قازاقستاندا «جاسىل» جوبالاردىڭ ءبىرىڭعاي بازاسى قۇرىلادى

None
None
استانا. قازاقپارات - قازاقستاندا الداعى ۋاقىتتا «جاسىل» جوبالاردىڭ ءبىرىڭعاي مالىمەتتەر بازاسى قۇرىلادى.

بۇل تۋرالى «جاسىل» تەحنولوگيالار مەن ينۆەستيتسيالىق جوبالاردىڭ حالىقارالىق ورتالىعىنىڭ باسقارما ءتوراعاسى ارمان قاشقىنبەكوۆ ءمالىم ەتتى، دەپ حابارلايدى قازاقپارات ءتىلشىسى.

«ءوزىنىڭ جۇمىسىندا ورتالىق «جاسىل» جوبالاردىڭ جۇزەگە اسىرىلۋىنا جانە قازاقستان رەسپۋبليكاسىنىڭ ايماقتارىنا وتاندىق جانە الەمدىك ۇزدىك تەحنولوگيالاردى تارتۋ جۇمىسىنا باسا ماڭىز بەرەدى. بيىل جىل بويى ءبىز بۇكىل ەلدى ارالاپ، بارلىق قالالار مەن وبلىستارعا بارۋدى كوزدەپ وتىرمىز. ساپارىمىز شىمكەنت قالاسى مەن باتىس قازاقستان وبلىسىنان باستالىپ كەتتى. ورتالىق ايماقتارداعى بارلىق جوسپارلانعان جانە جۇزەگە اسىرىلعان جوبالار بويىنشا مالىمەتتەردىڭ ءبىرىڭعاي بازاسىن قۇرىپ، ديەۆەلوپەرلەر ءوز جەرىندە ينۆەستورلارعا تىكەلەي شىعا الاتىنداي جاعداي جاساۋدى كوزدەيدى. مۇناي- گاز سالاسىنىڭ ءىرى وپەراتورلارى ىنتىماقتاستىققا ءازىر بولىپ وتىرعانى قۋانتادى»، - دەيدى ارمان قاشقىنبەكوۆ.

ارمان قاشقىنبەكوۆ شىمكەنتتە وتكەن قازاقستاندىق- وزبەكستاندىق العاشقى وتىرىستا ورتالىقتىڭ جۇمىسىمەن تانىستىرىپ، ەكى ەلدىڭ ينۆەستورلارىمەن ەكىجاقتى كەزدەسۋ وتكىزدى. سونىمەن بىرگە، ول شىمكەنت قالاسىنىڭ اكىمدىگىمەن ىنتىماقتاستىق جانە ارىپتەستىك تۋرالى كەلىسىمگە قول قويدى. وزبەك تاراپى «جاسىل» ەكونوميكا سالاسىنداعى بىرلەسكەن جوبالاردى ترانسشەكارالىق دەڭگەيدە جۇزەگە اسىرۋ تۋرالى ۇسىنىسقا قىزىعۋشىلىق تانىتتى.

بۇدان بۇرىن ارمان قاشقىنبەكوۆ Uralsk Green Forum-عا قاتىسقان بولاتىن. ول جەردە «جاسىل» تەحنولوگيالار مەن جوبالاردى دامىتۋ ماسەلەلەرى بويىنشا ءبىرىڭعاي وپەراتور رەتىندە جاڭا ۇكىمەتتىك ورتالىقتىڭ ءرولى تانىستىرىلىپ، باتىس قازاقستان وبلىسىنىڭ اكىمدىگى جانە «قاراشىعاناق پەترولەۋم وپەرەيتينگپەن» ىنتىماقتاستىق تۋرالى كەلىسىمگە قول قويىلعان ەدى.

كەلىسىم اياسىندا «جاسىل» تەحنولوگيالاردى شىمكەنت قالاسى مەن باتىس قازاقستان وبلىسىندا، «قاراشىعاناق پەترولەۋم وپەرەيتينگتە» ەنگىزۋ مەن ينۆەستيتسيالار تارتۋ بويىنشا جەرگىلىكتى اتقارۋشى ورگاندارمەن جانە ءىرى مۇناي- گاز وپەراتورلارىمەن بىرلەسە وتىرىپ، جۇمىس ىستەۋ ۇسىنىلىپ وتىر.

ايتا كەتەرلىگى، «جاسىل» تەحنولوگيالار مەن ينۆەستيتسيالىق جوبالاردىڭ حالىقارالىق ورتالىعى مەملەكەت باسشىسىنىڭ ۇسىنىسىمەن 2015 -جىلى ب ۇ ۇ- نىڭ 70-مەرەكەلىك باس اسسامبلەياسىنىڭ سەسسياسىندا قۇرىلعان ەدى.

سوڭعى جاڭالىقتار