قازاقستاندىق «سيقىرلى كىلت» مۋلتفيلمىنىڭ تۇساۋى كەسىلدى
«جىبەك جولى» ويىن- ساۋىق ورتالىعىندا اتالمىش تۋىندىنىڭ تۇساۋى كەسىلىپ، كورەرمەن نازارىنا ۇسىنىلدى، دەپ حابارلايدى قازاقپارات ءتىلشىسى.
«سيقىرلى كىلت» مۋلتفيلمى قىزىلوردانىڭ 200 جىلدىق مەرەيتويىنا ارنالىپ ازىرلەنگەن. انيماتسيالىق تۋىندى قالانىڭ تاريحى مەن كورىكتى جەرلەرىنەن سىر شەرتەدى. وندا بۇلدىرشىندەر سىر ەلىندە دۇنيەگە كەلگەن اتاقتى تۇلعالاردىڭ ءومىرى مەن قىزمەتىنەن مول ماعلۇمات الا الادى. وسىلايشا مۋلفيلمدى ازىرلەگەن ماماندار بالالارعا تۋعان ولكەنىڭ ەرەكشەلىكتەرىن ايرىقشا تاسىلمەن جەتكىزەدى.
«سيقىرلى كىلت» مۋلتفيلمىن ەفيرگە ازىرلەۋگە اۆتوردىڭ 6 اي ۋاقىتى كەتكەن. جۇمىس پروتسەسىنە تاريحشىلار مەن ۇزدىك پەداگوگتار دا تارتىلعان. تانىمال ارتىستەر تۋىندى كەيىپكەرلەرىن دىبىستاپ، ءوز وبرازدارىن ءساتتى ورىنداپ شىققان.
«مۋلتفيلمدى ولكەتانۋ باعىتىنداعى ءاربىر ساباقتا پايدالانۋعا بولادى. «Bilim Foundation» قوعامدىق قورى دەمەۋشىلىك جاساپ، ءبىزدىڭ باستامامىزعا قولداۋ ءبىلدىردى. بۇرىن ءبىز قىسقا قازاقشا مۋلتفيلمدەردى جاساپ كەلگەن بولاتىنبىز. «سيقىرلى كىلت» - بۇل تولىقمەتراجدى تاقىرىپتىق دۇنيە بولىپ شىقتى. كورەرمەندەردىڭ كوڭىلىنەن شىققانىنا قۋانىشتىمىز. الداعى ۋاقىتتا دا اۋقىمدى جوسپارلارىمىز بار»، - دەدى انيماتسيالىق فيلمنىڭ اۆتورى سىمبات ءابدىراحمانوۆا.
اۆتور: اينۇر تولەشوۆا