ءىرى كولەمدە پارا بەرۋ قىلمىستارى كوبەيىپ كەلەدى - اليك شپەكبايەۆ

استانا. قازاقپارات - سوڭعى ءۇش جىلدا ءىرى كولەمدە پارا بەرۋ قىلمىستارى كوبەيدى.

ال اتالعان قىلمىس بويىنشا سوتتالعانداردىڭ سانى ەكى ەسەگە ءوستى، دەپ حابارلايدى قازاقپارات ءتىلشىسى.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆتىڭ ايتۋىنشا، وسىدان ءۇش جىل بۇرىن ءىرى كولەمدە پارا بەرگەن 69 ادام ۇستالسا، وتكەن جىلى اتالعان كورسەتكىش 165 ادامعا جەتتى.

«ماسەلەن، اۋىر جانە اسا اۋىر قىلمىس ءۇشىن 79 ادام ۇزاق ۋاقىتقا باس بوستاندىعىنان ايىرىلدى. 15 قىلمىسكەر 8 جىلدان استام ۋاقىتقا قامالسا، 3 ادام 10 جىلعا دەيىنگى مەرزىمگە تۇرمەگە توعىتىلدى. ال 5 ادام 10-15 جىلعا باس بوستاندىعىنان ايىرىلدى. ءتىپتى، 20 جىلعا سوتتالعاندار دا بار. وسى ورايدا بارلىق ازاماتتاردى پارا بەرمەۋگە شاقىرامىز. سەبەبى پارا بەرگەن ادام بولماسا، پارا الاتىن ادام دا بولمايدى. سوسىن پارا بەرۋ قىلمىسى پارا العانمەن بىردەي ەكەنىن ەسكە سالعىم كەلىپ وتىر. ونداي ارەكەت ءۇشىن 15 جىلعا دەيىن باس بوستاندىعىنان ايىرۋ جازاسى قاراستىرىلعان»، - دەدى ا. شپەكبايەۆ ق ر پرەزيدەنتى جانىنداعى ادام قۇقىقتارى بويىنشا كوميسسيانىڭ كەڭەيتىلگەن وتىرىسىندا.

ايتا كەتەيىك، وتىرىس بارىسىندا اگەنتتىك باسشىسى اليك شپەكبايەۆ ادال جۇمىس ىستەيتىن مەمقىزمەتشىلەردىڭ سانىن جاريالادى. ال ق ر پارلامەنت سەناتىنىڭ دەپۋتاتى ءبىرعانىم ءايتىموۆا مەملەكەتتىك قىزمەتكە جاڭادان كەلەتىن مامانداردى جەمقورلىقتان قورعاۋ قاجەتتىگىن جەتكىزدى.