ەرەكشە قابىلەتتى ەگىزدەر گيننەستىڭ رەكوردتار كىتابىنا ەندى - شەتەلدەگى قازاق ءتىلدى ب ا ق- قا شولۋ
قىتايدىڭ حاڭجوۋ قالاسىندا ەڭ جاڭا ۇلگىدەگى ءورت ءسوندىرۋ روبوتى پايدالانۋعا بەرىلدى - تيانشاننەت
قىتايدىڭ حاڭجوۋ قالاسىندا ەڭ جاڭا ۇلگىدەگى ءورت ءسوندىرۋ روبوتى پايدالانۋعا بەرىلدى، دەپ حابارلايدى kazakh.ts.cn سايتى.
العاشقى كۇنى ءبىر توپ جاڭا ۇلگىدەگى ءورت ءسوندىرۋشى روبوت ماشينالارى حاڭجوۋ قالاسىنا قاراستى شياۋشان اۋدانىندا پايدالانۋعا بەرىلگەن. بۇل ەرەكشە قۇلتەمىرلەردىڭ ءورت ءسوندىرۋ، جارىلستان ساقتانۋ، سونداي-اق بارلاۋشىلىق سىندى ءارتۇرلى ەرەكشەلىكتەرى بار. وڭاي جارىلاتىن، ۋلى نەمەسە وتتەگى جەتىسپەيتىن ورىنداردا ءورت سوندىرۋدە اتالعان قۇرالدىڭ ءرولى ەرەكشە ەكەندىگى ايتىلعان.
ازەربايجان يۋنەسكو-گە قاتىستى كوميتەتكە سايلاندى - TRT
ازەربايجان 2018-2022 -جىلدارىن قامتيتىن كەزەڭدە يۋنەسكو ماتەريالدىق ەمەس مادەني مۇرانىڭ قورعالۋى كەلىسىمى اراسىندا ۇكىمەتتەر كوميتەتىنىڭ مۇشەلىگىنە سايلاندى.
بۇل تۋرالى وسى اپتادا تۇركيا تەلە-راديو مەكەمەسىنىڭ رەسمي پورتالى حابارلادى.
ازەربايجان سىرتقى ىستەر جانە مادەنيەت مينيسترلىكتەرىنىڭ ورتاق مالىمدەمەسىندە پاريجدە ماتەريالدىق ەمەس مادەني مۇرانىڭ قورعالۋى كەلىسىمىنە تاراپ ەلدەردىڭ 7-جالپى جينالىسىندا ءازىربايجاننىڭ ۇكىمەتتەر اراسىنداعى كوميتەتكە سايلانعانى ايتىلعان.
بەلارۋس، گرۋزيا، پولشا، سلوۆاكيا، رۋمىنيا جانە ماكەدونيا دا كانديدات بولعان سايلاۋدا ازەربايجان 9 داۋىس جيناعان.
ەندى ازەربايجان كوميتەت مۇشەسى رەتىندە 2018-2022 -جىلدار اراسىندا باسقا دا ەلدەرمەن بىرگە الەمدە ماتەريالدىق ەمەس مادەني مۇرانىڭ قورعالۋىنا ۇلەس قوساتىنىن جازادى تۇركيالىق ب ا ق.
ەسكە ساقتاۋ قابىلەتتەرى ەرەكشە ەگىزدەر گيننەستىڭ رەكوردتار كىتابىنا ەندى - kaznews.mn
ەسكە ساقتاۋ قابىلەتتەرى ەرەكشە موڭعوليالىق ەگىز قىز ن. ءمونحشۇر مەن ن. ءەنحشۇر گيننەستىڭ رەكوردتار كىتابىنا تىركەلدى.
بۇل تۋرالى وسى اپتادا kaznews.mn اقپاراتتىق پورتالى جاريالادى.
موڭعول سپورتشىسى ن. ءمونحشۇر 30 مينۋتتىڭ ىشىندە ەش قاتەلىك جىبەرمەي 5445 ساندى ەسىنە ساقتاپ العان. ونىڭ سىڭارى ن. ەنحشۋر 60 مينۋتىڭ ىشىندە ەسىنە ساقتاپ العان 1924 كارتادان تۇراتىن جيىنتىقتى رەت- رەتىمەن ساناپ بەردى.
