شىمكەنتكە رەسپۋبليكالىق ماڭىزى بار قالا مارتەبەسىن بەرۋ ماسەلەسى تالقىلاندى
وندا قالا اكىمدىگى مەن ءماسليحاتتىڭ شىمكەنت قالاسىنا رەسپۋبليكالىق ماڭىزى بار قالا مارتەبەسىن بەرۋگە ۇسىنىس جاساۋ تۋرالى بىرلەسكەن شەشىمىنە قول قويىلدى. ەندى بۇل قۇجات وڭتۇستىك قازاقستان وبلىستىق ءماسليحاتىنىڭ قاراۋىنا ۇسىنىلادى، دەپ حابارلايدى قازاقپارات ءتىلشىسى.
قالالىق اكىمدىكتىڭ باسپا ءسوز قىزمەتىنىڭ مالىمەتىنشە، اتالعان ۇسىنىستى دەپۋتاتتار ءبىراۋىزدان قولداعان. ءارى رەسپۋبليكالىق ماڭىزى بار قالا مارتەبەسىنىڭ بەرىلۋى شىم شاھار ءۇشىن جاڭا مۇمكىندىكتەرگە جول اشپاق. مۇنداي وزگەرىس سونداي-اق قالانىڭ دامۋىنا، ءاربىر تۇرعىنىنا دا وڭ اسەرىن تيگىزەدى.
«سەسسيادا تاريحي قۇجاتقا قول قويىلدى، بۇل شىمكەنتتىڭ رەسپۋبليكالىق ماڭىزى بار قالا مارتەبەسىن الۋدا اۋقىمدى جۇمىستىڭ باستاۋى بولدى. جوسپارلار كوپ، ولاردىڭ بارلىعى ءماسليحات دەپۋتتارى مەن قالا تۇرعىندارىنىڭ قولداۋىمەن عانا جۇزەگە اسادى»، - دەدى سەسسياعا قاتىسقان قالا اكىمى نۇرلان ساۋرانبايەۆ.
ايتا كەتەيىك، «قازاقستان رەسپۋبليكاسىنىڭ 1993 -جىلى 8 -جەلتوقسانداعى №№2572- ХІІ «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» زاڭىندا رەسپۋبليكالىق ماڭىزى بار قالالارعا - حالقىنىڭ سانى ءبىر ميلليون ادامنان اساتىن ەلدى مەكەندەر جاتادى دەپ كورسەتىلگەن.
