قازاقستاندا بالالار كودەكسى ازىرلەنىپ جاتىر
بۇل تۋرالى قازاقستاننىڭ بالا قۇقىقتارى جونىندەگى ۋاكىلى زاعيپا باليەۆا «بالالارعا ارنالعان ءادىل سوت: ناتيجەلەر، يننوۆاتسيالار جانە ودان ءارى دامۋى» كونفەرەنسياسىندا ءمالىم ەتتى.
«ءبىز ءۇش زاڭ جوباسىن ازىرلەدىك جانە بالالار كودەكسىنىڭ تۇجىرىمداماسىن ازىرلەۋگە كىرىسىپ كەتتىك. ارينە، قازىر دايىن دەپ ايتۋعا كەلمەيدى. ازىرگە، وسى ءۇش زاڭ جوباسىمەن اينالىسامىز، ونىڭ ىشىندە «بالا جانە سوت ادىلدىگى» زاڭ جوباسى دا بار. كودەكستى ازىرلەۋدە عالىمدارىمىزدىڭ ەڭبەكتەرىمەن تانىستىق، بىرنەشە دوكتورلىق ديسسەرتاتسيالار بار، حالىقارالىق ۇلگىلەر بار»، - دەدى ومبۋدسمەن كونفەرەنسيا بارىسىندا.
ونىڭ ايتۋىنشا، جاڭا كودەكستەن بالا جانە بالامەن جۇمىس ىستەيتىندەر ءوز قۇقىقتارى مەن مىندەتتەمەلەرى تۋرالى بارلىق اقپاراتتى تابا الادى.
«وسىندا وتىرعان بارلىق قاتىسۋشىلار كودەكستى جەتىلدىرۋگە اتسالىسادى دەپ ويلايمىن. سەبەبى، بىزگە بالا جانە بالامەن جۇمىس ىستەيتىندەر ءوز قۇقىقتارى مەن مىندەتتەمەلەرى تۋرالى بارلىق اقپاراتتى تابا الاتىن كوديفيكاتسيالانعان زاڭ كەرەك. شىن مانىندە، ءبارىمىز بىرىگىپ، ۇلكەن جۇمىستىڭ ىرگەتاسىن قالاپ جاتىرمىز. بالالارعا ارنالعان سوت ادىلدىگىندەگى ەڭ ۇزدىك الەمدىك تاجىريبەلەر، ۇزدىك داعدىلار مىندەتتى تۇردە ەسكەرىلەدى»، - دەپ ءوز ءسوزىن تۇيىندەدى زاعيپا باليەۆا.