جىل باسىنان بەرى جەمقورلار قانشا اقشا ۇرلادى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى سوڭعى بەس ايدىڭ جۇمىسىن قورىتىندىلادى، دەپ حابارلايدى قازاقپارات ءتىلشىسى.

اگەنتتىكتىڭ رەسمي وكىلى نۇرلان جاحيننىڭ ايتۋىنشا، جىل باسىنان بەرى ماتەريالدىق شىعىننىڭ كولەمى 7 ميلليارد تەڭگەنى قۇرادى.

بىلتىر اتالعان كورسەتكىش 2,1 ميلليارد تەڭگە بولعان. بيىل 6,3 ميلليارد تەڭگە بيۋدجەتكە قايتارىلدى. «سىبايلاس جەمقورلىققا قارسى قىزمەت 477 لاۋازىمدى تۇلعانىڭ قىلمىسىن اشكەرەلەدى. ولاردىڭ ىشىندە رەسپۋبليكالىق دەڭگەيدەگى 13 باسشى، وبلىستىق - 39، قالالىق جانە اۋداندىق دەڭگەيدەگى 71 باسشى بار. 146 ادام ۇيىمداسقان قىلمىستىق توپتى قۇرىپ، ارەكەت ەتكەن. مەملەكەتتىك باعدارلامالارعا بولىنگەن بيۋدجەت قارجىسىن ماقساتسىز جۇمساۋ فاكتىلەرى دە انىقتالدى. ونداي ءتارتىپ بۇزۋشىلىقتاردىڭ باسىم بولىگى «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ»، «وڭىرلەردى دامىتۋ - 2020»، «نۇرلى جول»، ءبىلىم جانە عىلىم باعدارلامالارى بويىنشا تىركەلگەن. جەمقورلار كوپ جاعدايدا قۇرىلىس نىساندارىنىڭ جالعان اكتىلەرىن راسىمدەپ جاتادى. سوسىن بيۋدجەت اقشاسىن تاراتقانى ءۇشىن، سونداي- اق، جەر تەلىمدەرىن بەرگەنى ءۇشىن پارا الىپ وتىرادى. ءسويتىپ، مەملەكەتتىڭ اقشاسىن تالان- تاراجعا سالادى»، - دەدى ن. جاحين استانادا وتكەن باسپا ءسوز ءماسليحاتىندا.

رەسمي مالىمەتكە سايكەس، سوڭعى بەس ايدىڭ ىشىندە 1418 قىلمىستىق ءتارتىپ بۇزۋشىلىقتار تىركەلدى. سونىڭ جارتىسى پارا الۋعا قاتىستى بولسا، قالعانى - اقشانى ءىرى كولەمدە جىمقىرۋ فاكتىلەرى. «نەگىزى، بيۋدجەت قاراجاتىن تالان- تاراجعا سالۋ فاكتىلەرى 13 پروتسەنتكە ارتىپ وتىر. سونىڭ ىشىندە ءىرى كولەمدە اقشا ۇرلاۋ فاكتىلەرى دە كوبەيدى. وسىنىڭ ءوزى سىبايلاس جەمقورلىققا قارسى كۇرەستىڭ كۇشەيگەنىن كورسەتسە كەرەك»، - دەپ اتاپ كورسەتتى ن. جاحين.

ايتا كەتەيىك، بۇگىن اگەنتتىك وكىلدەرى پارامەن ۇستالعان بىرنەشە شەنەۋنىكتىڭ ۆيدەوسىن جاريالادى. ولاردىڭ ىشىندە ق ر سىرتقى ىستەر مينيسترلىگىنىڭ بۇرىنعى جاۋاپتى حاتشىسى، سونداي-اق «كەدەنترانسسەرۆيس» ا ق ۆيتسە-پرەزيدەنتى بار.

بۇدان بولەك، جامبىل وبلىسىندا تۇرمە باستىعىنىڭ ورىنباسارى العان پارانىڭ ۆيدەوسى كورسەتىلدى.