جۇزەگە اسقانى، حالىقتىق مەرەكەنىڭ پايدا بولعانى - قازاقپىن دەپ ءوزىن ەسەپتەيتىن ادام ءۇشىن ۇلكەن قۋانىش.

دومبىرا كۇنى - داستۇرگە اينالاتىن مەرەكە. بۇل جولى ۇلكەن بۇقارالىق تۇردە وتەدى دەپ كۇتىلىپ وتىر. جان- جاقتان بارلىق وركەسترلەر جينالىپ جاتقان سەكىلدى. دايىندىعىنا 30-ى كۇنى جينالامىز. ازىرگە مەنىڭ بىلۋىمشە، كوپشىلىك بولىپ ءبارىمىز كۇي ورىنداۋىمىز كەرەك. ول جەردە ەلباسى قاتىسادى دەپ كۇتىلىپ وتىر. ونىڭ ارتىنشا ەتنواۋىل قۇرىلىپ، ۇلتتىق ونەر پاش ەتىلەدى. سول جەردە ءبىز كونسەرتتەرگە قاتىسامىز.

تاعى ءبىر ايتا كەتەر جاڭالىعىم - قولىما الدىمىزداعى اپتانىڭ ىشىندە تيەر دەگەن ۇمىتتەمىن: ۇلكەن بەس ديسكىدەن تۇراتىن توپتامام جارىق كورگەلى جاتىر. ونىڭ ىشىندە مەنىڭ جاڭادان جازعان ەكى ديسكىم بولادى. ونىڭ ىشىندە بۇرىن- سوڭدى ورىندالماعان كۇيلەر قامتىلادى. ديسكىدە قامتىلعالى وتىرعان كونسەرتتىك نۇسقانى تەلەارنالاردان بەرىپ، باياعىدا- اق تانىستىرىپ تاستاۋىما بولار ەدى. بىزدىكىلەر وزدەرىن ۇمىتتىرماۋ ماقساتىندا سونداي امالداردى قولدانادى عوي. ايتىپ كەتكەنىمدەي، جارنامامەن حالىقتى جالىقتىرعىم كەلمەيدى. سوندىقتان، كۇيلەرىمدى تەلەارنالارعا بەرمەي، ينتەرنەتكە جۇكتەگەن جوقپىن. ديسكىنى سۇراپ، جەكە قولىمنان العان ادامدار بار. بارلىق قازاق كونسەرتىمدى كوردى دەۋدەن اۋلاقپىن. DVD- فورماتتا ەكى ديسكى، اۋديوفورماتتا 3 ديسكىم دايىن. سونىڭ بىرىنە كونسەرتىمدى دە جۇكتەدىم.

- سۇحبات بەرگەنىڭىز ءۇشىن كوپ راحمەت. 1 - شىلدەدەگى ۇلتتىق دومبىرا كۇنىن اسىعا كۇتەمىز.

- سىزگە دە راحمەت.

اۆتور: ايان بەكەن ۇلى