استانا ىرگەسىندەگى اۋىل ەكى كۇنگە كوشپەندىلەر مەكەنىنە اينالادى
ەلوردا اكىمدىگىنىڭ رەسمي سايتىندا ءمالىم ەتىلگەندەي، بيىل فەستيۆال استانانىڭ 20 جىلدىعىنا ارنالماق. شارانى «KazakhTourism ۇ ك» ا ق ەلوردا اكىمدىگى مەن الماتى وبلىسى اكىمدىگىنىڭ قولداۋىمەن ۇيىمداستىرۋدا.
فەستيۆالدىڭ باعدارلاماسىنا كاسىبي ساداقشىلاردىڭ، كوكپارشىلاردىڭ، بۇركىتشىلەردىڭ سايىسى كىرەدى. قوناقتار العاش رەت ساۋىت-سايماندارى تاريحي دەرەككوزدەرگە نەگىزدەلىپ جاسالعان باتىرلاردىڭ كورسەتىلىمدىك جەكپە-جەگىن تاماشالاي الادى. سونداي-اق باتىرلاردىڭ شاباندوزدىق جانە ات ۇستىندە شايقاسۋ ونەرى كورسەتىلەدى.
فەستيۆال قوناقتارى كوشپەندىلەردىڭ تۇرمىسىمەن تانىسۋعا، قازاقستاندىق قولونەرشىلەردىڭ شەبەرلىك-ساباقتارىن الۋعا مۇمكىندىك الادى.
اتاپ ايتقاندا، كيىز باسۋ، بىلعارىمەن، كۇمىسپەن، كوزەشى ۇرشىعىمەن جۇمىس ىستەۋدى ۇيرەنۋگە، كوشپەندىلەردىڭ تاريحىمەن ساق، قاڭلى، ءۇيسىن، عۇن، سكيف، سارمات، تيگراحاۋدا، ماسساگەت داۋىرلەرىنىڭ كوستيۋمدى كورسەتىلىمى ارقىلى تانىسۋعا، بۇركىتشىلەردىڭ شەبەرلىگى مەن اۋشى قۇستاردىڭ سۇلۋلىعىنا تامسانا الادى. وسىلايشا سان قىرلى ەتنو مادەنيەتتى سەزىنىپ، حالىقتىڭ ءومىرى مەن سالت-داستۇرلەرى تۋرالى جاڭا بىلىممەن وزدەرىن بايىتا الادى.
بۇدان بولەك، الەمگە تانىمال ەتنو-مۋزىكا ورىنداۋشىلارىنىڭ قاتىسۋىمەن مۋزىكالىق باعدارلاما ازىرلەنەدى.