ءمينيستردىڭ ەسكەرتۋى: زاڭسىز قارۋدى تاپسىرىڭىزدار، ءوزىمىز تاپساق جاۋاپقا تارتامىز
«قارۋ جوعارى قاۋىپ كوزى سانالادى. ولار ءبىزدىڭ ازاماتتارىمىزدا ءتۇرلى جولدارمەن قولعا تۇسكەن. بىرەۋلەرىندە رۇقسات بولماعان كەزدەردەن بەرى باياعىدان بار، ەندى بىرىندە تۋعان-تۋىستارىنان قالعان. شەتەلگە كەتىپ بارا جاتىپ تاستاپ كەتكەندەر دە كەزدەسەدى. قارۋ تۇرعاننان كەيىن وتباسىلىق-تۇرمىستىق قارىم-قاتىناستا دا قولدانىلادى، كەيدە بالالار وينايدى. بۇل قايعىلى جايتتارعا سەبەپ بولىپ جاتادى. سوندىقتان 2012-جىلى ءبىزدىڭ ازاماتتارىمىزدىڭ قولىنداعى قارۋدى الۋ تۋرالى شەشىم قابىلداندى»، - دەدى ول.
ونىڭ ايتۋىنشا، زاڭسىز قارۋدى اكسيا اياسىندا تاپسىرعاندار جاۋاپكەرشىلىككە تارتىلمايدى. جۇمىستار قولعا الىنعان كەزدە ەل تۇرعىندارىنان قارۋلاردى ساتىپ الۋ ءۇشىن ۇكىمەت شامامەن 240 ميلليون تەڭگە بولگەن. ءبىرىنشى جىلى ازاماتتار شامامەن 8 مىڭ قارۋ-جاراق تاپسىردى.
«وق-دارىلەر مەن جارىلعىشتاردى تاپسىرعاندار بولدى. ءتىپتى ءبىر جەردەن تاۋىپ العان گراناتانى وتكىزگەندەر دە كەزدەستى. مۇنىڭ بارلىعىن بىزگە وتكىزدى، وتەماقى بەردىك. بەس جىلدىڭ ىشىندە وتە كوپ قارۋ-جاراق قايتارىپ الدىق. ولاردىڭ اراسىندا تۋعان-تۋىستارىنان قالعان تاريحي قارۋلار دا كەزدەسىپ، مۋزەيگە تاپسىردىق. ناتيجە بار. بۇگىنگى كۇنى قارۋدىڭ قولدانىلۋىمەن جاسالاتىن قىلمىستار ەكى ەسەگە قىسقاردى. مۇنى وتە جاقسى ناتيجە دەپ ەسەپتەيمىن»، - دەدى قاسىموۆ.
ماسەلەن، ءمينيستردىڭ دەرەگىنشە، قارۋ قولدانۋ ارقىلى 2013-جىلى شامامەن 650 قىلمىس تىركەلسە، وتكەن جىلى ول 300 گە دەيىن ازايعان.
«دەگەنمەن، ادامداردا ءالى دە قارۋ بار. سوندىقتان ءبىز اعىمداعى جىلى دا وسى ماقساتقا اقشا سۇراپ وتىرمىز. ازاماتتارعا قارۋلارىڭىز بولسا تاپسىرۋعا تاعى دا ءوتىنىش جاساعىم كەلەدى. ەگەر ءوزىمىز تاباتىن بولساق، وندا قىلمىستىق جاۋاپكەرشىلىككە تارتامىز. اكسيا بار كەزدە قايتارۋلارىڭىزدى سۇرايمىن»، - دەدى ول.