ايتا كەتەيىك، الەمدىك رەكوردتارعا قول جەتكىزىپ جۇرگەن ەگىز قىزداردىڭ زياتكەرلىك سپورت تۇرىمەن اينالىسقاندارىنا ءبىر جىل عانا بولعان.
ياو پەيشەن: قازاقستان «جىبەك جولى ەكونوميكالىق بەلدەۋى» باعدارلاماسىن تۇڭعىش ورتاعا قويعان ەل - قىتايدىڭ «ورتالىق حالىق راديوسى» (CNR)
الداعى 9-10 -ماۋسىمدا قىتايدىڭ شانشي پروۆينسياسىنداعى چيڭداۋ قالاسىندا بولاتىن شاڭحاي ىنتىماقتاستىق ۇيىمى (ش ى ۇ) سامميتىنە وراي قىتايدىڭ قازاقستانداعى بۇرىنعى باس ەلشىسى ياو پەيشەن «قىتاي ءۇنى» راديوسىنا بەرگەن سۇحباتىندا شاڭحاي ىنتىماقتاستىق ۇيىمىنا قاتىستى وزەكتى ماسەلەلەردى تانىستىردى.
بۇل تۋرالى وسى اپتادا قىتايدىڭ تانىمال اقپارات كوزدەرىنىڭ ءبىرى CNR اقپاراتتىق پورتالى حابارلاعان بولاتىن.
«قازاقستان «جىبەك جولى ەكونوميكالىق بەلدەۋى» باعدارلاماسىن تۇڭعىش ورتاعا قويعان مەملەكەت ءارى قىتايدىڭ باتىس جەلىسىندەگى قۇرلىقتى ءوزارا جالعاستىراتىن العاشقى ايالداما. ەكى جاقتىڭ ىنتىماقتاستىعى ەۋروپا مەن ازيا «جىبەك جولى ەكونوميكالىق بەلدەۋى» قۇرىلىسىنىڭ تۇتاس بارىسىنا سايادى» . قىتايدىڭ قازاقستانداعى بۇرىنعى باس ەلشىسى بولعان ياو پەيشەن «قىتاي ءۇنى» راديوسىنا بەرگەن سۇحباتىندا وسىلاي دەگەن.
ياو پەيشەن سوڭعى كەزدەرى ەكى مەملەكەتتىڭ اراسىنداعى وڭدى وزگەرىستەرگە كۋا بولعان ساتتەردى ەسكە الادى. بۇرىن قازاقستاندا قىتايلىق يۋاندى ايىرباستاۋ قيىن بولعانىن، قازىر ا ق ش دوللارىن، يۋاندى، ەۆرونى ايىرباستاۋ وتە وڭاي، سوندىقتان قىتاي اقشاسىن ىستەتۋگە قولايلىلىق جاراتىلدى. بۇنىڭ ءبارى قارجىنى تۇتاستىرۋدىڭ جەمىسى ەكەنىن العا تارتادى ەكس-ەلشى.
بۇل سۇحباتىندا ياو پەيشەن ەكى ەل اراسىنداعى قارىم-قاتىناستىڭ جىل ساناپ جەدەل العا جىلجىپ كەلە جاتقانىن دا ايتقان.
«قىتاي مەن قازاقستاننىڭ ەكونوميكالىق جاقتاعى ىنتىماقتاستىعى كورنەكتى ءارى جەدەل دامىعانىن، جاراتىلىستىق بايلىعى مول، ەڭ ۇلكەن ىشكى قۇرلىقتىق ەل بولعان قازاقستاننىڭ قىتايمەن، اۋەلى ش ى ۇ- نا مۇشە ەلدەرمەن بولعان ناقتى ىقپالداستىقتا بارلىق كاسىپتەردى جانە تاراۋلاردى، ءتىپتى اسكەري ونەركاسىپ جانە عىلىم- تەحنيكانىڭ ءار سالاسىن قامتىدى»، - دەيدى ياو پەيشەن.
ول جاقىندا پرەزيدەنت نازاربايەۆتىڭ «باتىس قىتاي - باتىس ەۋروپا» اۆتوموبيل كولىك جولى ءدالىزى تۋرالى ايتقان پىكىرىن قۇپتايتىنىن العا تارتادى.
