بۋراباي ت م د ەلدەرى اراسىندا ەڭ تانىمال كۋرورتتاردىڭ كوشىن باستادى

كوكشەتاۋ. قازاقپارات - بۋراباي كۋرورتى رەسەيلىك تۋريستەردىڭ پىكىرى بويىنشا ت م د ەلدەرى اراسىنداعى ەڭ تانىمال كۋرورتتاردىڭ ءبىرى، دەپ حابارلايدى قازاقپارات ءتىلشىسى تۋرستات ساراپتامالىق اگەنتىگىنە سىلتەمە جاساپ.

اگەنتتىك بيىلعى جازدا رەسەي تۋريستەرى دەمالاتىن ت م د ەلدەرىندەگى تانىمال كۋرورتتاردىڭ رەيتينگىن جاسادى. ونىڭ ىشىندە قازاقستانداعى بۋراباي، قىرعىزستانداعى ىستىقكول، بەلارۋستاعى ناروچ كولى، كاسپي تەڭىزى جاعالاۋىنداعى ءازىربايجاننىڭ استاناسى باكۋدەگى بيلگيا جاعاجايى جانە ارمەنياداعى سيەۆان كولى تۋريستەر دەمالاتىن كۋرورورتتى ورىنداردىڭ العاشقى بەستىگىنە ەندى.

رەيتينگ اتالمىش كۋرورتتارعا تۋريستەردىڭ بارۋى بويىنشا تالداۋ قورىتىندىسى ناتيجەسىندە شىعارىلدى.

تۋرستات اگەنتتىگىنىڭ دەرەگى بويىنشا، ت م د ەلدەرى كۋرورتتارىنا رەسەيلىك تۋريستەر جازعى ماۋسىم كەزىندە 7 جانە 14 كۇن ارالىعىندا دەمالادى.

ت م د ەلدەرىندەگى كۋرورتتاردا دەمالۋ تۋريستەر ءۇشىن تاۋلىگىنە 50-100 دوللاردى قۇرايدى. ارزانى ىستىقكولدە-50 دوللار، باكۋدەگى بيلگيا جاعاجايىندا - 100 دوللار، بۋرابايدا - 80 دوللار. ت م د ەلدەرىندەگى كۋرورتتارعا ماسكەۋ، ماسكەۋ ماڭى، سانكت- پەتەربۋرگ، وڭتۇستىك ورال جانە سىبىردەن كەلەتىن رەسەيلىك تۋريستەر كوپ بارادى.

رەسەيلىك تۋريستەر ءۇشىن ت م د- عا تانىمال 5 كۋرورت.

1. قازاقستانداعى بۋراباي كۋرورتى.

2. قىرعىزستانداعى ىستىقكول.

3. بەلارۋسياداعى ناروچ كولى.

4. ءازىربايجاننىڭ استاناسى باكۋدەگى بيلگيا جاعاجايى.

5. ارمەنياداعى سيەۆان كولى.

 

اۆتور: اسلان وسپانوۆ