+7 (701) 759 90 19 Лента
4 °С : استانا
12 °С : الماتى
USD 361.15 EUR 414.71
RUB 5.53 CNY 52.07
جاڭالىقتار

اۋقىمدى جوبا «قازاق حاندىعى» سەريالىنىڭ ەكىنشى ماۋسىمى قالاي ءتۇسىرىلىپ جاتىر

13 ماۋسىم 10:44 522
:ءبولىسۋ
اۋقىمدى جوبا «قازاق حاندىعى» سەريالىنىڭ ەكىنشى ماۋسىمى قالاي ءتۇسىرىلىپ جاتىر

استانا. قازاقپارات - «قازاق حاندىعى. التىن تاق» اتتى اۋقىمدى جوبانىڭ ەكىنشى ماۋسىمىنىڭ تۇسىرىلىمدەرى وسى كۇندەرى وڭتۇستىك قازاقستان وبلىسى تۇلكىباس اۋدانىندا ءجۇرىپ جاتىر، دەپ حابارلايدى قازاقپارات ءتىلشىسى.

 اۋقىمدى تاريحي جوبانىڭ اۆتورى - ق ر پرەزيدەنتى نۇرسۇلتان نازاربايەۆ. كوپ سەريالى فيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا «Centaurus Rustem Abdrashev production» ج ش س- ءنىڭ قاتىسۋىمەن ش. ايمانوۆ اتىنداعى «قازاق فيلم» كينوستۋدياسى تۇسىرۋدە.

 كينوستۋديانىڭ باسپا ءسوز قىزمەتىنەن ءمالىم ەتكەندەي، تاريحي كينونىڭ تۇسىرىلىمدەرى الماتى وبلىسىندا بيىلعى مامىر ايىنىڭ باسىندا باستالعان. كەيىنىرەك ءتۇسىرىلىم توبى وڭتۇستىك قازاقستان وبلىسىندا ورنالاسقان «ەلتاي» اۋىلى ماڭىنداعى «ءيىر سۋ» جايلاۋىنا اۋىسقان. ءدال وسى جەردە ءتۇسىرىلىم توبى رەجيسسەر رۇستەم ابدىراشيەۆتىڭ باستاۋىمەن كەرەي مەن جانىبەك حانداردىڭ تۇراعىن - تورەلەردىڭ اۋىلىن جاساپ شىققان. شايباندار مەن قازاق حاندىعىنىڭ ۇلكەن ۇرىس ساحناسى دا وسىندا تۇسىرىلگەن.


اۋقىمدى جوبا «قازاق حاندىعى» سەريالىنىڭ ەكىنشى ماۋسىمى قالاي ءتۇسىرىلىپ جاتىر

«ەكىنشى ماۋسىمنىڭ اتى ايتىپ تۇرعانداي «قازاق حاندىعى. التىن تاق». قازاق حاندىعىنداعى ەڭ ءبىر كۇردەلى كەزەڭدەردىڭ ءبىرى. جانىبەك پەن كەرەيدىڭ ءابىلقايىر شايباني ۇرپاقتارىمەن قازاق حاندىعىنىڭ سىعاناقتاعى تاعى ءۇشىن تاق تالاسى. بۇل ماۋسىمدا تاقتى، اق وردانىڭ استاناسى سىعاناقتى قايتارۋ سىندى ماڭىزدى وقيعالاردىڭ اينالاسىندا ءوربيدى. ءبىرىنشى ماۋسىممەن سالىستىرعاندا بۇل ارينە الدەقايدا قىزىعىراق، ديناميكاسى جاعىنان جىلدام. ەكشن كوپ بولادى. كورەرمەنگە قىزىقتى بولادى دەگەن ويدامىن. سسەناري تاريحي نەگىزدە جازىلدى. ءبىراق جاستارعا قىزىق بولۋ ءۇشىن سول زاماننىڭ كوپتەگەن وقيعالارىن قايتادان «تىرىلتۋگە» تىرىستىق. ءساتىن سالسا تۇركىستانعا بارىپ، سوڭعى، نەگىزگى ەپيزودتاردى تۇسىرەمىز»، - دەدى رۇستەم ابدىراشيەۆ.