«وندا قازاق باسشىسى قىتايدىڭ باتىسىنان ەۋروپانىڭ باتىس بولىگىنە تۇتاساتىن ەڭ ۇزىن تاسجول قازاقستان جەرىن جەرىن باسىپ وتەتىنىن، بۇدان كەيىن ەكى ەل اراسىنداعى تاسىمال مولشەرى بارعان سايىن كەڭەيەتىنى، ەكى مەملەكەتتىڭ ەكونوميكالىق ىقپالداستىعى بارىنشا نىعايا تۇسەتىنىن ايتقان بولاتىن»، دەپ جازادى قىتايلىق ب ا ق.
قازاقستاندا يراندىقتارعا ەسكەرتكىش ورناتىلدى - «فارس» اقپارات اگەنتتىگى
بۇل اپتادا قازاقستانداعى ءوز وتانداستارىنا ەسكەرتكىش قويىلعانىن يراندىق اقپارات كوزدەرى دە ەسكەرۋسىز قالدىرعان جوق. سولاردىڭ ءبىرى parstoday اقپارات اگەنتتىگى ەكەنىن ايتا كەتكەن ءجون.
اتالعان ب ا ق-تا ستالين كەزىندە كەڭەس وداعىنىڭ لاگەرلەرىندە قۇربان بولعان يراندىقتارعا ارنالعان ەسكەرتكىش قازاقستاندىق ساياسي قايراتكەرلەردىڭ قاتىسۋىمەن اشىلعانى تۋرالى اقپاراتتى وقىرماندارىمەن ءبولىستى.
«فارس» اقپارات اگەنتتىگى ەسكەرتكىش قاراعاندى قالاسىنان 30 كيلومەتر جەردە ورنالاسقان سپاسسك ايماعىندا باسقا ەلدەر ورناتقان 28 ەسكەرتكىشتىڭ قاسىنا ورناتىلعانىن، ەسكەرتكىش 1936-1946 -جىلدارى اباقتىلاردا قازا بولعان يراندىقتاردى ەسكە سالعانىن جازادى.
ايتا كەتۋ كەرەك، كەڭەس وداعى كەزىندە 12 مىڭنان استام يراندىق قىزىل ارميانىڭ قولىنا ءتۇسىپ، لاگەرلەر مەن اباقتىلارعا اۋىستىرىلدى، ولاردىڭ التى مىڭنان استامىنا ءولىم جازاسىنا كەسىلدى.
اپپاق قاردا قۇلپىرا اشىلعان قىزعالداق تۋريستەردى تاڭداندىردى - تيانشاننەت
ق ح ر- دىڭ شونجى اۋدانى جامبۇلاق كورىنىس وڭىرىندەگى قىزعالداق گۇلى قاردا قۇلپىرا اشىلدى.
كوكتەم ماۋسىمىنىڭ قۇبىلمالى اۋا رايىنىڭ اسەرىنەن مامىر ايىنىڭ سوڭعى كۇندەرى شىنجاڭ ولكەسىنە قاراستى شونجى اۋدانى جامبۇلاق كورىنىس اۋدانىندا قار جاۋعان. اق ۇلپا جامىلعان كەڭ دالاداعى 1 ميلليون 500 مىڭعا جۋىق قىزعالداق گۇل قار اراسىندا قۇلپىرا اشىلىپ، تاماشالاۋعا كەلگەن تۋريستەردى وزىنە باۋرادى.
بۇل تۋرالى وسى اپتادا «تيانشاننەت» اقپاراتتىق پورتالى حابارلاعان بولاتىن.
«جامبۇلاق ءسوزى قازاق تىلىندە «كيەلى باستاۋ» دەگەن ماعىنا بىلدىرەدى. شىنجاڭنىڭ شونجى اۋدانىنداعى جامبۇلاق كورىنىس رايونىنىڭ جالپى كولەمى 48 شارشى كيلومەتر. ول تيانشان تاۋىنىڭ «بيداي تەڭىزى»، «گۇل تەڭىزى»، «تيانشاننىڭ عاجايىپ بەتكەيى»، «توعىز بىرلەسكەن كول» قاتارلى كورىنىستەردى قامتىعان مەملەكەتتىك ورمان باقشاسى ءارى مەملەكتتىك AAAA دارەجەلى(مەملەكەتتىك ەكىنشى دارەجەلى ستاتۋس - اۆت. ) كورىنىس اۋدانى» دەپ جازدى قىتايلىق ب ا ق.
