كولىكتە ايەلدى بوساندىرىپ العان ب ق و تۇرعىنى: مەن ەرلىك جاساعانىم جوق
وسىعان وراي قازاقپارات ءتىلشىسى ەلىمىزدە تانىمال تۇلعاعا اينالىپ ۇلگەرگەن مەديتسينا سالاسىنىڭ قاراپايىم قىزمەتكەرىمەن تىلدەسكەن ەدى.
- ەلەنا سەرگەيەۆنا، الدىمەن ءوزىڭىزدىڭ ەڭبەك جولىڭىز تۋرالى ايتىپ بەرسەڭىز.
- مەنىڭ ەڭبەك جولىمنىڭ ءوز ارىپتەستەرىمنەن كوپ ەرەكشەلىگى جوق. وسى زەلەنوۆ اۋدانى جەلەزنوۆ اۋىلىندا دۇنيەگە كەلىپ، مەكتەپ ەسىگىن اشتىم. كەيىن اۋدان ورتالىعى پەرەمەتنىيعا اتا- اناممەن بىرگە كوشىپ كەلىپ، ءبىلىم الدىم. باتىس قازاقستان مەديتسينا كوللەدجىن 2009 -جىلى ۇزدىك بىتىرگەننەن بەرى اۋداندىق اۋرۋحانادا قىزمەت جاساپ كەلەمىن. باستاپقىدا اكۋشەر بولدىم، اعا مەدبيكە، باس مەدبيكە قىزمەتتەرىن اتقاردىم. قازىر 1-ۋچاسكە بويىنشا مەدبيكەمىن.
- «100 جاڭا ەسىم» جوباسى ءومىرىڭىزدى قانشالىقتى وزگەرتتى؟
- مۇنىڭ ءبارى - ءبىزدىڭ تاۋەلسىز ەلدە ءومىر ءسۇرىپ، ەڭبەك ەتىپ جاتقانىمىزدىڭ ارقاسى. قازاقستاندا ەشقانداي ءبولىنۋ جوق. قاي جەردە بولماسىن كەلىسىم مەن تاتۋلىق سالتانات قۇرعان. سونىمەن قاتار تالاپتانسا، ەلگە ۇلگى بولارلىق ءىس جاساسا، ول ادامنىڭ ەشقانداي تامىر- تانىسسىز توپ جارىپ شىعا الاتىنىن وسى جوبا كورسەتتى. جانە ول اركىمنىڭ وزىنە دەگەن سەنىمىن نىعايتا ءتۇستى. سونىڭ ىشىندە مۇگەدەكتىك ارباعا تاڭىلعان جانداردىڭ دا ءۇمىتىن ۇزبەي، ەڭبەكتەنسە، تالاي بيىكتى باعىندىرا الاتىنىن ۋاقىت كورسەتىپ وتىر.
- جوبا جەڭىمپازى اتانعان كەزدە قانداي سەزىمدە بولدىڭىز؟
- ءبىز استاناعا بارعان ۋاقىتتا جاڭا جوبادا ۇزدىك اتانعانىمىزدى بىلگەن جوقپىز. ەلباسىمىز جەڭىمپازدار ەسىمىن جاريالاعان ساتتە عانا قۋانىشىمىز قوينىمىزعا سىيمادى. ونىڭ ۇستىنە، ەل استاناسىنا العاش رەت بارۋىم بولاتىن. مەملەكەت باسشىسىن وڭىرگە ساپارى بارىسىندا الىستان كورگەنىم بولماسا، جاقىن بارىپ، تىلدەسكەنىم جوق ەدى. وسىنىڭ ءبارى ماعان جان تەبىرەنتەرلىكتەي اسەر ەتتى.
ءبىزدىڭ وبلىسىمىزدان «100 جاڭا ەسىم» جوباسىنا ەنگەن اقسەرىك ءايتىموۆ، سايدا قالىقوۆامەن دە سوندا تانىستىم. شىن مانىسىندە اقسەرىك سارى ۇلىمەن ءبىر اۋداننان ەكەنىمدى عانا بىلەتىنمىن. ول كىسى تۋعان جەرىن ۇمىتپاي، ۇنەمى كومەكتەسىپ تۇرادى. باسقاسىن ايتپاعاندا، ءبىزدىڭ اۋرۋحاناعا بىردە بالاسىمەن ايەل ادام كەلدى. كومەككە مۇقتاج ەكەن، سونى ەستىگەن بويدا اقسەرىك سارى ۇلى ارنايى كەلىپ، قولۇشىن سوزدى. ال سايدا قالىقوۆانى كوز جانارىنان ايىرىلسا دا، مۋزىكا الەمىندە كوپتەگەن اسۋلارعا قول جەتكىزگەن ەرەكشە دارىن يەسى ەكەندىگىن بۇگىندە كۇللى قازاقستان بىلەدى. كىشكەنە كەزىنەن جەتەلەگەن اناسىنىڭ كومەگىمەن سايدانىڭ ءالى تالاي ساحنادا ونەر كورسەتەتىنى انىق. مىنە، وسىنداي جاندارمەن قاتار ءجۇرۋ شىنايى باقىت ەمەس پە؟!
- ەندەشە، ءوزىڭىزدى دە سول قاتارعا جەتكىزگەن وتكەن جىلعى وقيعانى ەسكە تۇسىرسەڭىز.
