اليك شپەكبايەۆ ادال مەملەكەتتىك قىزمەتشىلەردىڭ سانىن جاريالادى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ ادال جۇمىس ىستەيتىن مەمقىزمەتشىلەردىڭ سانىن جاريالادى، دەپ حابارلايدى قازاقپارات ءتىلشىسى.

«مەنىڭشە، مەملەكەتتىك قىزمەتشىلەردىڭ 99 پروتسەنتى ادال جۇمىس ىستەيدى. ولار ءوز قىزمەتىنە جاۋاپتى، جۇمىسىنا ادال. ال كەيبىر مەملەكەتتىك قىزمەتشىلەر زاڭسىز پايدا تاۋىپ، قىلمىسقا بارىپ جاتادى. ارينە، ءبىز ونداي ادامداردى زاڭ بويىنشا جاۋاپقا تارتامىز. ءبىراق سولاردىڭ كەسىرىنەن بارلىق مەملەكەتتىك قىزمەتشىلەردىڭ بەدەلىنە نۇقسان كەلەدى، بارىنە كولەڭكە تۇسەدى»، - دەدى ا. شپەكبايەۆ ق ر پرەزيدەنتى جانىنداعى ادام قۇقىقتارى بويىنشا كوميسسيانىڭ كەڭەيتىلگەن وتىرىسىندا.

ايتا كەتەيىك، بۇگىنگى وتىرىستا ق ر پارلامەنتى سەناتىنىڭ دەپۋتاتى ءبىرعانىم ءايتىموۆا مەملەكەتتىك قىزمەتكە جاڭادان كەلەتىن مامانداردى جەمقورلىقتان قورعاۋ قاجەتتىگىن جەتكىزدى. «بىزدە مەملەكەتتىك قىزمەتشىلەردى كوپ جاماندايدى. باسقا ەلدە ونداي جوق سياقتى. ەندى، جەمقورلىقپەن كۇرەسىپ كەلە جاتىرمىز عوي. ءبىراق 100 مىڭ مەملەكەتتىك قىزمەتشى ارمياسىنىڭ بارلىعى بىردەي پارا المايتىن شىعار. ماسەلەن، ءبىر وبلىستا تۇتاس ءبىر اكىمدىكتىڭ قىزمەتكەرلەرى سوگىس الىپ شىققان. مەنىڭشە، ونداي ارەكەتتەردىڭ ءبارىن جان-جاقتى زەردەلەپ، سىبايلاس جەمقورلىققا كەلە مە، جوق پا، سونى انىقتاپ العان ءجون. ويتكەنى جاڭادان كەلگەن قىزمەتكەرلەر كوپ نارسەنى بىلمەي جاتادى، قاتەلىك جاسايدى جانە تاعىسىن تاعى. ونى دا ەسكەرۋ كەرەك»، - دەپ اتاپ كورسەتتى ب. ءايتىموۆا.