تالاسبەك اسەمقۇلوۆ اسقار سۇلەيمەنوۆ تۋرالى

 استانا. قازاقپارات - اسەكەڭنىڭ (اسقار سۇلەيمەنوۆتىڭ) بۇل دەرتكە قاشان شالدىققانىن بىلمەيمىن. ايتەۋىر، كۇندەردىڭ كۇنىندە وڭ ءبۇيىرىن ۇستاپ اۋىرسىنىپ وتىرىپ قالاتىنىن ءجيى بايقاي باستادىم.

 سودان سوڭ، ونسىز دا اشاڭ ادام، ەتى تورالىپ جۇدەي باستادى. ۇيدەن شىقپاي جاتىپ قالاتىن بولدى. اۋرۋحاناعا كوپ باراتىن بولدى. سوڭعى كەزدەسۋلەرىمىزدىڭ بىرىندە تاكاپپار تۇلعانىڭ اۋرۋدان ەڭكەيىپ ەڭكىش تارتقانىن كورىپ جۇرەگىم شىمىر ەتە قالعان. اسەكەڭ كوپ جوتەلدى. گاۆانا سيگاراسىن ۇگىتىپ سالاتىن ءوزىنىڭ ايگىلى حوش ءيىستى قورقورىن دا تارتا المادى. تۇتاتۋىن تۇتاتىپ، سودان سوڭ الىستاۋ قويىپ قويعان. ءبىراق ءسوزى ءتۇزۋ.

 - قيامەتكە تاقاعاندا، ادام ءوزىنىڭ قاشان جانە قالاي باستالعانىن كوپ ويلايدى ەكەن، - دەگەن ەدى اسەكەڭ اۋىرسىنىپ وتىرىپ.

- مەن ادام رەتىندە، ارينە، قازاقتان باستالدىم. سول سەبەپتى ەلىم تۋرالى، ونىڭ وتكەنى مەن كەتكەنى تۋرالى كوپ ويلايتىن بولدىم. ەكەۋمىز دە ءۇنسىز قالدىق.

 - ءسىز مەنىمەن قوشتاسىپ وتىرعان سياقتىسىز، - دەدىم مەن.

- ءيا، قوشتاسىپ وتىرمىن، - دەدى اسەكەڭ.

 - مەن ءسىزدى ەشقاشان ۇمىتا المايتىن شىعارمىن، - دەدىم مەن.

- راحمەت، - دەدى اسەكەڭ ءسال مۇڭايىڭقىراپ،

 - ادال كوڭىلىڭ ءۇشىن. ءبىراق.. . نەبىر دەگدارلار مەن كەمەڭگەرلەر ولگەندە دە قازاقتىڭ شاڭىراعى ورتاسىنا تۇسكەن جوق. ءبىز مۇحاڭنىڭ دا ولگەنىن كوردىك. سابەڭ مەن عابەڭنىڭ دە دۇنيەدەن قالاي وتكەنىن كوردىك. قامىقتىق. ءبىراق ەڭسەمىزدى كوتەردىك. سەبەبى اعانىڭ ءولىمى ىنىگە جاڭا مىندەت ارتادى. ەگەردە سەندەر ءبىز بۇل فانيدەن كەتكەننەن كەيىن قىرىق جىل قايعىرىپ، دۇنيەدەن باز كەشىپ كەتەتىن بولساڭدار، وندا ناشار شاكىرت بولعاندارىڭ. ولگەن ولەدى، ءتىرى كىسى تىرشىلىگىن ىستەيدى. ەڭ باستىسى - ءىس ارى قاراي جالعاسۋى كەرەك.

كەنەت.. . باعانادان بەرى اۋىرسىنا بۇگىلىڭكىرەپ وتىرعان ادام شالقايا بەرە كۇلگەن. باياعى اسەكەڭ الدىمنان جارق ەتىپ شىعا كەلدى.

Massaget.kz