جۋرناليستەر جاعىمسىز اقپاراتتى نەگە كوپ بەرەدى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ جۋرناليستەردىڭ جاعىمسىز اقپاراتقا جاقىن تۇراتىنىن جەتكىزدى.

سونىڭ سالدارىنان جاعىمدى جاڭالىقتار كورىنبەي جاتادى، دەپ حابارلايدى قازاقپارات ءتىلشىسى.

«ماسەلەن، كۇنى كەشە بىزدە باسپا ءسوز ءماسليحاتى ءوتتى. سول جەردە بەس ايدىڭ قورىتىندىسى جاريالانعان بولاتىن. ءبىراز ماسەلە جەمقورلىقتىڭ الدىن الۋ شارالارىنا ارنالدى. ءبىراق بۇقارالىق اقپارات قۇرالدارى ونىڭ ءبارىن بەرگەن جوق. جەمقورلىق ءۇشىن كىم ۇستالدى؟ قالاي ۇستالدى؟ سونى عانا بەردى. اقپاراتتىق اگەنتتىكتەردىڭ ءبارى سولاي ىستەدى. مەنىڭشە، بۇگىندە پروفيلاكتيكالىق شارالاردى دا كەڭىنەن ناسيحاتتاۋىمىز قاجەت»، - دەدى ا. شپەكبايەۆ ق ر پرەزيدەنتى جانىنداعى ادام قۇقىقتارى بويىنشا كوميسسيانىڭ كەڭەيتىلگەن وتىرىسىندا.

ق ر اقپارات جانە كوممۋنيكاتسيالار ءمينيسترى داۋرەن ابايەۆ اتالعان ءۇردىستىڭ نەگىزگى سەبەبىن ءتۇسىندىردى.

«وكىنىشكە قاراي، ونداي ماسەلە بار. مىسالى، قازىر ءبىز مەملەكەتتىك قىزمەتشىنىڭ ادال ەڭبەك اتقارعانى ءۇشىن سىياقى العانىن جازساق، ونى ارى كەتسە، 200 اق ادام وقيدى. ال مەملەكەتتىك قىزمەتشىنىڭ پارامەن ۇستالعانىن 10000 ادام وقىپ شىعادى. ال بۇقارالىق اقپارات قۇرالدارى جارنامانى كوپتەپ تارتىپ، اقشا تابۋعا تىرىسادى. جاڭالىقتى ادام نەعۇرلىم كوپ وقىسا، سوعۇرلىم جارناما دا كوپ تۇسەدى. سول سەبەپتى جۋرناليستەر جاعىمسىز جاڭالىقتاردى كوپ بەرەدى»، - دەپ اتاپ كورسەتتى د. ابايەۆ.

ايتا كەتەيىك، وتىرىس بارىسىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ ادال جۇمىس ىستەيتىن مەمقىزمەتشىلەردىڭ سانىن جاريالادى. اگەنتتىك باسشىسى ءىرى كولەمدە پارا بەرۋ قىلمىستارىنىڭ كوبەيىپ جاتقانىن دا جەتكىزدى.