مەملەكەتتىك قىزمەتشىلەردىڭ جالاقىسى كوبەيەدى - اليك شپەكبايەۆ

استانا. قازاقپارات - كەلەسى جىلى قازاقستاندا مەملەكەتتىك قىزمەتشىلەر جالاقىسىن تولەۋدىڭ جاڭا جۇيەسى ەنگىزىلەدى. بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ ءتوراعاسى اليك شپەكبايەۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىندە ءبىز ەڭبەكاقى تولەۋدىڭ جاڭا جۇيەسىن اپروباتسيالاپ جاتىرمىز. فاكتورلىق- بالدىق شكالا نەگىزىندەگى بۇل جۇيە پيلوتتىق ورگاندارداعى لاۋازىمدىق جالاقىنى ەكى ەسەگە دەيىن كوبەيتۋگە مۇمكىندىك بەرەدى. كەلەسى جىلى ءبىزدىڭ باستامامىز، ياعني پيلوتتىق جوبامىز اياقتالادى. سايكەسىنشە، قازاقستاننىڭ بارلىق مەملەكەتتىك قىزمەتشىلەرىنىڭ جالاقىسى كوبەيەدى»، - دەدى اليك شپەكبايەۆ استانادا مەملەكەتتىك قىزمەتتى جەتىلدىرۋگە ارنالعان حالىقارالىق كونفەرەنسيادا.

اگەنتتىك ءتوراعاسى ەڭبەكاقى تولەۋدىڭ جاڭا تالاپتارى تۋرالى ايتا كەلە، ماتەريالدىق- الەۋمەتتىك قامسىزداندىرۋدىڭ سىبايلاس جەمقورلىقتى ازايتۋعا سەپتىگىن تيگىزەتىنىن اتاپ ءوتتى.

«بۇدان بىلاي ەڭبەكاقى كولەمى جۇمىس سيپاتىنا جانە كۇردەلىلىگىنە، تيىمدىلىكتىڭ ناقتى كورسەتكىشتەرىنە قول جەتكىزۋگە تىكەلەي بايلانىستى بولادى. ارينە، ماتەريالدىق جانە الەۋمەتتىك قامسىزداندىرۋ سىبايلاس جەمقورلىق دەڭگەيىن تومەندەتۋگە ىقپال ەتەدى. وسىعان بايلانىستى اگەنتتىك ورتالىق اپپاراتتاعى شتات سانىنىڭ ۇشتەن ءبىر بولىگىن قىسقارتتى، بۇل ارقىلى قىزمەتكەرلەردىڭ جالاقىسىن % 60 دەيىن كوبەيتتىك»، - دەپ تۇيىندەدى ءسوزىن اليك شپەكبايەۆ.

اۆتور: ايجان سەرىكجان قىزى