اۋقىمدى جوبا «قازاق حاندىعى» سەريالىنىڭ ەكىنشى ماۋسىمى قالاي ءتۇسىرىلىپ جاتىر

 ەكىنشى ماۋسىمداعى وقيعا جەلىسى 1470 پەن 1485 -جىلدار ارالىعىندا ءوربىپ، جانىبەك حاننىڭ قايتىس بولۋىمەن اياقتالادى. رەجيسسەردىڭ ايتۋىنشا، نەگىزگى اكتەرلىك قۇرامعا ەكىنشى پلانداعى 5 - 6 كەيىپكەر قوسىلعان.

 ال جوبانىڭ باس پروديۋسەرى ارمان اسەنوۆتىڭ سوزىنە سەنسەك، ەسەنبەرليننىڭ كىتابى دا ءتۇسىرىلىم توبى ءتۇسىرىپ جاتقان كەزەڭمەن اياقتالادى. فينالدا جانىبەك قايتىس بولىپ، تاققا بۇرىندىق وتىرادى. ءبىرىنشى ماۋسىم نەگىزىنەن الماتى وبلىسىندا تۇسىرىلگەن بولاتىن. ال ەكىنشى ماۋسىمدا وڭتۇستىك قازاقستاندا ءتۇسىرۋ تۋرالى شەشىم قابىلدانعان.

 «وبلىستىڭ باسشىلىعىمەن تەز ءتۇسىنىسىپ كەتتىك، ولار تاراپىنان قولداۋ الدىق. تاريحي فيلمدەردى ءتۇسىرۋ بارىسىندا ەڭ باستىسى بۇگىنگى ادامزاتتىڭ ءىس- ارەكەتىنىڭ بەلگىلەرى بولماۋى ءتيىس. ءبىز ىزدەگەن لوكاتسيانى وسى جەردەن تاپتىق. جالپى تاريح بويىنشا ۇرىستار وسى ماڭداردا ورىن العان. قازاق حاندىعى قاراتاۋ بوكتەرىندە نەگىزى قالاندى. بىلتىر قىستا ءبىز وسى كيىز ۇيلەر مەن شاتىرلاردى «قازاق فيلمنىڭ» تەرريتورياسىنا تۇرعىزىپ، مونولوگتار مەن ديالوگتاردى ءتۇسىرىپ قويعانبىز. تۇلكىباستا تەك كوپشىلىك ساحنالاردى ياعني - اۋىل كورىنىسىن، كەلۋ، كەتۋ، كيىز ۇيگە كىرۋ، ۇرىس ساحنالارى مەن جەكپە- جەكتەر وسىندا ءتۇسىرىپ جاتىرمىز»، - دەدى باس پروديۋسەر ارمان اسەنوۆ.

پروديۋسەردىڭ ايتۋىنشا بۇگىنگى تاڭدا 10 سەريالى فيلمنىڭ 8 سەرياسى تۇسىرىلگەن. سونىمەن قاتار، تۇسىرىلىمدەر قازاقستاننىڭ تاريحي قالالارى - تۇركىستان مەن تارازدا دا جۇرەدى. اتالعان قالالاردا ماڭىزدى ساحنالاردى قوياتىن بولادى. سەريالدىڭ سوڭعى ءتۇسىرىلىم جۇمىستارى «قازاق فيلمنىڭ» پاۆيلوندارىندا وتەدى.

اۆتور: ايان بەكەن ۇلى


باستى سوزدەر: مادةنيةت, قوعام,
:ءبولىسۋ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049
رەداكتور
باقىتجول كاكەش
باقىتجول كاكەش
954-049
مۇراعات