قازاقستانداعى ۋنيۆەرسيتەت تۇلەكتەردىڭ قۇجاتتارىن ونلاين قابىلدايدى
ەندى ۋنيۆەرسيتەتتىڭ kaznu.kz سايتىندا ءبىلىم ورداسىنا ءتۇسۋشى شەتەل ازاماتتارىنىڭ قۇجاتتارىن ونلاين تۇردە تىركەۋ جانە قابىلداۋ ءۇشىن جاڭا قىزمەت قولجەتىمدى بولدى، دەپ حابارلايدى قازاقپارات.
«SANALY URPAQ» جوبالىق كەڭسەسىنىڭ باسپا ءسوز قىزمەتىنىڭ مالىمەتىنشە، ۋنيۆەرسيتەت بارلىق بيزنەس-پروتسەستەردى ساندىق فورماتقا كوشىرۋ بويىنشا جۇيەلى جۇمىس جۇرگىزەدى. بۇل ۋنيۆەرسيتەت كورسەتەتىن قىزمەتتەردىڭ سەنىمدىلىگى مەن ساپاسىنىڭ وسۋىنە وڭ اسەر ەتەدى. وسى باعىتا ءال-فارابي اتىنداعى قاز ۇ ۋ جانىنان مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى تاراپىنان اشىلعان «SANALY URPAQ» جوبالىق كەڭسەسىمەن بىرلەسە جۇمىس جۇرگىزىلۋدە.
ونلاين جۇيەنىڭ ارقاسىندا قۇجاتتاردى تاپسىرۋ جانە قابىلداۋ ۋاقىتى ەداۋىر قىسقارىپ، ولاردى تىركەۋدە اكىمشىلىك كەدەرگىلەر جويىلادى. وقۋعا تاپسىرۋشىلاردىڭ كەلۋ قاجەتتىلىگى جوق. ءارى بۇل ءراسىم قارجى ۇنەمدەۋگە مۇمكىندىك بەرەدى. ونلاين جۇيەدە قۇجاتتاردى قابىلداۋدىڭ تاعى ءبىر ارتىقشىلىعى شەتەلدىك تالاپكەرلەر وزدەرىنىڭ تۇرعىلىقتى مەكەنجايىنا قاراماستان ۋنيۆەرسيتەتپەن تىكەلەي بايلانىس ورناتۋ مۇمكىندىگىنە يە بولا الادى.
قۇجاتتاردى قابىلداۋدىڭ بارلىق ۇدەرىسى اۆتوماتتاندىرىلعان ءارى ءۇش تىلدە - قازاق، ورىس جانە اعىلشىن تىلدەرىندە قولجەتىمدى ارنايى ازىرلەنگەن باعدارلامادا جۇزەگە اسىرىلادى. الداعى ۋاقىتتا وسى ءتىزىمدى كەڭەيتۋ جوسپارلانۋدا.
جاقىن جانە الىس شەتەلدىك تالاپكەرلەر ءتيىستى قۇجاتتاردى تاپسىرىپ ءساتتى تىركەلەتىن بولسا، وندا ۋنيۆەرسيتەتكە ديستانتسيالىق قاشىقتىقتان قابىلداناتىن بولادى. بۇل قىزمەتتى برازيليا، ا ق ش، فرانسيا، گەرمانيا، يندونەزيا، وڭتۇستىك كورەيا، تۇركيا، ءۇندىستاننان 100 دەن استام شەتەلدىك پايدالاندى. بيىلعى قاز ۇ ۋ- عا ساپالى جوعارى ءبىلىم الۋعا نيەت تانىتىپ وتىرعان شەتەلدىكتەر اسا كوپتەپ كەلەدى دەپ كۇتىلۋدە. بۇعان قازاقستاندىق جوعارى وقۋ ورنىنىڭ الەمدىك رەيتينگتەگى جوعارعى كورسەتكىشتەردەن كورىنىپ وتىرعاندىعى سەپتىگىن تيگىزۋدە.