جاقىپ اسانوۆ: سوتقا سەنىم جوق جەرگە ەشكىم دە ينۆەستيسيا سالمايدى
«سوتقا سەنىم جوق جەرگە ەشكىم دە ينۆەستيسيا سالمايدى. ءبىز مويىندايمىز - ءبىزدىڭ سوتتار ءمىنسىز ەمەس. سوتتاردىڭ تاۋەلدى ەكەنى تۋرالى، جەمقورلىققا ورىن بەرىلەتىنى تۋرالى پايىمدار بار. ءبىراق، بۇل رەتتە ءبىز ەشقانداي دا بىرەگەي ەمەسپىز. بۇنداي ماسەلە ەكونوميكاسى دامىپ كەلە جاتقان بارلىق مەملەكەتتە دە بار. الايدا قازاقستاندى وزگە مەملەكەتتەردەن نە ەرەكشەلەندىرىپ تۇر؟ ءبىزدىڭ پرەزيدەنت ينۆەستيسيالىق ءادىل سوتتى ەنگىزدى. ساراپشىلار مۇنداي ەش جەردە جوق دەگەن پىكىرىن ايتىپ جاتىر. ونىڭ ماڭىزى نەدە؟ پىكىرتالاستار تەك ەلوردادا شەشىلەدى. شىعىن از، شەشىمدەر تەز اتقارىلادى. ەڭ باستىسى - ايماقتىق بيلىكتەردىڭ ارالاسۋىنا جول بەرىلمەيدى»، - دەيدى ول.
جاقىپ اسانوۆتىڭ ايتۋىنشا، 2018 -جىلى قارالعان 40 ءىستىڭ 74 پايىزى ينۆەستورلاردىڭ شاعىمى بولعان. ارتىنشا، ينۆەستورلاردىڭ پايداسىنا قۇنى 62 ميلليون ا ق ش دوللار بولاتىن ىستەردىڭ 38 پايىزى شەشىلگەن.
«ءبىزدىڭ شەشىمدەر سوت ءاردايىم مەملەكەتتى قولدايدى دەگەن تاپتاۋرىن تۇسىنىكتى جوققا شىعارادى. مەملەكەتتىك ورگاندار وزدەرىنىڭ قاتەلىكتەرىن سوتتاردىڭ قولىمەن شەشپەۋى كەرەك. مىنە، سوندىقتان ءبىز بۇگىن نە اتقارىپ جاتىرمىز؟ بىرىنشىدەن، الەمدىك تاجىريبەدە داۋدىڭ 25 پايىزى ءوزارا كەلىسىممەن شەشىلەدى. ءبىز دە وسى رەتتە مەدياتسيانى ەنگىزدىك. ەكىنشىدەن، ە ا ە و-دا ينۆەست-داۋلارعا قاتىستى ىستەردە ۇلتتىق سوتتاردىڭ ءرولى ارتىپ كەلەدى. بۇل دا ءبىزدىڭ جولىمىز. حالىقارالىق كەڭەستىڭ، ا ح ق و سوتىنىڭ ەڭ ۇزدىك تاجىريبەلەرىن وزىمىزگە ءسىڭىرىپ، حالىقارالىق قاعيداتتار مەن ستاندارتتاردى ەنگىزۋدەمىز»، - دەدى ول.
جاقىپ اسانوۆ ءوز سوزىندە قازاقستان پرەزيدەنتى نۇرسۇلتان نازاربايەۆتىڭ قولعا العان باعدارلامالارىنىڭ ارقاسىندا سوتتار قالاي وزگەرەتىنىن ايتىپ بەردى.
«الدىمەن، سوتتاردىڭ جوعارى كاسىبيلىگى ارتادى. قازىردىڭ وزىندە سۋديالاردىڭ ىرىكتەۋىن جۇرگىزىپ جاتىرمىز. ەكىنشىدەن، سوتتار تاۋەلسىز بولا تۇسەدى. سۋديالارعا ىقپال ەتۋ جولدارىن الىپ تاستاپ، تالقى تەك سوت زالىندا وتەتىنداي قامتاماسىز ەتەمىز. ول جەردە 100 پايىز اۋديو جانە ۆيدەوجازىلىم وتەدى. ۇشىنشىدەن، ادىلەتتىلىك. ءبىزدى ايىپتاۋ بولىگىنە باسا ماڭىز بەرەدى دەپ ايىپتاپ جاتادى. ءبىز وسى رەتتە بارلىق رەيتينگتەر مەن كورسەتكىشتەردى الىپ تاستادىق. ناتيجە: اقتالۋ ىستەرى ارتتى. تورتىنشىدەن، اشىقتىق. بارلىق سوت پروتسەستەردى سوتتىڭ سايتىندا كورۋگە بولادى. بەسىنشىدەن، ارتىق قاعازدان، پروتسەدۋرالاردان، كەزەكتەن بوساعان سوتتار اقىلدى بولا تۇسەدى. ونىڭ بارلىعى دا سوتتىڭ ەكوجۇيەسىن جاقسارتادى»، - دەدى جاقىپ اسانوۆ.
ەسكە سالا كەتسەك، بۇگىن استاناداعى «تاۋەلسىزدىك سارايىندا» پرەزيدەنت نۇرسۇلتان نازاربايەۆتىڭ قاتىسۋىمەن شەتەلدىك ينۆەستورلارى كەڭەسىنىڭ وتىرىسى ءوتىپ جاتىر.