- ادەتتەگىدەي كۇندەردىڭ ءبىرى ەدى. 19 -شىلدە بولاتىن، اۋداندىق اۋرۋحاناعا ورال- تاسقالا جولى بويىندا ايەلدىڭ بوسانعالى جاتقانى جونىندە حابار ءتۇستى. ءدال سول مەزگىلدە اكۋشەر دارىگەر دەمالىستا ەدى. بۇرىن ايەلدەر بوساناتىن بولىمشەدە جۇمىس جاساعان ادام رەتىندە بريگادا قۇرامىندا مەنىڭ بارۋىما تۋرا كەلدى.
سويتسەم، ءسابي بوسانۋ جولدارىنا تەرىس كەلىپ تۇر ەكەن. باستاپقىدا وتە قورقىنىشتى ەدى، ءبىراق تەز شەشىم قابىلداماسقا بولمايتىن ەدى. بار ءبىلىم-بىلىگىمدى سالىپ، ايەلدى ماشينادا بوساندىرۋعا تۋرا كەلدى، ونىڭ ءوزى دە كومەكتەستى. كوپ ۇزاماي شاقالاقتىڭ داۋسى شىر ەتە ءتۇستى. اناسى مەن قىزىن امان- ەسەن اۋداندىق اۋرۋحاناعا الىپ كەلدىك. بۇل اقتوبە قالاسىندا تۇراتىن 35 جاستاعى روزا ءدۇيىسوۆانىڭ بەسىنشى پەرزەنتى بولىپ شىقتى.
تاسقالا اۋدانىندا تۇراتىن تۋىستارىنا بارىپ، كەيىن ورالىپ كەلە جاتقان بەتى ەكەن. ءقازىر روزا مەنىڭ جاقىن ادامىما اينالدى. ءجيى حات جازىسىپ تۇرامىز. بيىل ءسابيى نازەركەنى 1 جاسقا تولۋىنا وراي پەرەمەتنىي اۋىلىنا، ماعان ارنايى الىپ كەلمەكشى. ءوزىم دە اقتوبە قالاسىنداعى م. وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتىنىڭ كۇندىزگى بولىمىندە ءبىلىم السام با دەپ بەكىنىپ ءجۇرمىن. ەگەر وندا بارسام، مىندەتتى تۇردە سوعامىن. قىسقاشا ايتقاندا، مەن ەرلىك جاسادىم دەپ ويلامايمىن. مەنىڭ ورنىمدا بولعان كەز كەلگەن مەديتسينا قىزمەتكەرى سونداي تاۋەكەلگە بارار ەدى دەپ ويلايمىن.
- «100 جاڭا ەسىم» جوباسى جەڭىمپازى اتانعان كەزدە ۇجىمىڭىز، وتباسىڭىز دا قۋانعان شىعار؟
- ارينە، اۋرۋحانا ۇجىمى قۇشاق-قۇشاق گۇلمەن قارسى الدى. قىزمەتتەستەرىممەن ءاردايىم ەمەن- جارقىن قاتىناستامىن. اسىرەسە، اۋرۋحانا ديرەكتورىنىڭ ەمدەۋ ءىسى جونىندەگى ورىنباسارى ماقسات ورازبايەۆتى بولە-جارا اتار ەدىم. ماقسات ءجۇنىسالى ۇلى بىلىكتى باسشى ءارى سەنىمدە ارىپتەس- دوس رەتىندە كەز كەلگەن جاعدايدا كومەككە كەلىپ، قاجەتتى كەڭەسىن بەرەدى. سونىمەن قاتار ورتاسىنا سىيلى پەدياتر.
وتباسىما كەلسەم، مال وسىرۋمەن اينالىساتىن وتاعاسىمنىڭ قولداۋىن ۇنەمى سەزىنىپ وتىرامىن. ءوزىم كوبىنە جۇمىستامىن. 2-سىنىپتا وقيتىن قىزىم مەن ءۇش جاسار ۇلىمدى اكەسى مەن اتا- انالارىم نازاردان قاعىس قالدىرمايدى. جالپى، تەك جۇمىستا عانا ەمەس، سونىمەن بىرگە بارلىق جەردە دە مەيىربان بولعانعا نە جەتسىن. ءوزىمنىڭ باستى ۇستانىمىم وسىنداي.
- قازىرگى تاڭدا ەلباسى تاپسىرماسىنا سايكەس قاي سالادا بولماسىن سيفرلاندىرۋ جوبالارى قولعا الىنىپ جاتىر، بۇل جونىندە نە ايتار ەدىڭىز؟
- ءبىزدىڭ مەكەمە دە قاعازسىز قۇجات اينالىمىنا كوشتى. باستاپقىدا قيىنداۋ تيگەنى راس، كەيىن ۇيرەنىپ كەتتىك. شىنىنا كەلگەندە، بۇل مەديتسينا قىزمەتكەرلەرىنىڭ جۇمىسىن قايتا جەڭىلدەتەدى. ءبارى كومپيۋتەرگە سالىنعان، كەز كەلگەن ناۋقاستىڭ كارتاسىن اشىپ قاراساڭ، ءبارى جازۋلى تۇرادى. سوندىقتان ءبىز كەلگەن ادامدى قابىلداپ، وعان جان-جاقتى قىزمەت كورسەتۋگە كوبىرەك كوڭىل بولەمىز. مۇنىڭ تيىمدىلىگى سول بولىپ وتىر.
- سۇحباتىڭىزعا راحمەت!