ءتورتىنشى قاباتتان قۇلاعالى تۇرعان بالانى قۇتقارعان ميگرانت قاھارمان اتاندى
مامۋدۋ گاسساما ءبىر مينۋتتان از ۋاقىت ىشىندە تومەننەن ءتورتىنشى قاباتتىڭ بالكونىنا ورمەلەپ شىعىپ، ءتورت جاسار بالانى كوتەرىپ الدى. سونىڭ الدىندا عانا كورشى پاتەردەن شىققان كىسى بالانى قولىنان ۇستاعان بولاتىن. سەنبىنىڭ كەشىندەگى وقيعانىڭ ۆيدەوسى الەۋمەتتىك جەلىلەردە جاريالاندى.
فرانسيا پرەزيدەنتى ەممانۋەل ماكرون دۇيسەنبى كۇنى گاسسامانى ەليسەي سارايىنا شاقىرىپ، العىس ايتتى.
پاريج مەرى اننا يدالگو دا 22 جاسار مالي ازاماتىنا راحمەت ايتۋ ءۇشىن قوڭىراۋ شالدى. ول وقيعا بولعان كوشەنىڭ اتىمەن گاسسامانى «18-كوشەنىڭ سپايدەرمەنى» دەپ اتادى.
«بالانىڭ ءومىرىن ەرلىكپەن قۇتقارعان مامۋدۋ گاسساماعا العىس بىلدىرەم. ول ماعان وسى جەردە جاڭا ءومىر باستاۋ ءۇشىن بىرنەشە اي بۇرىن ماليدەن كەلگەنىن ايتتى. مەن ونىڭ ەرلىگى بۇكىل فرانسيا ازاماتتارى ءۇشىن ۇلگى ەكەنىن، ال ونىڭ ءبىزدىڭ ەلدە ورنىعۋىنا پاريج قولداۋ بىلدىرۋگە دايىن ەكەنىن جەتكىزدىم» دەدى اننا يدالگو.
گاسسامانىڭ ءوزى جۋرناليستەرمەن اڭگىمەسىندە كوپ قاباتتى ءۇيدىڭ الدىندا توپىرلاپ تۇرعان ادامداردى كورگەنىن ايتتى.
Le Parisien گازەتىنىڭ جازعانىنداي، «ول بالا بولعاندىقتان وسىلاي ەتتىم. ورمەلەپ شىقتىم... قۇداي قولداپ قۇتقارىپ قالدىم» دەگەن ول.
جەرگىلىكتى بيلىك وكىلدەرىنىڭ حابارلاۋىنا قاراعاندا، بالا ۇيدە جالعىز بولعان. مالىمەتتەر بويىنشا، شەشەسى قالادا بولماعان. ال اكەسى بالانى قاراۋسىز قالدىرعانى ءۇشىن جاۋاپقا تارتىلدى.
Baq.kz