مەملەكەتتىك حاتشى قۋعىن-سۇرگىن قۇرباندارى جەرلەنگەن «تۇيەتوبەگە» باردى
بۇگىن رەپرەسسيا قۇرباندارىنىڭ ۇرپاقتارى اتا-بابا رۋحىنا تاعزىم ەتتى، دەپ حابارلايدى قازاقپات ءتىلشىسى.
بۇگىن اقتوبەدە اشارشىلىق، قۋعىن-سۇرگىن قۇرباندارىن ەسكە الۋ شاراسى ءوتتى. مەملەكەتتىك حاتشى گۇلشارا ءابدىقالىقوۆا ساياسي قۋعىن-سۇرگىن قۇرباندارى جەرلەنگەن «تۇيەتوبە» ەسكەرتكىشىنە باردى.
«ەلباسى نۇرسۇلتان نازاربايەۆتىڭ «ءاربىر جۇرت تاريحتان وزىنشە تاعىلىم الادى» دەگەن ءسوزى بار. ءبىزدىڭ تاۋەلسىزدىككە دەيىنگى تاريحىمىزدا حالقىمىزدىڭ تارتقان قاسىرەتى از بولماعان. سونىڭ ەڭ قاسىرەتتى تۇسىنىڭ ءبىرى - ارىستارىمىز جاپپاي قۋعىن-سۇرگىنگە ۇشىراعان 1930-1950 -جىلدار. «جۇرت جەتى اعايىندى». قىناداي قىرىلعان اشارشىلىقتىڭ ارتىندا جۇرتتى جاپپاي جازالاۋ باستالدى. حالىق سانى كۇرت كەمىگەن وتكەن عاسىردىڭ 30-جىلدارى ۇلتىمىزدىڭ بەتكە ۇستار زيالى قاۋىمى كىناسىز اتىلدى. زۇلمات جىلداردىڭ جاڭعىرىعى حالىق جادىنان وشپەيدى. ازاتتىق الىپ، ەگەمەن ەل بولعالى جاقسىلار مەن جايساڭداردى تۇگەندەپ كەلەمىز. ساياسي قۋعىن-سۇرگىن قۇرباندارىن ەسكە الۋعا ارنالعان 31 -مامىر - بارشا قازاقستاندىقتار ءۇشىن قاستەرلى كۇن. بۇگىن ەلىمىزدىڭ تۇكپىر-تۇكپىرىندە 4 مىڭنان استام ءارتۇرلى ءىس-شارا جۇزەگە اسىرىلۋدا. ەل باسىنا كۇن تۋعان قارالى كەزەڭدە اقتوبە حالقىنىڭ دا تارتقان تاۋقىمەتى وراسان زور. سوندىقتان ءبىز مۇندا ءارۋاقتار الدىنداعى ادامي بورىشىمىزدى ورىنداپ، جازىقسىز جاپا شەككەن جانداردىڭ رۋحىنا تاعى ءبىر مارتە تاعزىم ەتەمىز. اقتوبە وبلىسىندا 8 مىڭداي ادام ساياسي قۋعىن-سۇرگىنگە ۇشىراعان. ولاردىڭ 2 مىڭنان استامى اتۋ جازاسىنا كەسىلگەن. اتۋ جازاسىنا كەسىلگەندەر وسى تۇيەتوبە سايىندا جەرلەنگەن. زۇلمات زامانداردا ارىستاردىڭ كورگەن قاسىرەتىن ىشكە بۇگىپ كەلدىك. سوندىقتان مۇنداي قاسيەتتى توپىراقتى قاستەر تۇتۋ ءبىزدىڭ پەرزەنتتىك پارىزىمىز»، - دەدى مەملەكەتتىك حاتشى گۇلشارا ءابدىحالىقوۆا.
«تۇيەتوبەگە» رەپرەسسياعا ۇشىراعان اقتوبەلىكتەردىڭ ۇرپاقتارى دا باردى.
«اشارشىلىق جىلىنان كەيىن امان قالعان ازاماتتاردىڭ كوپشىلىگى اتىلدى، ايداۋدا بولدى، زارداپ شەكتى. اتىلعان ازاماتتاردىڭ دەنى الاشتىڭ اردا ازاماتتارى ەدى. بۇل ءاربىر قازاقتىڭ وتباسىندا بولعان جاعداي عانا ەمەس، سول ۋاقىتتاعى ميلليونداعان باۋىرىمىزعا ورتاق قاسىرەت بولاتىن. بۇگىنگى كۇنى تاۋەلسىزدىكتىڭ ارقاسىندا «تۇيەتوبە» باسىنا كەلىپ، جىل سايىن تاعزىم ەتەمىز. اعام، ناعاشىم اتىلدى، ايداۋدا بولدى. ءبىرى تۇيەتوبەدە جاتىر. سوندىقتان ءبىز جىل سايىن وسى جەرگە كەلەمىز»، - دەدى اقتوبەلىك ارداگەر رومان راحيموۆ.
«تۇيەتوبەدە» رەپرەسسياعا ۇشىراعان ادامداردىڭ جەرلەنگەنى تۋرالى اقپارات 90-جىلدارى انىقتالىپ، ەسكەرتكىش قويىلدى. 1997 -جىلدان باستاپ اقتوبەلىكتەر جىل سايىن اتا-بابا رۋحىنا تاعزىم ەتۋ ءۇشىن ەسكەرتكىشكە جينالادى.
«ⅩⅩ عاسىر اشتىق پەن قۋدالاۋدان زارداپ شەككەن قازاق حالقى ءۇشىن ەڭ قيىن كەزەڭ بولدى. سول جىلدارى ءبىز حالىقتىڭ تاجىريبەسى مەن داستۇرلەرىنىڭ التىن قورىن جوعالتتىق. قازاقستاننىڭ تاۋەلسىزدىگى ارقاسىندا ءبىز جوعالتقانىمىزدى قالپىنا كەلتىرە الدىق، ءبىراق ءبىز تاريحتىڭ قايعىلى بەتتەرىن، ەلىمىزدىڭ بولاشاعى ءۇشىن ءوز ءومىرىن قۇربان ەتكەندەردى ۇمىتپاۋىمىز كەرەك. ءبىز ولاردىڭ الدىندا قارىزدارمىز. ءبىز جاس ۇرپاقتى وتانىنا دەگەن سۇيىسپەنشىلىك رۋحىنا تاربيەلەۋىمىز كەرەك. جاستار ءوز تاريحىن ۇمىتپاي، بىرلىك، دوستىق، تۇراقتىلىقتى ساقتاۋى كەرەك. توتاليتارلىق رەجىم قۇرباندارىنىڭ ەسىمى ءاردايىم ءبىزدىڭ جۇرەگىمىزدە تۇرادى»، - دەدى وبلىس اكىمى بەردىبەك ساپاربايەۆ.